ଫୁଲବାଣୀ ଅଫିସ, ୨୮ା୧୧ -ଦିଲ୍ଲୀ ଏମ୍ସ (ଅଲ ଇଣ୍ଡିଆ ଇନ୍ଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସ)ର ଆକାଉଣ୍ଟରୁ ୪ କୋଟି ୭୬ ଲକ୍ଷ ୪୬ ହଜାର ୬୨୫ ଟଙ୍କା ଚେକ୍ ଜରିଆରେ ଫୁଲବାଣୀ ଷ୍ଟେଟ ବ୍ୟାଙ୍କ ଶାଖାରୁ ଉଠାଣ ହେବା ଘଟଣାକୁ ନେଇ ବ୍ୟାଙ୍କ ଉଚ୍ଚ କର୍ତ୍ତୃପକ୍ଷ ତଦନ୍ତ ଜୋରଦାର କରିଛନ୍ତି। ଘଟଣାରେ ସାମିଲ ଓ ସନ୍ଦେହ ପରିସରକୁ ଆସିଥିବା ଅଧିକାରୀଙ୍କୁ ପଚରାଉଚରା ପ୍ରାୟ ଶେଷ ହୋଇଛି। ସମସ୍ତ ରିପୋର୍ଟ ଏବଂ ଏ ସଂକ୍ରାନ୍ତ ଅଭିଯୋଗ ନେଇ ଦିଲ୍ଲୀ ସିବିଆଇରେ ଦାଖଲ କରାଯିବ। ସିବିଆଇ ଖୁବ୍ ଶୀଘ୍ର ଫୁଲବାଣୀ ଆସି ମାମଲାର ତଦନ୍ତ କରିବ। ସେପଟେ ଚେକ୍ ଲଗାଇ ଟଙ୍କା ଉଠାଣ ଏବଂ ଟ୍ରାନ୍ସଫର କରିଥିବା ଆକାଉଣ୍ଟଧାରୀ ଚନ୍ଦ୍ରଶେଖର ପଣ୍ଡା ବେଲ୍ ପାଇଁ ହାଇକୋର୍ଟରେ ଚକ୍କର କାଟୁଥିବା ଜଣାପଡିଛି। ଅନ୍ୟପକ୍ଷରେ ବ୍ୟାଙ୍କ କର୍ମଚାରୀ ଘଟଣାରେ ସମ୍ପୂର୍ଣ୍ଣ ସାମିଲ ଥିବା ପଣ୍ଡା କହୁଥିବା (ଯାହାର ଅଡିଓ ଟେପ ହସ୍ତଗତ ହୋଇଛି)ବେଳେ ବ୍ୟାଙ୍କର ଉଚ୍ଚ କର୍ତ୍ତୃପକ୍ଷ ପଣ୍ଡାଙ୍କ ସମେତ ଏକ ରାକେଟ ଏଥିରେ ଜଡିତ ଥିବା କହୁଛନ୍ତି। ସିବିଆଇ ତଦନ୍ତ ପରେ ସବୁକଥା ପଦାକୁ ଆସିବ ବୋଲି ଆଞ୍ଚଳିକ ପ୍ରବନ୍ଧକ(ଆର୍ଏମ୍) ବିକ୍ରମ କେଶରୀ ମାନ୍ଧାତା କହିଛନ୍ତି।
ବ୍ୟାଙ୍କ ଶାଖାର ଚେକ୍ ବ୍ୟତୀତ ନନ୍ ହୋମ ଚେକ୍(ବାହାରର) ଆସିଲେ ତାହା ସାଧାରଣତଃ ସନ୍ଦେହ ପରିସରଭୁକ୍ତ ହୋଇଥାଏ। ଯାହାର ଅନେକ କାରଣ ରହିଛି। ଯଥା ଏହା ଦିଲ୍ଲୀର ଚେକ୍ ହୋଇଥିବାରୁ ସେଠାରେ ଚେକ୍ ଡ୍ରପ କରାଯାଇ ପାରିଥାନ୍ତା। ଯଦି ଏମ୍ସରୁ ପଣ୍ଡା କୌଣସି ବାବଦରେ ଟଙ୍କା ପାଇବାର ଥିଲା ଏମ୍ସ୍
