ଜୈବିକ କୃଷିରେ ଉନ୍ନତି ଆଣିବାରେ ଉତ୍ତରପ୍ରଦେଶର ଗୀତା ସିଂଙ୍କ ପ୍ରୟାସ ବେଶ୍ ପ୍ରଶଂସନୀୟ। ତାଙ୍କ ବୟସ ୪୮। ଗୋଣ୍ଡା ଜିଲାର ନିବାସୀ ଗୀତା ରାଜନୀତି ବିଜ୍ଞାନରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି। ତାଙ୍କ ସ୍ବାମୀ ସରକାରୀ ଚାକିରି ଛାଡି କୃଷିରେ ପ୍ରବେଶ କରିବା ପରେ ଗୀତା କୃଷି ପ୍ରତି ଆକୃଷ୍ଟ ହୋଇଥିଲେ। କୃଷକମାନଙ୍କ ଆର୍ଥିକ ଓ ସାମାଜିକ ଉନ୍ନତି ଆଣିବା ଲକ୍ଷ୍ୟରେ ସେ ୨୦୧୯ରେ ଫାର୍ମର୍ସ ପ୍ରଡ୍ୟୁସର୍ସ କମ୍ପାନୀ ପ୍ରତିଷ୍ଠା କରିଥିଲେ। ପ୍ରଥମେ ଏଥିରେ ୧ ଲକ୍ଷ ଟଙ୍କା ନିବେଶ କରିବା ସହ ୧୦୦ ଜଣ କୃଷକଙ୍କୁ ସାମିଲ କରିଥିଲେ। ଏବେ ହଜାର ହଜାର କୃଷକ ତାଙ୍କ ସହ ସାମିଲ ହୋଇଛନ୍ତି। କୃଷକମାନଙ୍କୁ ଜୈବିକ ଚାଷ କରିବାକୁ ପ୍ରୋତ୍ସାହନ ଯୋଗାଇ ଦେବା ସହ ସେମାନଙ୍କଠାରୁ ସଂଗୃହୀତ ଉପତ୍ାଦରୁ ବିଭିନ୍ନ ମୂଲ୍ୟଯୁକ୍ତ ଜିନିଷ ଯଥା ମକା ବିସ୍କୁଟ, ମକା ଲଡୁ, ଜଡ଼ା ତେଲ ଏବଂ ବିଭିନ୍ନ ପ୍ରକାର ଆଚାର ପ୍ରସ୍ତୁତ କରୁଛନ୍ତି। ସେ ସ୍ବୟଂ ସହାୟିକା ଗୋଷ୍ଠୀର ମହିଳାମାନଙ୍କୁ ପ୍ରଶିକ୍ଷଣ ଦେଇ ଆଚାର ପ୍ରସ୍ତୁତିରେ ଲଗାଇଛନ୍ତି। ଫଳରେ ସେମାନେ ମାସକୁ ୫,୦୦୦ ଅଧିକ ଟଙ୍କା ରୋଜଗାର କରିବାକୁ ସକ୍ଷମ ହେଉଛନ୍ତି। କୃଷି ଉପତ୍ାଦ ଓ ଏଥିରୁ ପ୍ରସ୍ତୁତ ଜିନିଷଗୁଡ଼ିର ମାକେର୍ଟିଂ ବ୍ୟବସ୍ଥା ଏମିତି କରିଛନ୍ତି ଯେ ମଧ୍ୟସ୍ଥମାନେ ସମ୍ପୂର୍ଣ୍ଣ ହଟିଯାଇଛନ୍ତି। ଫଳରେ କୃଷକମାନେ ପୂର୍ବାପେକ୍ଷା ୬ଗୁଣ ଲାଭ ପାଉଛନ୍ତି। ଜୈବିକ ଉପତ୍ାଦଗୁଡ଼ିକୁ ଲକ୍ଷ୍ନୌ ଓ ଆଲ୍ଲାହାବାଦ ସହରରେ ବିକ୍ରି କରାଯାଉଛି। ଗୀତା ଏକ ରାଇସ୍ ମିଲ୍ କରି ଏଥିରେ ୧୦ ଜଣ ନିୟମିତ ଓ ୪୦ ଜଣ ଠିକା କର୍ମଚାରୀଙ୍କୁ ନିଯୁକ୍ତି ଦେଇଛନ୍ତି।
