ଚାକିରି ବୟସ ସୀମା ୪୪ ବର୍ଷକୁ ବୃଦ୍ଧି ଦାବି
7:42 amSeptember 4, 2019 / 21

ଫୁଲବାଣୀ ଅଫିସ, ୪ା୯-ଦୀର୍ଘ ବର୍ଷଧରି ସରକାରୀ ଚାକିରିରେ ନିଯୁକ୍ତି ନିମନ୍ତେ ବୟସ ସୀମା ୩୨ବର୍ଷ ରହିଛି। ଏହାକୁ ୪୪ ବର୍ଷକୁ ବୃଦ୍ଧି କରିବାକୁ କନ୍ଧମାଳ ଜିଲା ବରିଷ୍ଠ ନାଗରିକ ସମାଜ ପକ୍ଷରୁ ଦାବି କରାଯାଇଛି। ରାଜ୍ୟରେ ବେକାରୀ, ବେରୋଜଗାରୀ ବଢ଼ିଚାଲିଛି। ଅନ୍ୟପକ୍ଷରେ ଖାଲି ପଡ଼ିଥିବା ପଦବୀ ପୂରଣ ଓ ନୂତନ ପଦବୀ ସୃଷ୍ଟି କରାଯାଉନାହିଁ। ଅନେକ ଯୁବତୀଯୁବକ ୩୨ବର୍ଷ ଅତିକ୍ରାନ୍ତ କରିସାରିଲେଣି। ବିଜେଡି ଓ ଭାଜପା ଶାସନରେ ବୟସ ସୀମା ବୃଦ୍ଧି ନେଇ ବିଭିନ୍ନ ସ୍ତରରୁ ବାରମ୍ବାର ଦାବି ହୋଇ ଆସୁଛି। ଏ ନେଇ ବିଧାନସଭାରେ ବହୁବାର ଆଲୋଚନା ହୋଇଛି। ପ୍ରାକ୍ତନ ଅର୍ଥମନ୍ତ୍ରୀ ଶଶୀ ଭୂଷଣ ବେହେରା ଏବଂ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ବୟସ ବୃଦ୍ଧି କରିବାକୁ ସରକାର ବିଚାର କରୁଛନ୍ତି ବୋଲି ପ୍ରତିଶ୍ରୁତି ଦେଇଛନ୍ତି। ନିକଟରେ ବିଧାନସଭାରେ ଶୂନ୍ୟକାଳରେ ବିରୋଧୀଦଳ ନେତା ପ୍ରଦୀପ୍ତ କୁମାର ନାଏକ ଏବଂ ତାରା ପ୍ରସାଦ ବାହିନୀପତି ସାଧାରଣବର୍ଗଙ୍କ ପାଇଁ ନିର୍ଦ୍ଧାରିତ ବୟସସୀମା ୩୨ବର୍ଷରୁ ୪୪ବର୍ଷକୁ ବୃଦ୍ଧି ପ୍ରସଙ୍ଗକୁ ଗୃହରେ ଉତ୍‌ଥାପନ କରିଥିଲେ। ଗୋଆରେ ୪୫, ଆସାମରେ ୪୪, ତେଲେଙ୍ଗାନାରେ ୪୪, ଆନ୍ଧ୍ରରେ ୪୨, ଉତ୍ତରପ୍ରଦେଶ, ରାଜସ୍ଥାନ, ପଶ୍ଚିମବଙ୍ଗ ଓ ମଧ୍ୟପ୍ରଦେଶରେ ସରକାରୀ ଚାକିରି ନିମନ୍ତେ ୪୦ ବର୍ଷ ବୟସ ସୀମା ରହିଛି ବୋଲି ଗୃହକୁ ଅବଗତ କରିଥିଲେ। ବୟସସୀମା ବୃଦ୍ଧି ଦ୍ୱାରା ଆଦିବାସୀ, ଦଳିତ ଓ ଓବିସି ମଧ୍ୟ ଉପକୃତ ହେବେ। ଉଭୟ ରାଜ୍ୟ ଓ କେନ୍ଦ୍ର ସରକାର ଏହାର ପୁନଃବିଚାର କରି ୪୪ବର୍ଷକୁ ବୟସୀମା ବୃଦ୍ଧି କରିବାକୁ କନ୍ଧମାଳ ଜିଲା ବରିଷ୍ଠ ନାଗରିକ ସମାଜ ଉପ ସଭାପତି ସୁରେଶ ପଟ୍ଟନାୟକ, ବିଶ୍ୱନାଥ ବଗର୍ତୀ, କାଶୀନାଥ ମହାରଣା, ବେଣୁ ପ୍ରଧାନ, ବିନୋଦିନୀ ପଟ୍ଟନାୟକ, ରଘୁନାଥ ଗୌଡ, ରମେଶ ପ୍ରଧାନ, ଗୋବିନ୍ଦ ଚନ୍ଦ୍ର ଘଟାଳ, କପ୍ତାନ ବଗର୍ତ୍ତୀ ପ୍ରମୁଖ ପ୍ରେସ୍‌ ବିଜ୍ଞପ୍ତିରେ ଦାବି କରଛନ୍ତି।