ପାଟଣା, ୯/୧୦ (ବୀର କିଶୋର ଦାଶ): କେନ୍ଦୁଝର ଜିଲାର ସ୍ୱାମପାଟଣାସ୍ଥିତ ଆଞ୍ଚଳିକ ମହାବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ପାଇଁ ଶୁକ୍ରବାର ପ୍ରାର୍ଥିପତ୍ର ଯାଞ୍ଚ ଶେଷ ହୋଇଛି। ନାମାଙ୍କନ କରିଥିବା ସମସ୍ତ ୨୨ ଜଣ ପ୍ରାର୍ଥୀଙ୍କ ପ୍ରାର୍ଥିପତ୍ର କାଏମ ରହିଥିବା ମହାବିଦ୍ୟାଳୟର ନିର୍ବାଚନ ଅଧିକାରୀ ତଥା ଶିକ୍ଷା ବିଭାଗର ପ୍ରାଧ୍ୟାପକ ହଳଧର ସାହୁ ଓ ଅଧ୍ୟକ୍ଷ ଜଗନ୍ନାଥ ମହାନ୍ତ ସୂଚନା ଦେଇଛନ୍ତି। ମହାବିଦ୍ୟାଳୟର ବିଜ୍ଞପ୍ତି ନଂ ୯୪/୨୬ ଅନୁଯାୟୀ, ବୈଧ ପ୍ରାର୍ଥୀଙ୍କ ତାଲିକା ପ୍ରକାଶ ପାଇଛି।
ସଭାପତି ପଦ ପାଇଁ ସାଲୋନି ତ୍ରିପାଠୀ, ଶୁଭମ କୁମାର ମହାନ୍ତ, ପୁଣ୍ୟବନ୍ତ ପ୍ରଧାନ ଓ ପୂର୍ଣ୍ଣିମା ବେହେରା ପ୍ରାର୍ଥୀ ହୋଇଛନ୍ତି। ଉପସଭାପତି ପଦ ପାଇଁ ତ୍ରିଦେବ ମହାନ୍ତ ଓ ବିଶ୍ୱପ୍ରକାଶ ନାୟକ ପ୍ରାର୍ଥିତ୍ୱ ଦାଖଲ କରିଛନ୍ତି। ସାଧାରଣ ସମ୍ପାଦକ ପଦ ପାଇଁ ଆକାଶ ପାତ୍ର ଓ ଅଙ୍କିତା ବାରିକ ଏବଂ ସହକାରୀ ସମ୍ପାଦକ ପଦ ପାଇଁ ବିରେନ୍ଦ୍ର ବେହେରା ଓ ବିମଳା ମହାନ୍ତ ପ୍ରାର୍ଥୀ ହୋଇଛନ୍ତି।
ଡିଏସ୍ଏ ସମ୍ପାଦକ ପଦ ପାଇଁ ସତ୍ୟଜିତ ସତ୍ୟପ୍ରକାଶ ମହାନ୍ତି ଓ ସରୋଜ କୁମାର ବେହେରା ଏବଂ ଆଥଲେଟିକ୍ ଆସୋସିଏସନ୍ ସମ୍ପାଦକ ପଦ ପାଇଁ ଦିଗନ୍ତ ପ୍ରସାଦ ସେଠୀ ଓ ସମୀର କୁମାର ନାଏକ ପ୍ରାର୍ଥୀ ହୋଇଛନ୍ତି। ସହକାରୀ ଆଥଲେଟିକ୍ ସମ୍ପାଦକ ପଦ ପାଇଁ ବର୍ଷାରାଣୀ ମହାନ୍ତ, ନାଟ୍ୟ ସମ୍ପାଦକ ପଦ ପାଇଁ ପ୍ରିୟଦର୍ଶିନୀ ମହାନ୍ତ, ରଞ୍ଜନ କୁମାର ମହାନ୍ତ ଓ ଦିନେଶ ମହାନ୍ତ ଏବଂ ସହକାରୀ ନାଟ୍ୟ ସମ୍ପାଦକ ପଦ ପାଇଁ ଭାରତୀ ନାୟକ ଓ ଅବିନାଶ ସେଠୀ ପ୍ରାର୍ଥୀ ହୋଇଛନ୍ତି। ସେହିପରି, ସହକାରୀ ଡିଏସ୍ଏ ପଦ ପାଇଁ ବୈଲୋଚନ ପ୍ରଧାନ ଓ ସନ୍ଦୀପ କୁମାରଙ୍କ ନାମ ତାଲିକାରେ ରହିଛି।
ନିର୍ବାଚନ ପରିଚାଳନା ଦାୟିତ୍ୱରେ ଅଧ୍ୟାପକ ଡା. ହୃଦାନନ୍ଦ ବିଶ୍ୱାଳ, ବଜେନ୍ଦ୍ର କୁମାର ପତି, ସୌମ୍ୟରଞ୍ଜନ ମିଶ୍ର ଓ ଶ୍ରୀନିବାସ ତ୍ରିପାଠୀ ରହିଛନ୍ତି। ଆଇନଶୃଙ୍ଖଳା ରକ୍ଷା ପାଇଁ ପାଟଣା ଥାନା ଅଧିକାରୀ କିରଣ ପ୍ରସାଦ ସାହୁଙ୍କ ନେତୃତ୍ୱରେ ପୁଲିସ ଫୋର୍ସ ମୁତୟନ କରାଯାଇଥିଲା।
ଦୀର୍ଘ ୮ ବର୍ଷ ପରେ ମହାବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ହେଉଥିବାରୁ କ୍ୟାମ୍ପସ୍ରେ ରାଜନୈତିକ ଉଷ୍ମତା ବୃଦ୍ଧି ପାଇଛି। କଲେଜ ରାଜନୀତିରେ ନିଜର ପ୍ରଭାବ ଜାହିର କରିବା ପାଇଁ ଭାଜପାର ଛାତ୍ର ସଂଗଠନ ଏବିଭିପି ଓ ବିଜେଡିର ଛାତ୍ର ସଂଗଠନ ପକ୍ଷରୁ ତତ୍ପରତା ପ୍ରକାଶ ପାଇଛି। ଉଭୟ ଦଳର ଯୁବନେତା ଓ ପୂର୍ବତନ ଛାତ୍ରନେତାଙ୍କ ଭିଡ଼ ମହାବିଦ୍ୟାଳୟ ପରିସର ବାହାରେ ଦେଖିବାକୁ ମିଳିଥିଲା।
ଶନିବାର ପ୍ରାର୍ଥିପତ୍ର ପ୍ରତ୍ୟାହାର ପରେ ନିର୍ବାଚନ ଲଢ଼େଇର ପ୍ରକୃତ ଚିତ୍ର ସ୍ପଷ୍ଟ ହେବ।
