ତରଭା,୫।୪(ଡ଼ି ଏନ ଏ.): ସୁବର୍ଣ୍ଣପୁର ଜିଲା ତରଭା ଥାନା ମାନହୀରା ଗାଁରେ ଅଚିହ୍ନା ବିବାହିତ ମହିଳାଙ୍କୁ ହତ୍ୟା ଘଟଣାର ପର୍ଦାଫାସ ହୋଇଛି। ମହିଳାଙ୍କ ପରିଚୟ ମିଳିବା ସହ ରବିବାର ଅଭିଯୁକ୍ତ ତରଭା ଥାନା ପଦ୍ମପୁର ଗାଁର ସନ୍ତୋଷ କୁମାର ଦାସଙ୍କୁ ଗିରଫ କରାଯାଇଛି । ସନ୍ତୋଷଙ୍କୁ ପୋଲିସ କୋର୍ଟ ଚାଲାଣ କରିଛି। ଗତ ୨୬ ତାରିଖରେ ମାନହୀରା ଗାଁର ଦେବରାଜ ସେଠଙ୍କ କୂଅ ଭିତରୁ ମହିଳାଙ୍କ ଗଳିତ ମୃତଦେହ ଉଦ୍ଧାର ହୋଇଥିଲା। ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଥିଲା। ପରେ ମହିଳାଙ୍କ ଆଧାର କାର୍ଡ ଓ ଭୋଟର ପରିଚୟ ପତ୍ରରୁ ତାଙ୍କ ନାମ ଫିଲୋମିନା ଖଡ଼ିଆ ଘର ଦେବଗଡ ଜିଲା ଡାଲକବହଲ ବୋଲି ଜଣାପଡିଥିଲା। ବ୍ୟବଚ୍ଛେଦ ପରେ ପୋଲିସ ମୃତଦେହକୁ ୨୯ତାରିଖରେ ମହିଳାଙ୍କ ସ୍ୱାମୀଙ୍କୁ ହସ୍ତାନ୍ତର କରିଥିଲା। ତେବେ ମହିଳାଙ୍କ ଜବତ ମୋବାଇଲରୁ ହତ୍ୟାକାଣ୍ଡ ସମ୍ପର୍କରେ ପୋଲିସକୁ ସୁରାଗ ମିଳିଥିଲା ବୋଲି ଏସପି ଦେବୀପ୍ରସାଦ ଦାଶ ତାରଭରେ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଏସପି ଦଶ କହିଥିଲେ ସମ୍ପୃକ୍ତ ମହିଳା ପଦ୍ମପୁରର ସନ୍ତୋଷଙ୍କୁ ସହିତ ବାରମ୍ବାର ଫୋନରେ କଥା ହେଉଥିଲେ। ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ସୃଷ୍ଟି ହୋଇଥିଲା। ସନ୍ତୋଷ ବିବାହିତ ହୋଇଥିଲେ ହେଁ ମହିଳାଙ୍କୁ ବିବାହର ପ୍ରତିଶୃତି ଦେଇଥିଲେ। ୧୯ ତାରିଖରେ ଫିଲୋମିନା ବଲାଙ୍ଗୀରରେ ପହଞ୍ଚିଥିଲେ । ପରେ ସେ ତରଭା ମାନହୀରା ଗାଁକୁ ଆସିଥିଲେ। ସନ୍ତୋଷ ଭୟରେ ଫିଲୋମିନାଙ୍କୁ କୂଅ ଭିତରକୁ ଠେଲି ହତ୍ୟା କରିଥିବା ସ୍ୱୀକାର କରିଛନ୍ତି। ମହିଳାଙ୍କ ବ୍ୟାଗରୁ ୨ଟି ମୋବାଇଲ ଓ ବ୍ୟାଗରୁ ନଗଦ ୧୫୭୮୦ଟଙ୍କା ଜବତ ହୋଇଛି। ଖବରଦାତା ସମ୍ମିଳନୀରେ ତରଭା ଆଇଆଇସି ଡୋଳାମଣି ଭୋଇ ଓ ତଦନ୍ତକାରୀ ଅଧିକାରୀ ପି.ବେହେରା ଉପସ୍ଥିତ ଥିଲେ।
