ଭୋପାଳ,୪।୪: କରୋନା ଭାଇରସ ସହ ଲଢ଼ିବାକୁ ଏବେ ମାସ୍କ ଓ ସାନିଟାଇଜରର ଆବଶ୍ୟକତା ବଢିଯାଇଛି। ଏହାକୁ ଦୃଷ୍ଟିରେ ରଖି ଏବେ ବିଭିନ୍ନ ସଂସ୍ଥା ପକ୍ଷରୁ ମାସ୍କ ତିଆରି କରାଯାଉଥିବା ଦେଖାଯାଇଛି। ମଧ୍ୟପ୍ରଦେଶର ଏମିତି ଜଣେ ମହିଳା ପୋଲିସ ଏବେ ସମସ୍ତଙ୍କର ଦୃଷ୍ଟି ଆକର୍ଷଣ କରିଛନ୍ତି। ଡ୍ୟୁଟି ସାରିବା ପରେ ମହିଳା ପୋଲିସ ଜଣଙ୍କ ମାସ୍କ ତିଆରି କରୁଥିବା ଦେଖାଯାଇଛି। ସୋସିଆଲ ମିଡିଆରେ ଏହି ମହିଳା ପୋଲିସଙ୍କୁ ଖୁବ ପ୍ରଶଂସା କରାଯାଉଛି। ଏମିତିକି ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂ ମଧ୍ୟ ଉକ୍ତ ମହିଳା ପୋଲିସଙ୍କ ପ୍ରଶଂସା କରିଥିବା ଦେଖାଯାଇଛି।ମୁଖ୍ୟମନ୍ତ୍ରୀ ଲେଖିଛନ୍ତି ଝିଅ ସବୁବେଳେ ଖୁସିରେ ରୁହ ଜଗତର କଲ୍ୟାଣ କର। ସନ୍ଦୀପ ସିଂ ନାମକ ଜଣେ ଟୁଇଟର ୟୁଜର ଏହାକୁ ଟୁଇଟ କରିବା ପରେ ଏହା ସାମ୍ନାକୁ ଆସିଛି। ମହିଳା ପୋଲିସ ଜଣଙ୍କ ଖୁରୋଇ ଥାନାରେ କାର୍ଯ୍ୟରତ ସୃଷ୍ଟି ସ୍ରୋତିଆ ବୋଲି ଜଣାପଡିଛି। ସଂଦୀପଙ୍କର ଟୁଇଟକୁ ୫୦୦ ଥର ରିଟୁଇଟ କରାଯାଇଥିବାବେଳେ ୨ ହଜାରେ ଲାଇକ୍ସ ମିଳିଛି।
