ନର୍ଥ ସାଉଣ୍ଡ (ଆଣ୍ଟିଗୁଆ), ୨୫।୭ (ପି.ଟି.)- ସ୍ଥାନୀୟ ସାର୍ ଭିଭିଆନ୍ ରିଚାଡର୍ସ ଷ୍ଟାଡିୟମରେ ଘରୋଇ ଓ୍ବେଷ୍ଟଇଣ୍ଡିଜ-ଏ ବିପକ୍ଷରେ ଆରମ୍ଭ ହୋଇଥିବା ପ୍ରଥମ ଅନ୍ଅଫିସିଆଲ ଟେଷ୍ଟର ପ୍ରଥମ ଦିବସରେ ଭାରତ-ଏ ବୋଲରଙ୍କ ଦମ୍ଦାର ପ୍ରଦର୍ଶନ ଦେଖିବାକୁ ମିଳିଛି। ଟସ୍ ଜିତି ବ୍ୟାଟିଂ କରିଥିବା ଓ୍ବେଷ୍ଟଇଣ୍ଡିଜ-ଏ ୬୬.୫ ଓଭରରେ ୨୨୮ ରନ୍ କରି ଅଲ୍ଆଉଟ୍ ହୋଇଯାଇଛି। ଦଳ ପକ୍ଷରୁ ୭ ନମ୍ବର ସ୍ଥାନରେ ବ୍ୟାଟିଂ କରିବାକୁ ଆସିଥିବା ରଖିମ କୋର୍ନଓ୍ବାଲ ସର୍ବାଧିକ ୫୯ ରନ କରିଥିବାବେଳେ ଜେର୍ମିନ ବ୍ଲାକଉଡ୍ (୫୩), ରୋଷ୍ଟନ ଚେଜ୍ (୨୫) ଓ ଜୋମେଲ ଓ୍ବାରିକନ୍ (୨୧) ତାଙ୍କୁ ଉପଯୁକ୍ତ ସହାୟତା କରିଥିଲେ। ଭ୍ରମଣକାରୀ ଭାରତ-ଏ ପକ୍ଷରୁ ବାମହାତୀ ସ୍ପିନର ଶାହବାଜ ନଦିମ୍ (୨୨-୭-୬୨-୫) ସଫଳ ବୋଲର ସାବ୍ୟସ୍ତ ହୋଇଥିଲେ। ମହମ୍ମଦ ସିରାଜ (୨), ମୟଙ୍କ ମାର୍କଣ୍ଡେ (୨) ଓ ଶିବମ ଦୁବେ (୧) ମିଳିତ ଭାବେ ବଳକା ଉଇକେଟ୍ ବାଣ୍ଟି ନେଇଥିଲେ।
ପ୍ରଥମ ଇନିଂସ ଆରମ୍ଭ କରିଥିବା ହନୁମା ବିହାରୀଙ୍କ ନେତୃତ୍ୱାଧୀନ ଭାରତ-ଏ ଦଳ ଷ୍ଟମ୍ପ୍ସ ଅପସାରଣ ସୁଦ୍ଧା ଗୋଟିଏ ଉଇକେଟ୍ ହରାଇ ୭୦ ରନ୍ ସଂଗ୍ରହ କରିଛି। ଓପନର୍ ଅଭିମନ୍ୟୁ ଇଶ୍ୱରନ (୨୮ ରନ) ଏକମାତ୍ର ବ୍ୟାଟ୍ସମ୍ୟାନ ଭାବେ ଆଉଟ୍ ହୋଇଥିବାବେଳେ ପ୍ରିୟଙ୍କ ପଞ୍ଚଲ (୩୧) ଓ ଶୁବମନ ଗିଲ (୯) କ୍ରିଜରେ ଅପରାଜିତ ରହିଛନ୍ତି। ଇନିଂସ ଅଗ୍ରଣୀ ପାଇଁ ଭାରତ-ଏ ଆହୁରି ୧୫୯ ରନ ଆବଶ୍ୟକ କରୁଛି। ପୂର୍ବରୁ ଦୁଇ ଦଳ ମଧ୍ୟରେ ଅନୁଷ୍ଠିତ ୫ ମ୍ୟାଚ୍ବିଶିଷ୍ଟ ଅନ୍ଅଫିସିଆଲ ଦିନିକିଆ ସିରିଜକୁ ଭାରତ-ଏ ୪-୧ରେ ଜିତି ନେଇଥିଲା।
