ନୂଆଦିଲ୍ଲୀ,୨୮।୯: ସୁପ୍ରିମକୋର୍ଟ ସୋମବାର ନିର୍ବାଚନ କମିଶନଙ୍କୁ ଏକ ବଡ଼ ନିର୍ଦ୍ଦେଶ ଦେଇଛନ୍ତି। ତୃଣମୂଳ କଂଗ୍ରେସ (TMC)ର ଦୁଇ ବିରୋଧୀ ଗୋଷ୍ଠୀ ମଧ୍ୟରେ ‘ଅଲ ଇଣ୍ଡିଆ ତୃଣମୂଳ କଂଗ୍ରେସ’ ନାମ ଏବଂ ‘ଫୁଲ ଓ ଘାସ’ ନିର୍ବାଚନୀ ଚିହ୍ନକୁ ନେଇ ଚାଲିଥିବା ବିବାଦର ସମାଧାନ ପାଇଁ ସର୍ବୋଚ୍ଚ ଅଦାଲତ ସମୟସୀମା ଧାର୍ଯ୍ୟ କରିଛନ୍ତି।
କୋର୍ଟ ନିର୍ବାଚନ କମିଶନଙ୍କୁ ଏହି ବିବାଦରେ ୩ ମାସ ମଧ୍ୟରେ ନିଷ୍ପତ୍ତି ନେବାକୁ ନିର୍ଦ୍ଦେଶ ଦେଇଛନ୍ତି। ଏଥିସହ ଉଭୟ ବିରୋଧୀ ଗୋଷ୍ଠୀଙ୍କୁ ନିର୍ବାଚନ କମିଶନଙ୍କ ନିକଟରେ ଚାଲିଥିବା ଶୁଣାଣିରେ ଆସନ୍ତା ୪ ସପ୍ତାହ ମଧ୍ୟରେ ନିଜ ନିଜ ଯୁକ୍ତି ଉପସ୍ଥାପନ କରିବାକୁ କୁହାଯାଇଛି।
ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ଜଷ୍ଟିସ ଜୟମାଲ୍ୟ ବାଗଚୀ ଏବଂ ଜଷ୍ଟିସ ଭି. ମୋହନାଙ୍କ ଖଣ୍ଡପୀଠ କହିଛନ୍ତି ଯେ, ଉଭୟ ପକ୍ଷର ଯୁକ୍ତି ଶେଷ ହେବାର ୩ ମାସ ମଧ୍ୟରେ ନିର୍ବାଚନ କମିଶନ ଏହି ମାମଲାରେ ନିଷ୍ପତ୍ତି ନେବେ।
ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଆବେଦନର ଶୁଣାଣି କରି ସୁପ୍ରିମକୋର୍ଟ ଏହି ନିର୍ଦ୍ଦେଶ ଦେଇଛନ୍ତି। ନିର୍ବାଚନ କମିଶନ ପକ୍ଷରୁ TMCର ନାମ ଏବଂ ଦଳର ନିର୍ବାଚନୀ ଚିହ୍ନକୁ ଫ୍ରିଜ କରାଯାଇଥିବା ନିଷ୍ପତ୍ତିକୁ ଚ୍ୟାଲେଞ୍ଜ କରି ମମତା ବାନାର୍ଜୀ ଏହି ଯାଚିକା ଦାଖଲ କରିଥିଲେ।
ବିବାଦରେ ଚୂଡ଼ାନ୍ତ ନିଷ୍ପତ୍ତି ନ ଆସିବା ପର୍ଯ୍ୟନ୍ତ ଉଭୟ ଗୋଷ୍ଠୀକୁ ‘ଅଲ ଇଣ୍ଡିଆ ତୃଣମୂଳ କଂଗ୍ରେସ’ ନାମ ଏବଂ ଦଳର ସଂରକ୍ଷିତ ନିର୍ବାଚନୀ ଚିହ୍ନ ବ୍ୟବହାର କରିବାରୁ ରୋକିବାକୁ ନିର୍ବାଚନ କମିଶନ ଅନ୍ତରୀଣ ନିଷ୍ପତ୍ତି ନେଇଥିଲେ। ଏହାପରେ କମିଶନ ଉଭୟ ବିରୋଧୀ ଗୋଷ୍ଠୀକୁ ଅଲଗା ନାମ ଓ ନିର୍ବାଚନୀ ଚିହ୍ନ ପ୍ରଦାନ କରିଥିଲେ।
ନିଜ ଅନ୍ତରୀଣ ଆଦେଶରେ ନିର୍ବାଚନ କମିଶନ କହିଥିଲେ ଯେ, ବାନାର୍ଜୀ ଏବଂ ଅରୂପ ରାୟଙ୍କ ନେତୃତ୍ୱାଧୀନ ଉଭୟ ଗୋଷ୍ଠୀର ନେତାଙ୍କ ପକ୍ଷ ଶୁଣିବା ପରେ ଏହି ମାମଲାରେ ‘ନିର୍ବାଚନ ଚିହ୍ନ (ସଂରକ୍ଷଣ ଓ ଆବଣ୍ଟନ) ଆଦେଶ, ୧୯୬୮’ର ବ୍ୟବସ୍ଥା ଅନୁସାରେ ଠୋସ ନିଷ୍ପତ୍ତି ନେବା ଆବଶ୍ୟକ।
ଏହା ମଧ୍ୟରେ ପଶ୍ଚିମବଙ୍ଗର ପୂର୍ବ ମେଦିନୀପୁର ଜିଲାର ନନ୍ଦୀଗ୍ରାମ ଏବଂ ମୁର୍ଶିଦାବାଦ ଜିଲାର ରେଜିନଗର ବିଧାନସଭା ଆସନରେ ଅକ୍ଟୋବର ୬ ତାରିଖରେ ଉପନିର୍ବାଚନ ହେବ। ଅକ୍ଟୋବର ୯ ତାରିଖରେ ଭୋଟ ଗଣତି କରାଯିବ।
