ଆରଡି, ୨୬ା୪(ଡି.ଏନ.ଏ.)-ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡ଼ିରେ ପବିତ୍ର ଅକ୍ଷୟ ତୃତୀୟାରେ ଆରମ୍ଭ ହେଉଥିବା ବାବା ଆଖଣ୍ଡଳମଣିଙ୍କ ଚନ୍ଦନ ଚାପ ବନ୍ଦ ହେବାର ନିଷ୍ପତ୍ତି ନେଇଛି ଜିଲା ପ୍ରଶାସନ। କରୋନା ଭାଇରସ ସଂକ୍ରମଣ ଯୋଗୁ ୧ ମାସରୁ ଅଧିକ ଦିନ ଧରି ମନ୍ଦିର ବନ୍ଦ ରହିଛି। କେବଳ ପୂଜକ ମାନେ ଯଥାରୀତି ପ୍ରତିଦିନ ବାବାଙ୍କ ନୀତିକାନ୍ତି ସମାପନ କରିଆସୁଛନ୍ତି। ଭକ୍ତମାନେ ଦର୍ଶନ ପାଇବାରୁ ବଞ୍ଚିତ ହେଉଛନ୍ତି।
ଚନ୍ଦନ ଚାପ ପ୍ରତିବର୍ଷ ୨୧ ଦିନ ଧରି ଚାଲିଥାଏ। ପ୍ରତି ସନ୍ଧ୍ୟାରେ ବାବାଙ୍କ ଚଳନ୍ତି ପ୍ରତିମା ପ୍ରଭୁ ଚନ୍ଦ୍ରଶେଖର ଏକ ସୁସଜ୍ଜିତ ନାବରେ ଅବସ୍ଥାନ କରି ବାବାଙ୍କ ପୁଷ୍କରିଣୀରେ ଜଳକ୍ରୀଡା କରନ୍ତି। ଏହାକୁ ଦେଖିବା ପାଇଁ ପୀଠରେ ଭକ୍ତ ମାନଙ୍କ ଅସମ୍ଭବ ଭିଡ ହୋଇଥାଏ। ଚଳିତ ବର୍ଷ ଏହି ଚନ୍ଦନ ଚାପ ବନ୍ଦ ହେବା ଯୋଗୁ ପ୍ରଭୁ ଆଉ ଜଳକ୍ରୀଡା କରି ପାରିବେ ନାହିଁ। କେବଳ ଯାହା ମନ୍ଦିର ଭିତରେ ପୂଜାର୍ଚ୍ଚନା ସମାପନ ହେବ ବୋଲି ସେବାୟତ ମାନେ କହିଛନ୍ତି। ଏ ସମ୍ପର୍କରେ ଭଦ୍ରକ ଉପଜିଲାପାଳ ପିତାମ୍ବର ସାମଲ କହିଛନ୍ତି ଯେ, ଭଦ୍ରକ ଜିଲା ବର୍ତ୍ତମାନ କରୋନା ପାଇଁ ଡିପ୍ ରେଡ୍ ଜୋନ୍ ପାଲଟିଛି। ସେଥିପାଇଁ ଜିଲାରେ ପ୍ରଶାସନିକ ସ୍ତରରେ କଡା ପଦକ୍ଷେପ ଗ୍ରହଣ କରାଯାଇଛି। ଏଭଳି ସ୍ଥିତିରେ ଆଖଣ୍ଡଳମଣିଙ୍କ ପୀଠରେ ଚନ୍ଦନ ଚାପ ବନ୍ଦ ହେବା ନିଷ୍ପତ୍ତି ନିଆଯାଇଛି। ବରିଷ୍ଠ ସେବାୟତ ଅଧ୍ୟାପକ ବିଜୟ କୁମାର ଦାଶ କହିଛନ୍ତି ଯେ, ଆଖଣ୍ଡଳମଣିଙ୍କ ଚନ୍ଦନ ଚାପ ପୁଷ୍କରିଣୀରେ ନ ହେଲେବି ସମସ୍ତ ଶୀତଳ ଉପଚାର ନୀତି ପୂର୍ବକ ପ୍ରଭୁଙ୍କୁ ଚନ୍ଦନ ଲାଗି କରାଯିବା ସହ ସ୍ନାନ ଓ ନୈବେଦ୍ୟ ଅର୍ପଣ ବିଧିପୂର୍ବକ ୨୧ ଦିନରେ ସମାପନ କରାଯିବ।
