ଛେଣ୍ଡିପଦା,୧ା୮(ସ୍ବ.ପ୍ର) – ଅନୁଗୋଳ ଜିଲା ଛେଣ୍ଡିପଦା ବନାଞ୍ଚଳ କଙ୍କୁରପାଳ ଗ୍ରାମ ନିକଟସ୍ଥ ସଂରକ୍ଷିତ ଜଙ୍ଗଲରେ ବୁଧବାର ୪ଟି ହାତୀ ଚଳପ୍ରଚଳ କରୁଥିବା ଦେଖିବାକୁ ମିଳିଛି। ଏ ନେଇ ବନ ବିଭାଗ ପକ୍ଷରୁ ଜଙ୍ଗଲକୁ ନ ଯିବା ପାଇଁ ଗ୍ରାମବାସୀଙ୍କୁ ସଚେତନ କରାଯାଇଛି। ଦୀର୍ଘଦିନ ହେବ ଏହି ହାତୀପଲ ଆଖପାଖ ଅଞ୍ଚଳରେ ଥିବା ବିଭିନ୍ନ ପନିପରିବା ଫସଲ, କଦଳୀ ଗଛ ନଷ୍ଟ କରୁଥିବା କ୍ଷତିଗ୍ରସ୍ତ ଚାଷୀମାନେ ଅଭିଯୋଗ କରିଛନ୍ତି। ଏହି ହାତୀପଲ ଚାଙ୍ଗୁଡିଆ, ବଡବେରେଣା, କଙ୍କୁରପାଳ, ଡାହିବର, ବାହାଳସାହି, କମ୍ପସଲା, ଛେଣ୍ଡିପଦା, କରଡାବାହାଳ ଆଦି ଅଞ୍ଚଳରେ ବିଚରଣ କରୁଛନ୍ତି। ଫଳରେ ସା ହେଲେ ଗ୍ରାମବାସୀ ଛେଣ୍ଡିପଦା ସଦରମହକୁମାରୁ ଘରକୁ ଫେରିବା ପାଇଁ ଭୟ କରୁଛନ୍ତି। ଦୀର୍ଘଦିନ ହେବ ବିଳମ୍ବିତ ରାତିରେ ହାତୀ ଉପଦ୍ରବ ଲାଗି ରହିଥିବା ଯୋଗୁ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏ ନେଇ ବନାଞ୍ଚଳ ଅଧିକାରୀ ଦୁର୍ଗାଚରଣ ସାହୁ କହିଛନ୍ତି, ହାତୀପଲ ଉପସ୍ଥିତିକୁ ନେଇ ବିଭାଗ ପକ୍ଷରୁ ପ୍ରତିଦିନ ସାରେ ଜଙ୍ଗଲ ନିକଟବର୍ତ୍ତୀ ଗ୍ରାମର ଜନସାଧାରଣଙ୍କୁ ଯାତାୟାତ ସମୟରେ ସତର୍କତା ଅବଲମ୍ବନ କରିବା ପାଇଁ ଡାକବାଜି ଯନ୍ତ୍ର ସାହାଯ୍ୟରେ ସୂଚନା ଦିଆଯାଉଛି। ଏହାସହ ହାତୀପଲଙ୍କ ଗତିବିଧି ଉପରେ ନଜର ରଖିବା ପାଇଁ ହାତୀସ୍କ୍ବାଡଙ୍କୁ ନିୟୋଜିତ କରାଯାଇଛି। ତୁରନ୍ତ କ୍ଷୟକ୍ଷତି ଆକଳନ କରାଯାଇ କ୍ଷତିପୂରଣ ଯୋଗାଇ ଦେବା ପାଇଁ ଚାଷୀମାନେ ଦାବି କରିଛନ୍ତି।
