ରଣପୁର, ୩୦ା୯ (ସ୍ବ.ପ୍ର.): ନୟାଗଡ଼ ଜିଲା ରଣପୁର ଥାନା ପୋଲିସ ରବିବାର ଏକ ଗୋରୁ ବୋଝେଇ ଗାଡି ଜବତ କରିଛି। ରାତି ପ୍ରାୟ ୧୦ଟାରେ ଓଡି୨୫ଏଫ-୩୪୯୫ ନମ୍ବର ବିଶିଷ୍ଟ ଆଇଚର କଣ୍ଟେନର ଗାଡିକୁ ପୋଲିସ ଥାନା ଆଗରେ ଅଟକାଇ ତଲାସୀ ନେଇଥିଲା। ଏହି ସମୟରେ ସେଥିରେ ୪୦ରୁ ଊର୍ଦ୍ଧ୍ୱ ଗୋରୁ ଥିବା ଦେଖି ପୋଲିସ ଗାଡ଼ିଟିକୁ ଥାନା ପରିସରକୁ ନେଇଥିଲା। ଗାଡିରେ ଥିବା ଡ୍ରାଇଭର ଓ ଅନ୍ୟ ଜଣଙ୍କୁ ପୋଲିସ ଅଟକ ରଖି ପଚାରାଉଚୁରା କରୁଛି। ଗାଡିଟି ଏହି ଥାନାର ଗଡମାଣିତିରି ଅଞ୍ଚଳରୁ ଗୋରୁ ବୋଝେଇ କରି ବାହାରକୁ ଚାଲାଣ କରିବାକୁ ଯାଉଥିବାବେଳେ ଧରାଯାଇଥିବା ପୋଲିସ କହିଛି। ଜବତ ହୋଇଥିବା ଗୋରୁଙ୍କୁ ଜଟଣୀ ନିକଟ ଗୋଶାଳାରେ ଛଡାଯାଇଥିବା ସୂଚନା ଦିଆଯାଇଛି। ବେଆଇନ ଭାବେ ଗୋରୁ ଚାଲାଣ ହେଉଥିବା ଖବର ପ୍ରଚାର ହେବା ପରେ ରଣପୁରରେ ଚାପା ଉତ୍ତେଜନା ପ୍ରକାଶ ପାଇଛି। ଖବର ଲେଖାହେବା ବେଳକୁ ଏ ସଂକ୍ରାନ୍ତରେ ଥାନାରେ କୌଣସି ମାମଲା ରୁଜୁ ହୋଇ ନାହିଁ। ସୂଚନାଯୋଗ୍ୟ ବାହାର ରାଜ୍ୟର ଗୋରୁ ବେପାରୀମାନେ ଗଡମାଣିତିରି, ବାମ୍ବଡା, ବାଣିକିଲୋ ଆଦି ଅଞ୍ଚଳରୁ ବେଆଇନ ଭାବେ ଗୋରୁ ଚାଲାଣ କରିଥାନ୍ତି। ବିଭିନ୍ନ ସମୟରେ ଗ୍ରାମବାସୀ ଗୋରୁ ବୋଝେଇ ଗାଡି ଜବତ କରି ପୋଲିସ ଜିମା ଦେଇଥିବା ନଜିର ରହିଛି।
