ନୟାଗଡ଼ ଅଫିସ,୩।୯-ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ରୋଗୀଙ୍କୁ ଶୋଷଣ କରାଯାଉଥିବା ଅଭିଯୋଗ ହେଉଛି। ଜଣେ ମହିଳାଙ୍କୁ ପ୍ରସବ କରାଇଦେବା ପାଇଁ ଡାକ୍ତର, ଆଟେଣ୍ଡାଣ୍ଟ ଓ ଆଶା ଦିଦି ମିଶି ୫୦୦୦ ଟଙ୍କା ନେଇଥିବା ଓ ଷ୍ଟିଚ୍ ଖୋଲିବା ପରେ ଆଉ ୨୦୦ ଟଙ୍କା ନେଇଥିବା ଅଭିଯୋଗ ସହ ଏ ନେଇ ଏକ ଭିଡିଓ ଭାଇରାଲ୍ ହୋଇଛି। ଏହି ଭିଡିଓ ଭାଇରାଲ୍ ହେବା ପରେ ଜିଲା ମୁଖ୍ୟ ଚିକିତ୍ସାଳୟର କର୍ମଚାରୀ ଓ ଡାକ୍ତର କେତେ ସ୍ବଚ୍ଛ ତାହାକୁ ନେଇ ସାଧାରଣରେ ପ୍ରଶ୍ନ ଉଠୁଛି।
ଜିଲା ଶରଣକୁଳ ଥାନା ସୋଲପଟା ଗ୍ରାମର କାମେଶ୍ୱର ଆଚାରୀ ଏ ନେଇ ଟାଉନ ଥାନା ଓ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି। କାମେଶ୍ୱର କରିଥିବା ଅଭିଯୋଗ ଅନୁସାରେ ତାଙ୍କ ସ୍ତ୍ରୀଙ୍କ ପ୍ରସବ ସମୟ ହେବାରୁ ଗତ ୨୭ ତାରିଖରେ ସେ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସନ୍ଧ୍ୟାରେ ଡାକ୍ତରଖାନାର ଜଣେ ନର୍ସ (ଆଟେଣ୍ଡାଣ୍ଟ) ଆସି ପ୍ରସବ କରାଇ ଦେବା ପାଇଁ ୫୦୦୦ ଟଙ୍କା ମାଗିଥିଲେ। ଉକ୍ତ ଟଙ୍କାକୁ ଡାକ୍ତର ଓ ସେମାନେ ଭାଗ ବାଣ୍ଟି ନେବେ ବୋଲି କହିଥିଲେ। କାମେଶ୍ୱରଙ୍କ ସ୍ତ୍ରୀଙ୍କ ଅବସ୍ଥା ଗୁରୁତର ହୋଇଥିବାରୁ ସେ ବାଧ୍ୟ ହୋଇ ୫ ହଜାର ଟଙ୍କା ଦେଇଥିଲେ। ଏହା ପରେ ଅସ୍ତ୍ରୋପଚାର କରାଯାଇ ଶିଶୁ କନ୍ୟାଟିଏ ଜନ୍ମ ହୋଇଥିଲା। ସମ୍ପୃକ୍ତ ନର୍ସ ମଧ୍ୟ ତାଙ୍କ ପିଛା ଛାଡ଼ି ନ ଥିଲେ। ଷ୍ଟିଚ୍ ଖୋଲାଯିବ ପରେ ଆଉ ୨୦୦ ଟଙ୍କା ଦେବାକୁ ସେ କହିଥିଲେ। କାମେଶ୍ୱର ସୋମବାର ୨୦୦ ଟଙ୍କା ନର୍ସଙ୍କୁ ଦେଉଥିବାବେଳେ ଚତୁରତାର ସହିତ ଏହାକୁ ମୋବାଇଲରେ ରେକର୍ଡିଂ କରି ଦେଇଥିଲେ। ପରେ ଏହାକୁ ଭାଇରାଲ୍ କରିଥିଲେ। ଏହି ଘଟଣା ଭାଇରାଲ ହେବା ପରେ ବିଭିନ୍ନ ମହଲରେ ଏହାକୁ ନିନ୍ଦା କରାଯାଉଛି। ଅନ୍ୟପକ୍ଷେ କାମେଶ୍ୱରଙ୍କ ନବଜାତ ଶିଶୁକନ୍ୟାର ଅବସ୍ଥା ଭଲ ନ ଥିବା ସେ ଅଭିଯୋଗ କରିଛନ୍ତି। ଏ ନେଇ ଜିଲା ମୁଖ୍ୟ ଚିକିତ୍ସା ଅଧିକାରୀ (ସିଡିଏମ୍ଓ) ଡା. ଶ୍ୱେତ ମହାପାତ୍ରଙ୍କୁ ପଚାରିବାରୁ ସେ କୁହନ୍ତି, ଏ ନେଇ କାମେଶ୍ୱର ମୋ ପାଖରେ ଅଭିଯୋଗ କରିଛନ୍ତି। ମେଡ଼ିକାଲ୍ର ଜଣେ ଆଟେଣ୍ଟାଣ୍ଡ ତାଙ୍କଠାରୁ ୨୦୦ ଟଙ୍କା ନେଉଥିବା ଭିଡିଓରେ ଜଣା ପଡ଼ିଛି। ତେବେ ସେ ଅଭିଯୋଗ କରିଥିବା ୫ ହଜାର ଟଙ୍କା କିଏ କିଏ ନେଇଛନ୍ତି ସେ ଦିଗରେ ତଦନ୍ତ କରାଯିବ ବୋଲି ସେ କହିଥିଲେ। ପ୍ରକାଶ ଯେ, ଗତବର୍ଷ ସେପ୍ଟେମ୍ବର ମାସରେ ଜିଲା ମୁଖ୍ୟ ଚିକିତ୍ସାଳୟର ଜଣେ ନର୍ସ ରୋଗୀଙ୍କ ସର୍ମ୍ପକୀୟଙ୍କଠାରୁ ଟଙ୍କା ଦାବି କରିଥିବା ଭିଡି଼ଓ ଭାଇରାଲ୍ ହୋଇଥିଲା।
