ତାଳଚେର, ୩୦ା୧୦(ନି.ପ୍ର.)- ତାଳଚେର ଭାଲୁଗାଡିଆ ଗ୍ରାମରେ ୪ଶହ ପରିବାର ବସବାସ କରୁଛନ୍ତି। ଗ୍ରାମର ୬୬୩.୫୪ ଏକର ଜମି ଅଧିଗ୍ରହଣ ନିମନ୍ତେ ୨୦୦୩ରେ ୪(୧) ନୋଟିସ ହୋଇଥିଲା। ୧୭ା୧୨ା୨୦୧୦ କଟଅଫ ଡେଟ ଥିଲା। ୬୦ ପ୍ରତିଶତ ଲୋକ ଚାକିରି ପାଇଥିବା ବେଳେ ଅବଶିଷ୍ଟ ୪୦ ପ୍ରତିଶତ ଏବେ ବି ଚାକିରି ଆଶାରେ ରହିଛନ୍ତି। ବାରମ୍ବାର ଅଭିଯୋଗ ପରେ ଗ୍ରାମକୁ ବିସ୍ଥାପନ କରାଯାଉ ନାହିଁ। ପୁନର୍ବାସ, ଥଇଥାନ ନ କରି ଉଚ୍ଛେଦ କରାଯିବା ଅତ୍ୟନ୍ତ ନିନ୍ଦନୀୟ ଘଟଣା ବୋଲି ଗ୍ରାମବାସୀ ପ୍ରକାଶ କରିଛନ୍ତି। ଗ୍ରାମ ସଭାପତି ସୁରେଶଚନ୍ଦ୍ର ସାହୁ କହିଛନ୍ତି, ଜାଗା ମିଳିଲେ ଆମେ ଗଁା ଛାଡିବୁ। ନ ହେଲେ ଛାଡିବୁ ନାହିଁ। ପୁନର୍ବାସସ୍ଥଳ ଚିହ୍ନଟ କରାଯିବା, ବକେୟା ଚାକିରି ପ୍ରଦାନ, କ୍ଷତିପୂରଣ ତୁରନ୍ତ ପ୍ରଦାନ କରାଯିବା ଆବଶ୍ୟକ। ଗ୍ରାମର ରସାନନ୍ଦ ବେହେରା କହିଛନ୍ତି, ପ୍ରଶାସନ, ପୋଲିସ ଲୋକଙ୍କ ସମସ୍ୟା ନ ବୁଝି ଏମ୍ସିଏଲ୍ ପାଇଁ କାମ କରୁଛନ୍ତି। ଏମ୍ସିଏଲ୍ କର୍ତ୍ତୃପକ୍ଷ ପର୍ଯ୍ୟାୟକ୍ରମେ ଉଚ୍ଛେଦ ନ କରି ଏକକାଳୀନ ବିସ୍ଥାପନ ଓ ଥଇଥାନ କରନ୍ତୁ। ଆମକୁ ଅଟକ ରଖି ଉଚ୍ଛେଦ କରାଯିବା ଅତ୍ୟନ୍ତ ଅଗଣତାନ୍ତ୍ରିକ। ଏହା ପୂର୍ବରୁ କେବେ ଦେଖା ଯାଇ ନ ଥିଲା। ଭାଜପା ନେତା ରବି ନାରାୟଣ ପାଣି କହିଛନ୍ତି, ବିଧାୟକ, ଏମ୍ପି ଲୋକଙ୍କ ସ୍ବାର୍ଥ ଅପେକ୍ଷା ନିଜ ସ୍ବାର୍ଥ ପାଇଁ ଅଧିକ ବ୍ୟସ୍ତ ରହୁଛନ୍ତି, ଯାହା ଠିକ୍ ନୁହେଁ। ଦେଶର ସ୍ବାର୍ଥ ପାଇଁ ଜମି ହରାଉଥିବା ଲୋକଙ୍କ ପାଇଁ ଉପଯୁକ୍ତ ଚାକିରି, କ୍ଷତିପୂରଣ, ଥଇଥାନ ବ୍ୟବସ୍ଥା କରାଯିବା ଦରକାର। ଏ କ୍ଷେତ୍ରରେ ପ୍ରଶାସନ, ଏମ୍ସିଏଲ୍, ପୋଲିସ ସମ୍ବେଦନଶୀଳ ହେବା ଆବଶ୍ୟକ। ଜିଲା କଂଗ୍ରେସ କାର୍ଯ୍ୟକାରୀ ସଭାପତି ସୁରେଶ ବେହେରା କହିଛନ୍ତି, ହକ୍ ମାଗିବା ଭୁଲ ନୁହେଁ। ହକ୍ ମାଗିଲେ ଏମ୍ସିଏଲ୍, ପୋଲିସ, ପ୍ରଶାସନ ବାଧା ସୃଷ୍ଟି କରିବା ମଧ୍ୟ ଠିକ୍ ନୁହେଁ। ସେମାନଙ୍କ ଦାବିକୁ ସହୃଦୟତାର ସହ ବିଚାର କରିବାର ଆବଶ୍ୟକତା ରହିଛି। ବିଜେଡି ବ୍ଲକ ଉପସଭାପତି ସନ୍ତୋଷ ପ୍ରଧାନ କହିଛନ୍ତି, ଉପଯୁକ୍ତ ଥଇଥାନ ନ କରି ପୋଲିସ ଦ୍ୱାରା ଉଚ୍ଛେଦ କରାଯିବା ଦୁର୍ଭାଗ୍ୟଜନକ। ଏମ୍ସିଏଲ୍, ଜିଲା ପ୍ରଶାସନ ଏ ଦିଗରେ ସଚେତନ ନ ହେଲେ ଆଗାମୀ ଦିନରେ ତାଳଚେରରେ ଭୟଙ୍କର ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେବ। ତାଳଚେର ଓକିଲ ସଂଘ ସଭାପତି ରଞ୍ଜିତ ଘୋଷ କହିଛନ୍ତି, କ୍ଷତିଗ୍ରସ୍ତଙ୍କୁ ଉପଯୁକ୍ତ ଥଇଥାନ ନ କରି ପୋଲିସ ଫୋର୍ସ ଦ୍ୱାରା ଗ୍ରାମରୁ ବିତାଡିତ କରିବା ଅତ୍ୟନ୍ତ ଦୁଭାର୍ଗଜନକ। କ୍ଷତିଗ୍ରସ୍ତଙ୍କ ଦାବିକୁ ଅତ୍ୟନ୍ତ ଗମ୍ଭୀରତାର ସହ ବିଚାର କରାଯିବା ଦରକାର।
