ଢେଙ୍କାନାଳ ଅଫିସ, ୨୭।୪- ‘ସକାଳୁ ଉଠିଲେ ସେହି ଗୋଟିଏ ଚିନ୍ତା, ଘରକୁ ପାଣି ଆସିବ କେମିତି। ଅନ୍ୟଦିନ କଥା ଅଲଗା, କିନ୍ତୁ ଖରାଦିନ ଆସିଲେ ଚଡ଼କ ପଡୁଛି। ମହିଳାମାନେ ଖଇଫୁଟା ଖରା, ଝାଞ୍ଜିମାଡ଼ ସହି ଦେଢ଼ କିଲୋମିଟର ଯାଇ ନାଳରୁ ପାଣି ଆଣୁଛନ୍ତି। ମଲେ କି ଗଲେ କିଏ ପଚାରିବାକୁ ନାହିଁ। ସମସ୍ତେ କହୁଛନ୍ତି ସମସ୍ୟା ସମାଧାନ କରିବେ, ହେଲେ କାହାରି ଦେଖାମିଳୁନି। ଖାଲି ଭାଗ୍ୟକୁ ନିନ୍ଦିବା କଥା’। ଏ ହେଉଛି ଢେଙ୍କାନାଳ ସଦର ବ୍ଲକ ଗୋବିନ୍ଦପୁର ପଞ୍ଚାୟତ କୁଶୁପଦା ଗ୍ରାମର ମୂଳିଆ ଦେହୁରୀଙ୍କ ମନର କ୍ଷୋଭ। ସଦର ବ୍ଲକଠାରୁ ମାତ୍ର ୭କିମି ଦୂରରେ ଥିବା ଏହି ଗ୍ରାମର ଦୁଃଖ ଉପାନ୍ତ ଆଦିବାସୀ ଅଞ୍ଚଳକୁ ବଳିଯାଇଥିବାବେଳେ ଏହାର ସମାଧାନ କରିବାକୁ ପ୍ରଶାସନକୁ ନେହୁରା ହୋଇଛନ୍ତି ଗ୍ରାମବାସୀ।
କୁଶୁପଦା ସମେତ ଏହାର ସନ୍ନିକଟ କାଉଚି, କୋହ୍ଲ ସାହି ଗ୍ରାମବାସୀ ମଧ୍ୟ ସମାନ ସମସ୍ୟା ଭୋଗୁଛନ୍ତି। ଅଞ୍ଚଳର ଲୋକସଂଖ୍ୟା ୧୦୦୦ରୁ ଊର୍ଦ୍ଧ୍ୱ। ଖରାଦିନ ଆସିଲେ କୂଅ ପୋଖରୀ ଶୁଖିଯାଉଛି। ଗଁାଠାରୁ ଦେଢ଼ କିମି ଦୂରରେ ପ୍ରବାହିତ ନାଳପାଣି ପାନୀୟ ଜଳର ଏକମାତ୍ର ମାଧ୍ୟମ। ସେହିପରି ଗୋବିନ୍ଦପୁର ପଞ୍ଚାୟତରୁ ଗ୍ରାମକୁ ଯିବା ପାଇଁ ଏକ ସଂକୀର୍ଣ୍ଣ ନାଳ ପ୍ରତିବନ୍ଧକ ପାଲଟିଛି। ବର୍ଷାଦିନେ ଯାତାୟାତ ପାଇଁ ଗ୍ରାମବାସୀ ନାଳ ଉପରେ କାଠପୋଲ ତିଆରି କରିଥାନ୍ତି। ଉକ୍ତ କାଠପୋଲ ଦେଇ ବିପଦସଙ୍କୁଳ ଭାବେ ରୋଗୀଙ୍କୁ ଡାକ୍ତରଖାନା ଅଣାଯାଇଥାଏ। ଜରୁରିକାଳୀନ ସମୟରେ ଗ୍ରାମକୁ ଆମ୍ବଲାନ୍ସ କିମ୍ବା ଦମକଳ ପହଞ୍ଚତ୍ ପାରେନାହିଁ। ବାରମ୍ବାର ଦାବି ପରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ନାଳ ଉପରେ ବ୍ରିଜ୍ ନିର୍ମାଣ କାମ ଆରମ୍ଭ ହୋଇଛି। ତେବେ ଆପ୍ରୋଚ୍ ରୋଡ ନିମନ୍ତେ ଜମି ଅଧିଗ୍ରହଣ ହୋଇପାରୁ ନ ଥିବାରୁ ବ୍ରିଜ୍ କାମ ଅଟକି ରହିଛି। ଜିଲା ସଦରରୁ ମାତ୍ର ୭କିମି ଦୂର ଏବଂ ୫୫ନଂ. ଜାତୀୟ ରାଜପଥରୁ ୩କିମି ଦୂରରେ ଥିବା ସତ୍ତ୍ୱେ ଗ୍ରାମବାସୀ ଅଭିଶପ୍ତ ଜୀବନ ଜିଉଁଥିବା ଅଭିଯୋଗ କରିଛନ୍ତି।
ଏ ସଂକ୍ରାନ୍ତରେ ଅତିରିକ୍ତ ବିଡିଓ ଝାଡେଶ୍ୱର ଦାସ କୁହନ୍ତି, ପାନୀୟ ଜଳ ସମସ୍ୟା ସମ୍ପର୍କରେ ଅନୁଧ୍ୟାନ କରି ପଦକ୍ଷେପ ନିଆଯିବ। ବ୍ରିଜ୍ ନିର୍ମାଣ କାମ ଆର୍ଡି ବିଭାଗ କରୁଛି। ଏ ନେଇ ରହିଥିବା ସମସ୍ୟା ସମ୍ପର୍କରେ ବିଭାଗୀୟ ଅଧିକାରୀ କହିପାରିବେ ବୋଲି ସେ କହିଥିଲେ। ଏ ନେଇ ଗ୍ରାମ୍ୟ ଉନ୍ନୟନ ଓ ପରିମଳ ବିଭାଗ ନିର୍ବାହୀଯନ୍ତ୍ରୀ ବିଜୟାନନ୍ଦ ସାହୁ କୁହନ୍ତି, ଖରାଦିନେ ଯାହା ବିକଳ୍ପ ବ୍ୟବସ୍ଥା ହୋଇପାରିବ ସେ ନେଇ ଅନୁଧ୍ୟାନ କରାଯାଉଛି। ଖୁବ୍ଶୀଘ୍ର ପ୍ରତିକାର ବ୍ୟବସ୍ଥା ଗ୍ରହଣ କରାଯିବ ବୋଲି ସେ କହିଛନ୍ତି।
