ବାଲିଗୁଡ଼ା,୪ା୬(ଡି.ଏନ୍.ଏ.)-ସରକାରଙ୍କ ନିର୍ଦ୍ଦେଶକୁ ଫୁ କରି ବାଲିଗୁଡ଼ା ବ୍ଲକର ବିଭିନ୍ନ ସ୍ଥାନରେ ଶିଶୁ ଶ୍ରମିକ ନିୟୋଜନ ଚାଲିଛି। କୋମଳମତି ପାଠ ପଢ଼ୁଆ ପିଲାଙ୍କୁ ଟଙ୍କା ଲୋଭ ଦେଖାଇ କାମରେ ନିୟୋଜିତ କରାଯାଉଛି। ପ୍ରଶାସନ ଆଢ଼ୁଆଳରେ ଏଭଳି କାମ ଚାଲିଛି। କିଛି ଦିନ ତଳେ ବାରଖମା ପଞ୍ଚାୟତ ବିରାଗୁଡ଼ା ଏବଂ ଲଣ୍ଡାଗଁା ପଞ୍ଚାୟତ ଘୋଡ଼ାବାଲି କେନ୍ଦୁପତ୍ର ଫଡ଼ିରେ ଶିଶୁ ଶ୍ରମିକ ନିୟୋଜିତ ହୋଇଥିବା ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା। ପୁଣି ଏଭଳି ଏକ ଘଟଣା ସାମନାକୁ ଆସିଛି। ବ୍ଲକ ଅନ୍ତର୍ଗତ ଲଣ୍ଡାଗଁା ପଞ୍ଚାୟତ ଚାଙ୍ଗୁରବାଲି କେନ୍ଦୁପତ୍ର ଫଡ଼ିରେ ଅଞ୍ଚଳର ପାଠ ପଢ଼ୁଆ ଛୋଟ ପିଲାଙ୍କୁ କାମରେ ନିୟୋଜିତ କରାଯାଇଛି। ପିଲାଙ୍କୁ ପାରିଶ୍ରମିକ ବାବଦ ଦୈନିକ ୫୦ରୁ ୧୦୦ଟଙ୍କା ପର୍ଯ୍ୟନ୍ତ ଦେଇ ଅର୍ଥ ଆତ୍ମସାତ କରିବାକୁ ପ୍ରୟାସ ଚଳାଇଛନ୍ତିି ଜଣେ ସରକାରୀ ବାବୁ । ବାରମ୍ବାର ଏଭଳି ଘଟଣା ସାମନାକୁ ଆସୁଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବାରୁ ସମଗ୍ର ଅଞ୍ଚଳରେ ଏହା ଆଲୋଚ୍ୟର ବିଷୟ ହୋଇଛି। ଏ ସମ୍ପର୍କରେ କେନ୍ଦୁପତ୍ର ବିଭାଗର ବାଲିଗୁଡ଼ା ରେଞ୍ଜରଙ୍କ ପ୍ରତିକ୍ରିୟା ନେବା ପାଇଁ ବାରମ୍ବାର ଚେଷ୍ଟା କରାଯାଇଥିଲେ ମଧ୍ୟ ଯୋଗାଯୋଗ ସମ୍ଭବ ହୋଇ ନ ଥିଲା। ଅନ୍ୟପକ୍ଷରେ ଫଡ଼ି କାର୍ଯ୍ୟର ଦାୟିତ୍ୱରେ ଥିବା ମୁନ୍ସି ବିଶ୍ୱାମିତ୍ର ପାତ୍ର କହିଛନ୍ତି, ପିଲାମାନେ ଏଠାରେ ଖୁସିରେ ଆସି କାମ କରିଯାଉଛନ୍ତି। ଚାଇଲ୍ଡ ଲାଇନ୍ର କନ୍ଧମାଳ ନିର୍ଦ୍ଦେଶକ ରବୀନ୍ଦ୍ର କୁମାର ପଣ୍ଡାଙ୍କୁ ପଚାରିବାରୁ ସେ ଏଭଳି ଘଟଣାକୁ ତୀବ୍ର ନିନ୍ଦା କରିବା ସହ ଏହାର ତଦନ୍ତ କରି ପ୍ରଶାସନକୁ ଅବଗତ କରାଇବେ ବୋଲି କହିଥିଲେ। ପ୍ରଶାସନ ଏଥିପ୍ରତି ତୁରନ୍ତ ଦୃଷ୍ଟି ଦେଇ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।
