ଛତ୍ରପୁର,୪ା୫(ଡି.ଏନ୍.ଏ.) : ବାହାର ରାଜ୍ୟରୁ ବସ୍ ଓ ଟ୍ରେନ୍ରେ ଶତାଧିକ ପ୍ରବାସୀ ଓଡ଼ିଆ ଗଞ୍ଜାମ ଜିଲାକୁ ଫେରିବାରେ ଲାଗିଛନ୍ତି। ରବିବାର ଜିଲାର କେତେକ କ୍ୱାରାଣ୍ଟାଇନ୍ ସେଣ୍ଟରରେ ଥିବା ସୁରଟ ଫେରନ୍ତାମାନେ ବିଶୃଙ୍ଖଳା କରିଛନ୍ତି। ଏପରିକି ଆଉ କେତେକ କ୍ୱାରାଣ୍ଟାଇନ୍ କେନ୍ଦ୍ରରୁ ଚମ୍ପଟ ମାରିଥିବା ବେଳେ ଅନ୍ୟ କେତେକ ଖାଇବା ଫିଙ୍ଗିଛନ୍ତି। ଏନେଇ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଓ ପୋଲିସ ଡିଜି ପ୍ରତିକ୍ରିୟା ପ୍ରକାଶ କରି ବିଶୃଙ୍ଖଳାକାରୀଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ। ଏହାପରେ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଓ ଗଞ୍ଜାମ ଏସ୍ପି ବ୍ରିଜେଶ କୁମାର ରୟ ଏହା ଉପରେ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ଜିଲାପାଳ ଟୁଇଟ୍ କରି କହିଛନ୍ତି ଯେ, ସମସ୍ତ ଫେରନ୍ତା ପ୍ରବାସୀ ଶୃଙ୍ଖଳା ରକ୍ଷା କରନ୍ତୁ। ଆମେ ସବୁ ସୁବିଧା ଦେବା ପାଇଁ କଠିନ ପରିଶ୍ରମ କରୁଛୁ । ଓଡ଼ିଆ ଲୋକେ ଆଇନକୁ ସମ୍ମାନ ଦେଇଥାନ୍ତି। ସରକାରଙ୍କ ନିୟମକୁ ମାନନ୍ତୁ। ଯଦି କେହି ଆଇନ ଉଲ୍ଲଂଘନ କଲେ ତେବେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ଗଞ୍ଜାମ ଏସ୍ପି ଟୁଇଟ୍ କରି କହିଛନ୍ତି, ଜିଲାକୁ ଫେରନ୍ତା ସରକାରଙ୍କ କୋଭିଡ-୧୯ ଗାଇଡ୍ଲାଇନ୍ ଅନୁଯାୟୀ କ୍ୱାରାଣ୍ଟାଇନ୍ ନିୟମ ଉଲ୍ଲଂଘନ କଲେ କାର୍ଯ୍ୟାନୁଷ୍ଠାନ ନିଆଯିବ।
