କୋଲକାତା,୨ା୩: ମହାମାରୀ କରୋନା ସଂକ୍ରମଣ ରୋକିବାରେ ନିମ ଗଛ ଛେଲିର ରସ ସହାୟକ ହେବ। କୋଲକାତାସ୍ଥିତ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ ଅଫ୍ ସାଇନ୍ସ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଆଇଏସ୍ଇଆର୍) ଗବେଷଣାରେ ଏହା କୁହାଯାଇଛି। ନିମର ଔଷଧୀୟ ଗୁଣ ପାଇଁ ଶହ ଶହ ବର୍ଷ ଧରି ଏହାକୁ ବିଭିନ୍ନ ରୋଗ ଭଲ କରିବାରେ ବ୍ୟବହାର କରାଯାଉଛି। କୋଭିଡ୍ ବ୍ୟତୀତ ମ୍ୟାଲେରିଆ, ପେଟ କାଟିବା, ଅଲସର ଏବଂ ଚର୍ମଜନିତ ବହୁ ରୋଗ ଭଲ କରିବା ପାଇଁ ନିମଛେଲିକୁ ବହୁଳମାତ୍ରାରେ ବ୍ୟବହାର କରାଯାଏ। ନିମ ଛେଲି ରସର ବ୍ୟବହାର ଦ୍ୱାରା କରୋନା ଜନିତ ଗୁରୁତର ସମସ୍ୟାକୁ ସହଜରେ ଏଡାଇହେବ ବୋଲି ଗବେଷଣା କରୁଥିବା ଆମେରିକା ୟୁନିଭରସିଟି ଅଫ୍ କୋଲରାଡୋ ସ୍କୁଲ ଅଫ ମେଡିସିନର ପ୍ରଫେସର ମାରିଆ ନଗେଲ କହିଛନ୍ତି। ବର୍ତ୍ତମାନ ସୁଦ୍ଧା କରୋନାକୁ ସମ୍ପୂର୍ଣ୍ଣ ଭାବେ ଭଲ କରିବା ପାଇଁ କୌଣସି ନିର୍ଦ୍ଦିଷ୍ଟ ଔଷଧ ବୈଜ୍ଞାନିକମାନେ ବାହାର କରି ନ ଥିବାବେଳେ ମହାମାରୀ ସଂକ୍ରମଣରୁ ନିମରେ ତିଆରି ଔଷଧ ସହାୟକ ହେବ ବୋଲି ସେ କହିଛନ୍ତି।
