ଭୁବନେଶ୍ୱର,୪ା୯(ବ୍ୟୁରୋ):ଦକ୍ଷତା ବିକାଶ କ୍ଷେତ୍ରରେ ମିଳିତ ଭାବେ କାର୍ଯ୍ୟ କରିବେ ଓଡ଼ିଶା ଏବଂ ସିଙ୍ଗାପୁର। ଧନ୍ଦାମୂଳକ ଶିକ୍ଷା ଏବଂ ବୈଷୟିକ ଜ୍ଞାନକୌଶଳ କ୍ଷେତ୍ରରେ ଆଉ ପାଦେ ଆଗେଇବାକୁ ସିଙ୍ଗାପୁର ସରକାରଙ୍କ ସାହାଯ୍ୟ ଲୋଡ଼ିବ ଓଡ଼ିଶା। ରାଜ୍ୟରେ ଥିବା ଆଇଟିଆଇ ଏବଂ ପଲିଟେକ୍ନିକ୍ଗୁଡ଼ିକରେ ଯେପରି ପିଲାମାନେ ଅତ୍ୟାଧୁନିକ ଜ୍ଞାନକୌଶଳ ସହ ପରିଚିତ ହୋଇ ଦକ୍ଷ ହୋଇପାରିବେ, ସେଥିପାଇଁ ପ୍ରଶିକ୍ଷକମାନଙ୍କୁ ପ୍ରଶିକ୍ଷଣ ଦିଆଯିବ। ସିଙ୍ଗାପୁର ଗସ୍ତରେ ଯାଇଥିବା ଓଡ଼ିଶା ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରେମାନନ୍ଦ ନାୟକ ସିଙ୍ଗାପୁର ଶିକ୍ଷା ମନ୍ତ୍ରୀଙ୍କ ସହ ଆଲୋଚନା କରିବା ଅବସରରେ ଏନେଇ ନିଷ୍ପତ୍ତି ହୋଇଛି।
ସିଙ୍ଗାପୁରଠାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ସିଙ୍ଗାପୁର ଶିକ୍ଷା ମନ୍ତ୍ରୀ ଓଙ୍ଗ୍ ୟେ କୁଙ୍ଗ୍ ଏବଂ ମନ୍ତ୍ରୀ ନାୟକ ଓଡ଼ିଶା ସରକାର ଏବଂ ସିଙ୍ଗାପୁର ସରକାରଙ୍କ ମଧ୍ୟରେ ହୋଇଥିବା ବୁଝାମଣା ବିଷୟରେ ସମୀକ୍ଷା କରିଥିଲେ। ସିଙ୍ଗାପୁରସ୍ଥିତ ଆଇଟିଇଏସ୍ ଏବଂ ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ମଧ୍ୟରେ ହୋଇଥିବା ଏକାଧିକ ଏମ୍ଓୟୁ ଓଡ଼ିଶାର ବୈଷୟିକ ଧନ୍ଦାମୂଳକ ଶିକ୍ଷା ଏବଂ ପ୍ରଶିକ୍ଷଣରେ ବିଶେଷ ଭାବେ ସହାୟ ହୋଇଛି। ଏହି ଅବସରରେ ମନ୍ତ୍ରୀ ନାୟକ ସିଙ୍ଗାପୁର ଶିକ୍ଷା ମନ୍ତ୍ରୀଙ୍କୁ ୨୦୨୦ରେ ଓଡ଼ିଶା ଗସ୍ତ କରିବା ପାଇଁ ଆମନ୍ତ୍ରଣ କରିଥିଲେ। ସିଙ୍ଗାପୁର ଶିକ୍ଷା ମନ୍ତ୍ରୀ କୁଙ୍ଗ୍ ଆଗାମୀ ଦିନରେ ଓଡ଼ିଶାରେ ଦକ୍ଷତା ବିକାଶର ଭିତ୍ତିଭୂମି ସୁଦୃଢ କରିବା ପାଇଁ ସମସ୍ତ ପ୍ରକାର ସହଯୋଗ ଯୋଗାଇଦେବେ ବୋଲି କହିଥିଲେ।
ଓଡ଼ିଶାରେ ସିଙ୍ଗାପୁରର ୧୦୦ଜଣ ଶିକ୍ଷାର୍ଥୀଙ୍କୁ ବୈଷୟିକ ଧନ୍ଦାମୂଳକ ଶିକ୍ଷା ଓ ପ୍ରଶିକ୍ଷଣ ନିମନ୍ତେ ଇଣ୍ଟର୍ନଶିପ୍ ପ୍ରଦାନ କରିବାକୁ ନାୟକ ପ୍ରସ୍ତାବ ଦେଇଥିଲେ। ଆଇଟିଆଇ ପ୍ରଶିକ୍ଷକମାନଙ୍କ ନେତୃତ୍ୱ ବିକାଶ ପ୍ରଶିକ୍ଷଣ ସଫଳଭାବେ କାର୍ଯ୍ୟକାରୀ ହୋଇଥିବାରୁ ପରବର୍ତ୍ତୀ ପର୍ଯ୍ୟାୟରେ ଓଡ଼ିଶାର ପଲିଟେକ୍ନିକ୍ର ପ୍ରଶିକ୍ଷକମାନଙ୍କୁ ମଧ୍ୟ ନେତୃତ୍ୱ ବିକାଶ ପ୍ରଶିକ୍ଷଣ ପାଇଁ ସିଙ୍ଗାପୁର ପଠାଯିବ। ଏନେଇ ଓଡ଼ିଶା ପକ୍ଷରୁ ସିଙ୍ଗାପୁରକୁ ପ୍ରସ୍ତାବ ଦିଆଯାଇଛି। ବୈଠକରେ ଭାରତର ରାଷ୍ଟ୍ରଦୂତ ଜାଭେଦ ଆଶ୍ରଫ୍, ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଅଧ୍ୟକ୍ଷ ସୁବ୍ରତ ବାଗ୍ଚୀ, ଆଇଟିଇଏସ୍ ସିଇଓ ବ୍ରୁସ୍ ପୋ, ନିର୍ଦ୍ଦେଶକ ବୁନ୍ ଯିୟଙ୍ଗ୍, ଓଏସ୍ଡିଏ ସିଇଓ ରଶ୍ମିତା ପଣ୍ଡା ଏବଂ ବୈଷୟିକ ଶିକ୍ଷା ଓ ପ୍ରଶିକ୍ଷଣ ନିର୍ଦ୍ଦେଶାଳୟର ନିର୍ଦ୍ଦେଶକ ରେଘୁ ଜି ପ୍ରମୁଖ ଯୋଗଦେଇଥିଲେ।
