ରାଇରଙ୍ଗପୁର,୨୯ା୮(ଡି.ଏନ୍.ଏ)- ମୟୂରଭଞ୍ଜ ଜିଲା ବାଦାମପାହାଡ଼ ଥାନା ଅଞ୍ଚଳରେ ମଙ୍ଗଳବାର ଘଟିଥିବା ଏକ ଦୁର୍ଘଟଣାକୁ ନେଇ ଡମ୍ଫର ଚାଳକ ବିଶ୍ୱନାଥ ହଁାସଦାଙ୍କୁ ମାଡ଼ ମାରିବା ଓ ଲୁହାଖଣି ମାଲିକଙ୍କ କାର୍ଯ୍ୟାଳୟରେ ପଶି ଭଙ୍ଗାରୁଜା କରିବା ଅଭିଯୋଗରେ ପୋଲିସ ୭ ଗ୍ରାମବାସୀଙ୍କୁ ଗିରଫ କରିଛି। ବୁଧବାର ରାତିରେ ପୋଲିସ ଧାଙ୍ଗିଡିମୁତା ଗ୍ରାମରେ ଚଢାଉ କରି ଶ୍ୟାମ ସିଂ ଓରଫ ବାବୁଲୁ ଖୁଣ୍ଟିଆ, ନକୁଳ ସାହୁ, ହେମନ୍ତ ମଲ୍ଲିକ, ଛଟୁ ମଲ୍ଲିକ, ବିଶିକେଶନ ଓରଫ ରାଜୁ ଖୁଣ୍ଟିଆ, ହେମନ୍ତ ପାତ୍ର ଓ ଦିଲ୍ଲୀପ କୁମାର ନାଗଙ୍କୁ ଗିରଫ କରିଥିଲା। ଅଭିଯୁକ୍ତମାନଙ୍କୁ ଗୁରବାର କୋର୍ଟ ଚାଲାଣ କରାଯାଇଛି।
ବାଦାମପାହାଡ଼ସ୍ଥିତ ଲାଲଟ୍ରେଡସ ଲୁହାଖଣି ମାଲିକଙ୍କ କାର୍ଯ୍ୟାଳୟ ସମ୍ମୁଖରେ ଡ଼ମ୍ଫର ଧକ୍କାରେ ବାଇକରେ ବସି ଯାଉଥିବା ଧାଙ୍ଗିଡିମୁତା ଗ୍ରାମର ଜଣେ ବାଳିକା ଚନ୍ଦ୍ର ବଦ୍ରାଙ୍କ ଝିଅ ଆରତୀ ବଦ୍ରାଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୩ ଜଣ ଆହତ ହୋଇଥିଲେ। ଦୁର୍ଘଟଣା ପରେ ଉତ୍ତ୍ୟକ୍ତ ଗ୍ରାମବାସୀ ଡମ୍ଫର ଚାଳକ ବିଶ୍ୱନାଥଙ୍କୁ ନିସ୍ତୁକ ମାଡ଼ ମାରିବା ସହ ଖଣି କାର୍ଯ୍ୟାଳୟରେ ପଶି ଭଙ୍ଗାରୁଜା କରିଥିଲେ। ଡମ୍ପର ଚାଳକଙ୍କ ପ୍ରତି ଆକ୍ରମଣ ଏବଂ ଖଣି କାର୍ଯ୍ୟାଳୟ ଭଙ୍ଗାରୁଜା ସହ ଦୁର୍ଘଟଣା ମାମଲାରେ ପୋଲିସ ପକ୍ଷରୁ ୨ଟି ମାମଲା (ନଂ. ୩୪/୧୯ ଓ ୩୫/୧୯) ରୁଜୁ କରାଯାଇଥିଲା। ଲୋକଙ୍କ ମାଡ଼ରେ ଆହତ ବିଶ୍ୱନାଥଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକସ୍ଥିତ ବଡ଼ ଡାକ୍ତରଖାନାକୁ ଚିକିତ୍ସା ଲାଗି ସ୍ଥାନାନ୍ତର କରାଯାଇଛି। ଏଥିନେଇ ବିଶ୍ୱନାଥଙ୍କ ଗାଁରେ ଉତ୍ତେଜନା ଦେଖାଦେଇଥିଲା। ତାଙ୍କ ପରିବାର ଲୋକଙ୍କ ସମେତ ୫୦ରୁ ଊର୍ଦ୍ଧ୍ୱ ଗ୍ରାମବାସୀ ବୁଧବାର ବାଦାମପାହାଡ଼ ଥାନାରେ ପହଞ୍ଚି ଥାନାଧିକାରୀ ମୁକୁନ୍ଦ ମେଲକାଙ୍କୁ ଭେଟି ବିଶ୍ୱନାଥଙ୍କୁ ନିସ୍ତୁକ ମାଡ଼ ମାରିଥିବା ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବା ସକାଶେ ଲିଖିତ ଅଭିଯୋଗ କରିଥିଲେ। ମାମଲାର ତଦନ୍ତ କରି ଖୁବ୍ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ତଦନ୍ତକାରୀ ପୋଲିସ ଗ୍ରାମବାସୀ ଏବଂ ପରିବାରଙ୍କୁ ପ୍ରତିଶ୍ରୁତି ଦେଇଥିଲେ।
