କରୋନା ଏକ ଆର୍ଏନ୍ଏ ଭୂତାଣୁ, ଏଚ୍ଆଇଭି ଭଳି। ଏହିପରି ଭୂତାଣୁ ଶରୀରର ପ୍ରତିରୋଧକ ଶକ୍ତିକୁ ଅକାମୀ କରି କାୟା ବିସ୍ତାର କରେ ଓ ମଣିଷର ଶ୍ୱାସକ୍ରିୟାକୁ କବଳିତ କରିଥାଏ। ବର୍ତ୍ତମାନର କରୋନାକୁ ନୋଭେଲ ବା ନୂତନ କରୋନା ଭୂତାଣୁ ଆଖ୍ୟା ଦିଆଯାଇଛି; ଯାହାକି ଏସ୍-୧ ପୁଷ୍ଟିସାରର ପରିବର୍ତ୍ତନ। ଏହାକୁ କୋଭିଡ଼-୧୯ (COVID-19) ମଧ୍ୟ କୁହାଯାଇଛି ଯାହାର ପୂରା ନାମ ହେଲା କରୋନା ଭାଇରସ୍ ଇମ୍ୟୁନୋ ଡେଫିସିଏନ୍ସି-୧୯। ୨୦୧୨ରେ ପୂର୍ବ କରୋନା ଭୂତାଣୁ (SARS, MERS)ରେ ବି ଏହିପରି ଲକ୍ଷଣ ପ୍ରକାଶ ପାଇଥିଲା। ଏବର କରୋନା ଭୂତାଣୁ ବିବର୍ତ୍ତନରେ ଅଲଗା ପ୍ରକାରର ଓ ପୂର୍ବଠାରୁ ଭୟଙ୍କର। ଏହାର ଆକାର ସୂର୍ଯ୍ୟମୁଖୀ ଫୁଲର ପାଖୁଡ଼ା ପରି ହୋଇଥାଏ, ଯାହା ତନ୍ତୁକୁ ଜାବୁଡ଼ିଧରି କାୟାବିସ୍ତାର ପାଇଁ ସାହାଯ୍ୟ କରେ। ତେଣୁ କୁହାଯାଉଛି ସାବୁନ କିମ୍ବା ଅନ୍ୟ ଆଲକହଲ୍ଯୁକ୍ତ ପଦାର୍ଥରେ ହାତ ଧୋଇଲେ, ଏହି ପାଖୁଡ଼ାଭଳି ଅଂଶ ଅଲଗା ହୋଇଯାଏ ଏବଂ ହାତରୁ ଝାଳ କିମ୍ବା ତୈଳାକ୍ତ ଅଂଶ ଦୂର ହୋଇଯାଏ ଯାହାଦ୍ୱାରା ଭୂତାଣୁ କାୟାବିସ୍ତାର ପାଇଁ ସମୟ ପାଏ ନାହିଁ। ନଚେତ୍ ଝାଳ କିମ୍ବା ତୈଳାକ୍ତ ପଦାର୍ଥ ଯୋଗୁ ଏହା ଏକାଠି ହୋଇ ଏହାର କରାଳ ରୂପ ଦେଖାଏ।
ଭାରତର ଆୟୁଃ ଅନୁସନ୍ଧାନ ସଂସ୍ଥା (ICMR) ଜଣାଇଛନ୍ତି ଯେ, ଭାରତରେ ଏହା ହେଉଛି ଦ୍ୱିତୀୟ ପର୍ଯ୍ୟାୟ। ଯାହାର ଅର୍ଥ କିଛି ସଂକ୍ରମିତ ବ୍ୟକ୍ତି ବାହାରୁ ଆସିବା ପରେ ସଂକ୍ରମଣ ବ୍ୟାପିଛି (ନାଗରିକ ଓ ଅଣନାଗରିକ)। ତେଣୁ ଭୟାବହ ତୃତୀୟ ଓ ଚତୁର୍ଥ ପର୍ଯ୍ୟାୟ ରୋକି ହୋଇଗଲେ କରୋନା ପ୍ରଭାବ କମିଯିବ। ଏହାର ଫଳପ୍ରଦ ଚିକିତ୍ସା ଆବିଷ୍କୃତ ହୋଇନାହିଁ। ପ୍ର୍ତିଷେଧକ ବ୍ୟବସ୍ଥା ଯଦିଓ ଆରମ୍ଭ ହେଲାଣି (ଆମେରିକା, ଚାଇନା, ଜର୍ମାନୀରେ), ତାହା କେତେ ଫଳପ୍ରଦ ହେବ ଓ କ୍ଷଣସ୍ଥାୟୀ କିମ୍ବା ଦୀର୍ଘସ୍ଥାୟୀ ତାହା ଭବିଷ୍ୟତ କହିବ। ଯଦିଓ ବିଶ୍ୱ ସ୍ବାସ୍ଥ୍ୟ ସଂସ୍ଥା ଏହାକୁ ବିଶ୍ୱ ମହାମାରୀ ଘୋଷଣା କରିଛନ୍ତି; ଏହାର ପ୍ରତିଷେଧକ ପ୍ରସ୍ତୁତକାରୀ ଦେଶ ତାଙ୍କ ଦେଶ ପାଇଁ ଗଚ୍ଛିତ ରଖିବେ ବା ଏହାକୁ ବୌଦ୍ଧିକ ସମ୍ପତ୍ତି ଭାବି ସମସ୍ତଙ୍କ ଉଦ୍ଦେଶ୍ୟରେ ସମର୍ପିତ କରିବେ ତାହା ମଧ୍ୟ ଆଲୋଚନା ହେଲାଣି।
ବହୁତ ସଂସ୍ଥା ଆକଳନ କରୁଛନ୍ତି, କରୋନା ଯୋଗୁ ବଡ଼ ଆର୍ଥିକ ବିପର୍ଯ୍ୟୟ ଆସିପାରେ, କିନ୍ତୁ ଆମେ ଯଦି ଏହାକୁ ଦ୍ୱିତୀୟ ପର୍ଯ୍ୟାୟରେ ବନ୍ଦ କରିପାରିବା, ତେବେ ଆର୍ଥିକ ବିପର୍ଯ୍ୟୟ ସ୍ବଳ୍ପକାଳସ୍ଥାୟୀ ହେବ ଓ ରୋଗର ପ୍ରାଦୁର୍ଭାବ ଶୀଘ୍ର କମିଯିବ। ତେଣୁ ସରକାର ଓ ଅନ୍ୟ ସଂସ୍ଥା ସତର୍କ ରହିବା ପାଇଁ ଯେଉଁସବୁ ପ୍ରସ୍ତାବ ପ୍ରତିଦିନ ଲୋକଙ୍କୁ ଅବଗତ କରାଉଛନ୍ତି, ତାକୁ ସୁନାଗରିକ ଭାବେ ପାଳନ କଲେ ଓ ବିଶେଷତଃ ସ୍ବଚ୍ଛତା ଓ ସାମାଜିକ ଦୂରତା ବଜାୟ ରଖିଲେ, ଆମେ ଏ ବିପଦକୁ ଟାଳିପାରିବା।
ଜଗନ୍ନାଥ ମିଶ୍ର
ଭିଆଇଏମ୍-୭୭୮, ଶୈଳଶ୍ରୀବିହାର, ଭୁବନେଶ୍ୱର,
ଫୋନ୍-୦୭୭୪-୨୭୪୩୮୦୪
