ବାଲେଶ୍ୱରଅଫିସ୍, ୨୭।୯-ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟ ପରିସରରେ ରୋଗୀଙ୍କୁ ନିର୍ଦ୍ଦିଷ୍ଟ ନର୍ସିଂହୋମ୍ରେ ପହଞ୍ଚାଇବା, କ୍ଲିନିକ୍ରେ ଡାକ୍ତରମାନଙ୍କ ନିକଟରେ ପହଞ୍ଚାଇବା ଏବଂ ନିର୍ଦ୍ଦିଷ୍ଟ ମେଡିଶିନ୍ ଦୋକାନରେ ପହଞ୍ଚାଇ ରୋଗୀଙ୍କୁ ଶୋଷଣ କରାଯାଉଥିବା ଅଭିଯୋଗ ହୋଇଆସୁଥିଲା। ଅଭିଯୋଗକୁ ଭିତ୍ତି କରି ଗୁରୁବାର ସନ୍ଧ୍ୟାରେ ଟାଉନ ଥାନା ପୋଲିସ ୩ଜଣ ଦଲାଲଙ୍କୁ ଗିରଫ କରିଛି। ସେମାନେ ହେଲେ ଟାଉନ ଥାନା ଅଧୀନ ଗୋପାଳଗାଁର ଆମ୍ବୁଲାନ୍ସ ଡ୍ରାଇଭର ରାଜୀବ ମହାପାତ୍ର (୨୯), ସଦର ଥାନା ଫୁଲାଡ଼ି ନାୟକସାହିର ଆମ୍ବୁଲାନ୍ସ ଡ୍ରାଇଭର ସୁଧାଂଶୁ ଶେଖର ନାୟକ (୩୩) ଏବଂ ନୀଳଗିରି ଥାନା ତେଲିଆପଦା ଅଞ୍ଚଳର ମେଡ଼ିସିନ୍ ରିପ୍ରେଜେଣ୍ଟଟିଭ୍ ଦିଲୀପ କୁମାର ବାରିକ (୩୬)। ଉକ୍ତ ବ୍ୟକ୍ତିମାନେ କେଉଁ କେଉଁ ଡାକ୍ତର, କେଉଁ କ୍ଲିନିକ୍ ଏବଂ କେଉଁ ପାଥୋଲୋଜି ପାଇଁ କାମ କରୁଥିଲେ ଏବଂ କେଉଁମାନେ ଏମାନଙ୍କ ସହ ସାମିଲ୍ ଅଛନ୍ତି ଏକଥାକୁ ନେଇ ପୋଲିସ ତଦନ୍ତ କରୁଛି। ଏନେଇ ଟାଉନ୍ ଥାନାଧିକାରିଣୀ ସରୋଜିନୀ ନାୟକ କହିଛନ୍ତି, ଏହି ଖବର ପୂର୍ବରୁ ଆମ ପାଖରେ ପହଞ୍ଚିଥିଲେ ମଧ୍ୟ କୌଣସି ଲିଖିତ ଅଭିଯୋଗ ନ ଥିବାରୁ କାର୍ଯ୍ୟାନୁଷ୍ଠାନ ଗ୍ରହଣ କରିବା ସମ୍ଭବ ହୋଇପାରୁ ନ ଥିଲା। ଗୁରୁବାର ହସ୍ପିଟାଲ କର୍ତ୍ତୃପକ୍ଷ ଏଭଳି କାର୍ଯ୍ୟକୁ ବିରୋଧ କରି ଲିଖିତ ଅଭିଯୋଗ ଦେବାରୁ ୩ଜଣଙ୍କୁ ଗିରଫ କରାଯାଇଛି। ଅଧିକ ତଦନ୍ତ ଜାରି ରହିଛି ବୋଲି ପ୍ରକାଶ କରିଥିଲେ।