କତ୍ତୃର୍ର୍ପକ୍ଷ ଆର୍ଟିଜିଏସ୍ କରିପାରି ଥାନ୍ତେ। ଦିଲ୍ଲୀ ଏମ୍ସର ଚିଠି ଅନୁଯାୟୀ ସେହି ନଂ. ଚେକ୍ ତାଙ୍କ ପାଖରେ ରହିଛି। ସତ୍ୟସାଇ ମେଡିସିନି ଷ୍ଟୋର ଆକାଉଣ୍ଟ ନାମରେ ସେଭଳି କିଛି ଚେକ୍ ପ୍ରଦାନ କରାଯାଇ ନ ଥିବା ଫୁଲବାଣୀ ଶାଖା ବ୍ୟାଙ୍କ କର୍ତ୍ତୃପକ୍ଷଙ୍କୁ ଅବଗତ କରାଯିବା ପରେ ସେହି ଚେକ୍କୁ ସିଲ କରାଯାଇଛି। ଯାହା ଜଣାପଡିଛି ସେହି ଚେକ୍ର କ୍ଲୋନିଂ(ଅବିକଳ ନକଲ) କରାଯାଇଛି। ତେଣୁ ଏଥିରେ ଏକ ବଡ ଧରଣର ରାକେଟ ସାମିଲ ଅଛି। ପଣ୍ଡା ବ୍ୟାଙ୍କକୁ ଯିବା, ଚେକ୍ ଡ୍ରପ୍ କରିବା, ଟଙ୍କା ଉଠାଇବା, ଚେକ୍ରେ ଦସ୍ତଖତ କରିବାର ସବୁ ସିସିଟିଭି ଫୁଟେଜ୍ ରହିଛି। ମାମଲା ସିବିଆଇ ନେଲା ପରେ ଖବରଦାତା ସମ୍ମିଳନୀ କରାଯାଇ ଘଟଣା ବିଷୟରେ ଜଣାଯିବ ବୋଲି ଆର୍ଏମ୍
ମାନ୍ଧାତା କହିଛନ୍ତି।
ସୁଚନାଯୋଗ୍ୟ, ଗତ ଅକ୍ଟୋବର ୨୩ରେ ଫୁଲବାଣୀ ମୁଖ୍ୟ ଷ୍ଟେଟ ବ୍ୟାଙ୍କରେ ସତ୍ୟସାଇ ମେଡିସିନି ଷ୍ଟୋର ଆକାଉଣ୍ଟ ନଂ. ୩୨୮୮୦୪୭୯୪୦୧ରେ ନୂଆଦିଲ୍ଲୀ ସ୍ଥିତ ଏମସ୍ର ଏକ ଚେକ୍ ଜମା କରା ଯାଇଥିଲା। ଏହାପରେ ଆକାଉଣ୍ଟକୁ ୪ କୋଟି ୭୬ ହଜାର ୬୨୫ ଟଙ୍କା କ୍ରେଡିଟ ହୋଇଥିଲା। ପଣ୍ଡା ଏହାପରେ ଟ୍ରାନଜାକସନ କରି ଟଂକା ଉଠାଣ ସହ ଟ୍ରାନ୍ସଫର କରି ଚାଲିଥିଲେ। ସେଥିରୁ ଗୋଟିଏ ଟ୍ରାନଜାକସନ ୪ କୋଟି ୧୦ ଲକ୍ଷ ଟଂକା ଚେନାଇର ଭିଏମ୍ଏକ୍ସ
ଇମ୍ପେକ୍ସ ପ୍ରାଇଭେଟ ଲିମିଟେଡ ଆକାଉଣ୍ଟକୁ ଯାଇଥିଲା।
