ଅନୁଗୋଳ ଅଫିସ, ୨୮।୪
ଅନୁଗୋଳ ସହର ଉପକଣ୍ଠ କରଡ଼ାଗାଡ଼ିଆରେ ଥିବା ଦେଶୀ ମଦ ଭାଟି ଉପରେ ଚଢ଼ାଉ ସହ ୪୩ ଜଣଙ୍କୁ ଗିରଫ କରାଯିବା ମାମଲାର ରିପୋର୍ଟ ଅବକାରୀ ବିଭାଗ ପକ୍ଷରୁ ଜିଲାପାଳ ମନୋଜ କୁମାର ମହାନ୍ତିଙ୍କୁ ପ୍ରଦାନ କରାଯାଇଛି। ଲକ୍ଡାଉନ୍ ସମୟରେ ମଦ ଭାଟି ଗୁଡ଼ିକୁ ସିଲ୍ କରାଯାଇଥିବା ସତ୍ତ୍ୱେ କରଡ଼ାଗାଡ଼ିଆ ଭାଟିରେ କିପରି ଚୋରା କାରବାର ଚାଲିଥିଲା ସେ ନେଇ ଜିଲାପାଳ ଅବକାରୀ ବିଭାଗକୁ ରିପୋର୍ଟ ତଲବ କରିଥିଲେ। ୩ ଦିନ ମଧ୍ୟରେ ଏହାର ଉତ୍ତର ଦେବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ। ଅବକାରୀ ଏସ୍ପି ଦାୟିତ୍ୱରେ ଥିବା ଡିଏସ୍ପି କ୍ରିଷ୍ଣା ନାୟକ ଏହାର ଜବାବ ଦେବାକୁ ସଦର ଅବକାରୀ ବିଭାଗ ଅଧିକାରୀଙ୍କୁ କହିଥିଲେ। ତଦନୁଯାୟୀ ସୋମବାର ଅବକାରୀ ବିଭାଗ ପକ୍ଷରୁ ଜିଲାପାଳଙ୍କୁ ମାମଲାର ବିସ୍ତୃତ ରିପୋର୍ଟ ଦିଆଯାଇଛି। ଏଥିସହ ସରକାରୀ ନିର୍ଦ୍ଦେଶର ଉଲ୍ଲଂଘନ କରିଥିବାରୁ ଭାଟି ମାଲିକ ବିକ୍ରମ କିଶୋର ସାହୁଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଭାଗ ପକ୍ଷରୁ ଜିଲାପାଳଙ୍କୁ ସୁପାରିସ କରାଯାଇଥିବା ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ସମ୍ପକ୍ତ ଅଧିକାରୀ କହିଛନ୍ତି, ରବିବାର ବ୍ୟବସାୟୀ ସାହୁଙ୍କୁ କୋର୍ଟଚାଲାଣ କରାଯାଇଥିବା ବେଳେ ଜେଲ୍ ସମ୍ମୁଖରେ ତାଙ୍କ ପରିବାର ଲୋକ ଧାରଣାରେ ବସିଥିଲେ। ତେବେ ପୋଲିସ ସେମାନଙ୍କୁ ଉଠାଇ ଦେଇଥିଲା। ଜିଲାପାଳ ମହାନ୍ତି କହିଛନ୍ତି, ଘଟଣାଟି ସମ୍ବେଦନଶୀଳ। ତେଣୁ ଏହାକୁ ଅନୁଧ୍ୟାନ କରାଯାଉଛି।
