ଅତାବିରା, ୫।୩ (ଡି.ଏନ୍.ଏ.)- ବରଗଡ଼ ଜିଲା ଅତାବିରା ବ୍ଲକ ଲରମ୍ଭାରେ ଥିବାର ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ପରିସରକେ ବାହାରର ଅସ୍କୁରା ପାଏନ୍ ପଶୁଛେ। ପରିସରରେ ସବୁବେଲେ ପାଏନ୍ ଜମି ରହିବାରଲାଗି ମଶାମାଛିକର ଭୂସରଗ ପାଲଟିଛେ। ଏନ୍ତାଥି ପରିବେଶ ପରଦୂଷିତ ହେବାର ସଂଗେ ଗଁଧେ ନାକ୍ ଫାଟି ପଡ଼ୁଛେ। ଡାକ୍ତରଖାନା କତୁରପକ୍ଷ ସମସିଆର ସମାଧାନ ଲାଗି ଥାନୀଅ ପରଶାସନକେ କହି ନିରାଶ ହେଇଥିବାର କହିଛନ୍।
ସୂଚନା ଅନ୍ସାରେ ଅତାବିରା ବ୍ଲକ ଲରମ୍ଭା ପଁଚେତ୍ ସଦରରେ ଅଂଚଲବାସୀକୁ ସୁଆସ୍ତିଅ ସେବା ଯୁଗେଇ ଦେବାର ଲାଗି ଗୁଟେ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛେ। ଇ କେନ୍ଦ୍ର ଉପରେ ଟାମ୍ବରଶରା, ଲରମ୍ଭା, ବୁଗବୁଗା, ଦୁଲମପୁର ୪ଟା ପଁଚେତ୍ର ପାଖାପାଖି ୨୦ ହଜାର ଲୋକ ନିରଭର କରୁଛନ୍। ହେଲେ ପାସେ ଥିବାର କେନାଲର ପାଏନ୍ ଅହରହ ଡାକ୍ତରଖାନା ପରିସରକେ ପଶୁଛେ। ଅନେକ ସମିଆରେ ପରିସରରେ ପାଏନ୍ ଦିନ୍ଦିନ୍ ଧରି ଟୁଡ଼ି ରହିବାର ସଂଗେ ମଶାମାଛିକର ଭୂସରଗ ପାଲଟିଛେ। କେନାଲର ମରାମତି ଆର ସଫେଇ ଅଭାବୁ ପାଏନ୍ ଡାକ୍ତରଖାନାକେ ପସୁଥିବାର ଜନାଯାଇଛେ। ସେନ୍ତା ବରଷା ଦିନେ ଅବସ୍ତା ଆହୁରି ଖରାପ ହେଇଯାଉଛେ। ଡାକ୍ତରଖାନାର ଚାରହିକୁତି ପାଏନ୍ ଟୁଡ଼ି ରହୁଛେ। ଏନ୍ତାଥି ଡାକ୍ତରଖାନାର କରମ୍ଚାରୀ, ରୁଗୀମାନେ ବଡ଼ା ହଇରାନ ହରକତ ହେଉଥିବାର ଦେଖ୍ବାକେ ମିଲୁଛେ। ଇଆଡ଼େ ସରକାର ରାସ୍ତାଘାଟ, ଘରର ଚାର୍ହିକୁତି ସାଫସୁତର ରଖବାକେ ଲୁକକୁ ସଚେତନ କରୁଛନ୍। ଗଁା ପରିବେଶକେ ସାଫସୁତର ରଖବାର ଲାଗି ଗଁାଲ୍ୟାଣ ସମିତି କାଯ୍ କରୁଛେ। କେନ୍ଦ୍ର ସରକାର ସ୍ବଚ୍ଛ ଭାରତ ଅଭିଯାନ ଜରିଆରେ କୋଟି କୋଟି ଟଁକା ଖରଚ୍ କରୁଛନ୍। ହେଲେ ଥାନୀଅ ପରଶାସନ, ରାଜନେତାକର ଅଁାତରିକତା ଅଭାବୁ ସରକାରକଁର ଇ ସବୁ ମହତ୍ ଯୋଜନା ଫସର ଫାଟୁଛେ। ସ୍ବାସ୍ଥ୍ୟକେନ୍ଦ୍ରର ସମସିଆର ସମାଧାନ ଲାଗି ଅଂଚଲବାସୀ ଅନେକ ଦିନୁ ଦାବି କରିଆସୁଛନ୍। ନାଇଁହେଲେ ଆଏବାର ଦିନେ ଅଂଚଲବାସୀ ଉଲ୍ଗୁଲାନକେ ଉତିରମୁ ବଲି ସାମାଜିକ କରମୀ ମାନସ ପଣ୍ଡା, ଖଗେଶ୍ୱର ମେହେର ପରମୁଖ ପରଶାସନକେ ଚେତାବନୀ ଦେଇଛନ୍। ଇ ବାବ୍ଦେ ସ୍ବାସ୍ଥ୍ୟକେନ୍ଦ୍ରର ଡା.ଦେବାଶିଷ ବିଶ୍ୱାଳ ଆର ଆୟୁଷ ଡା.ତ୍ରିଲୋଚନ ବରାଲକୁଁ ପଚ୍ରାଲାରୁ ଆମେ ସମସିଆର ସମାଧାନ ଲାଗି ଥାନୀଅ ସରପଁଚ୍, ଓ୍ବାର୍ଡ ମେମ୍ବର, ପାଣି ପଞ୍ଚାୟତ ସଭାପତିକଁୁ କହିଛୁଁ। ହେଲେ ଆଏଜ୍ତକ ସମସିଆର ସମାଧାନ ନୁହେ ହୁଏ ବଲି ଉଭଏ କହିଥିଲେ। ସେନ୍ତା ଇ ବାବ୍ଦେ କେନାଲ ଏସ୍ଡିଓ ଗତିକୃଷ୍ଣ ବରିହାକୁଁ ପଚ୍ରାଲାରୁ ସମସିଆର ସମାଧାନ ଲାଗି ମୁଇଁ କନିଷ୍ଠଯନ୍ତ୍ରୀକୁଁ ନିରଦେଶ ଦେଇଛେଁ ବଲି ସେ କହିଥିଲେ। କନିଷ୍ଠଯନ୍ତ୍ରୀକୁଁ ପଚ୍ରାଲାରୁ ଆଏବାର ଦିନେ ଦୁଇଦିନ ଭିତରେ ପଦକ୍ଷେପ ନିଆଯିବା ବଲି ସେ କହିଥିଲେ। ଇ ବାବ୍ଦେ ଥାନୀଅ ସରପଁଚ୍ ବିକାଶ ଭୋଇକୁଁ ପଚ୍ରାଲାରୁ ଆଗରୁ କାଡା ବିଭାଗ କାମ କରିଥିଲା, ହେଲେ ଫେନ୍ ପାଏନ୍ ପଶୁଛେ। କେନାଲ ବିଭାଗକେ କହି ସମସିଆର ସମାଧାନ କରାଯିବା ବଲି ସେ କହିଥିଲେ।
