ନୂଆଦିଲ୍ଲୀ, ୧୯ା୬ (ପି.ଟି.)- ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରୁ ବର୍ତ୍ତମାନ ପାଇଁ ଚାଇନିଜ ସ୍ପନସରଶିପ୍କୁ ହଟାଯାଇପାରିବ ନାହିଁ। ଚୁକ୍ତି ମିଆଦ ଶେଷ ହେବା ପରେ ବିକଳ୍ପ ଚିନ୍ତା କରାଯାଇ ପାରେ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କୋଷାଧ୍ୟକ୍ଷ ଅରୁଣ ଧୁମଲ ପ୍ରକାଶ କରିଛନ୍ତି। ଭିଭୋ ବର୍ତ୍ତମାନ ଆଇପିଏଲର ଟାଇଟଲ ପ୍ରାୟୋଜକ ରହିଛି। ଚାଇନାର ଏହି କମ୍ପାନୀ ଯୋଗୁ ଭାରତକୁ ଆର୍ଥିକ ଫାଇଦା ମିଳୁଛି। ଚଳିତ ସପ୍ତାହ ପ୍ରଥମଭାଗରେ ସୀମାନ୍ତବର୍ତ୍ତୀ ଗଲଓ୍ବାନ ଉପତ୍ୟକାରେ ଦୁଇ ଦେଶର ସୈନ୍ୟଙ୍କ ମଧ୍ୟରେ ସଂଘର୍ଷ ପରେ ଦେଶରେ ଚାଇନା ବିରୋଧୀ ମନୋଭାବ ଦେଖାଦେଇଛି। ୪ ଦଶନ୍ଧି ପରେ ସୀମାନ୍ତ ଅଞ୍ଚଳରେ ଏଭଳି ଉତ୍ତେଜନା ପ୍ରଥମେ ଦେଖିବାକୁ ମିଳିଛି। ସଂଘର୍ଷରେ ଅତିକମ୍ରେ ୨୦ ଭାରତୀୟ ସୈନ୍ୟ ପ୍ରାଣ ହରାଇଛନ୍ତି। ଏହି କାରଣରୁ ଚାଇନା ଉତ୍ପାଦକୁ ବର୍ଜନ କରିବା ଲାଗି ଆହ୍ବାନ ଦିଆଯାଇଛି। କିନ୍ତୁ ଧୁମଲ ଯୁକ୍ତି କରିଛନ୍ତି ଚାଇନିଜ କମ୍ପାନୀଗୁଡ଼ିକ ଆଇପିଏଲ୍ ଭଳି ଭାରତୀୟ ଇଭେଣ୍ଟଗୁଡ଼ିକୁ ସ୍ପନସର କରୁଛନ୍ତି। ଏହାଦ୍ୱାରା ଦେଶର ସ୍ବାର୍ଥ ସାଧନ ହୋଇପାରୁଛି। ବିସିସିଆଇ ଭିଭୋଠାରୁ ବାର୍ଷିକ ୪୪୦ କୋଟି ଟଙ୍କା ପାଉଛି। ଏହି କମ୍ପାନୀ ସହିତ ୨୦୨୨ ପର୍ଯ୍ୟନ୍ତ ଚୁକ୍ତି ହୋଇଛି। ଜଣେ ଭାବାବେଗ ହୋଇପଡ଼ିଲେ ତାତ୍ତ୍ୱିକ ଦୃଷ୍ଟିକୋଣ ପ୍ରତି ଧ୍ୟାନ ଦେଇ ନ ଥାନ୍ତି। ଚାଇନା ଦୃଷ୍ଟିରୁ ଏକ ଚାଇନିଜ୍ କମ୍ପାନୀକୁ ସମର୍ଥନ କରିବା ଅବା ଭାରତର ସ୍ବାର୍ଥ ପାଇଁ ଏକ ଚାଇନିଜ କମ୍ପାନୀରୁ ସହାୟତା ନେବା ମଧ୍ୟରେ ପାର୍ଥକ୍ୟ ରହିଛି ବୋଲି ଧୂମଲ କରିଛନ୍ତି। ଆମେ ଚାଇନିଜ କମ୍ପାନୀଗୁଡ଼ିକୁ ସେମାନଙ୍କ ଉତ୍ପାଦ ଭାରତରେ ବିକ୍ରି କରିବା ଲାଗି ଅନୁମତି ଦେଇଛେ। ଭାରତୀୟ ଗ୍ରାହକମାନଙ୍କଠାରୁ ସେମାନେ ଯାହା ଆୟ କରୁଛନ୍ତି ସେଥିରୁ କିଛି ଅଂଶ ବିସିସିଆଇ(ବ୍ରାଣ୍ଡ୍ ପ୍ରମୋଶନ ଭାବେ)କୁ ଦେଉଛନ୍ତି। ବୋର୍ଡ ଏହି ଅର୍ଥରୁ ୪୨ ପ୍ରତିଶତ ଟିକସ ଆକାରରେ ଭାରତ ସରକାରଙ୍କୁ ଦେଉଛନ୍ତି ବୋଲି ସେ ଯୁକ୍ତି ଦର୍ଶାଇଛନ୍ତି। ଭିଭୋ ଭଳି ଓପୋ ମୋବାଇଲର ଚାହିଦା ରହିଛି। ଗତ ବର୍ଷ ସେପ୍ଟେମ୍ବର ପର୍ଯ୍ୟନ୍ତ ଏହି କମ୍ପାନୀ ଭାରତୀୟ କ୍ରିକେଟ ଦଳର ପ୍ରାୟୋଜକ ରହିଆସିଥିଲା। ପରେ ଏହି ଚାଇନିଜ କମ୍ପାନୀ ସ୍ଥାନରେ ବେଙ୍ଗାଲୁରୁସ୍ଥିତ ଏଜୁକେଶନାଲ ଟେକ୍ନୋଲୋଜି ବାଇଜୁସ୍ ପ୍ରାୟୋଜକ ହୋଇଛି। ଧୁମଲ ଏକଥା ମଧ୍ୟ କହିଛନ୍ତି ଯେ, ଚାଇନିଜ ସାମଗ୍ରୀ ଉପରେ କମ୍ ନିର୍ଭରଶୀଳ ହେବା ପାଇଁ ସେ ପ୍ରସ୍ତୁତ ଅଛନ୍ତି। କିନ୍ତୁ ଯେପର୍ଯ୍ୟନ୍ତ ଏହି କମ୍ପାନୀଗୁଡ଼ିକୁ ଭାରତରେ ବ୍ୟବସାୟ ପାଇଁ ଅନୁମତି ରହିଛି ଆଇପିଏଲ ଭଳି ଇଣ୍ଡିଆନ ବ୍ରାଣ୍ଡ୍ ଆଇପିଏଲ୍କୁ ସ୍ପନସର କଲେ କୌଣସି ଅସୁବିଧା ନାହିଁ।
