ଜନ୍ମରୁ ଯେଉଁ କନ୍ୟା ସନ୍ତାନକୁ ମୃତ ଘୋଷଣା କରାଯାଇଥିଲା ସେ କେବିସିରେ ଭାଗନେଇ ୧୨.୫ ଲକ୍ଷ ଟଙ୍କା ଜିତିଛନ୍ତି। ଏହା ଅସମ୍ଭବ ଲାଗୁଥିଲେ ବି ସତ। ଉତ୍ତରପ୍ରଦେଶ କାନପୁରର ଏକ ଚିକିତ୍ସାଳୟରେ ଜନ୍ମ ହେବାପରେ ଶିଶୁ କନ୍ୟାଟିକୁ ମୃତ ଘୋଷଣା କରି ଡାକ୍ତରମାନେ ଅଳିଆଗଦାରେ ଫିଙ୍ଗି ଦେଇଥିଲେ। ଜନୈକ ସମ୍ପର୍କୀୟ ସେ ବଞ୍ଚିଥିବାର କିଛି ଲକ୍ଷଣ ଜାଣିପାରି ତାକୁ ଅଳିଆଗଦାରୁ ଉଠାଇ ଆଣିଥିଲେ। ଉନାଓ ଜିଲା ବିଘାପୁର ବାସିନ୍ଦା ରାମକୁମାର ଓ କଳ୍ପନା ସିଂହଙ୍କ କନ୍ୟା ନୂପୁରଙ୍କ ଜୀବନରେ ଘଟିଥିଲା ଏଭଳି ଘଟଣା। ଜନ୍ମର କିଛି କ୍ଷଣ ମଧ୍ୟରେ ଡାକ୍ତରମାନଙ୍କ ଏଭଳି ଭୁଲ୍ ନିଷ୍ପତ୍ତି ଯୋଗୁ ନୂପୁର ଭିନ୍ନକ୍ଷମ ପାଲଟିଯାଇଛନ୍ତିି। ତଥାପି ପିଲାଟିଦିନରୁ ସବୁ ପ୍ରତିକୂଳ ପରିବେଶକୁ ସାମନା କରି ସେ ଆଗକୁ ବଢି ଦୀର୍ଘ ୨୯ ବର୍ଷ ପରେ କୌନ୍ ବନେଗା କରୋଡ଼ପତି (କେବିସି)ରେ ଭାଗନେଇ ୧୨.୫ ଲକ୍ଷ ଟଙ୍କା ଜିତିଛନ୍ତି। ଏହି ଶୋ’ରେ ସେ ୧୨ଟି ପ୍ରଶ୍ନର ଉତ୍ତର ଦେବାକୁ ସକ୍ଷମ ହୋଇପାରିଥିଲେ। ନୂପୁର ଆଇଏ ମେରିଟ୍ ଲିଷ୍ଟରେ ରହିଥିଲେ ଓ ବିଏଡ୍ ପ୍ରବେଶିକା ପରୀକ୍ଷାର ପ୍ରଥମ ପ୍ରୟାସରେ କୃତକାର୍ଯ୍ୟ ହୋଇଛନ୍ତି। ଏବେ ସେ ଏକ ପ୍ଲେ ଗ୍ରୁପ୍ରେ ଛୋଟପିଲାଙ୍କୁ ଶିକ୍ଷାଦାନ କରୁଛନ୍ତି ଓ ଏହାସହ ୧୦ମ ଶ୍ରେଣୀ ପିଲାଙ୍କୁ ମଧ୍ୟ ବିନା ଦେୟରେ ପଢ଼ାଉଛନ୍ତି। କିନ୍ତୁ ବଡ଼ କଥା ହେଉଛି, ନୂପୁର ପିଲାବେଳୁ ଭିନ୍ନକ୍ଷମ ହେବାରେ ଯେଉଁ ଡାକ୍ତରମାନେ ଦାୟୀ ସେମାନଙ୍କ ଉପରେ କିଛି ବି ଅଭିଯୋଗ କରି ନ ଥିଲେ ନୂପୁରଙ୍କ ମା’। ଏହା ତାଙ୍କ ଭାଗ୍ୟରେ ଅଛି, କାହାକୁ ଦୋଷ ଦେବା ଠିକ୍ ହେବନି ବୋଲି ସେ କହିଛନ୍ତି। ନୂପୁର ତାଙ୍କ ଗାଁରେ ଜଣେ ଷ୍ଟାର୍ ପାଲଟିଯାଇଛନ୍ତି। ଏବେ ତାଙ୍କ ଜୀବନରେ ଅନେକ କିଛି ପରିବର୍ତ୍ତନ ଆସିଛି। ଆଖପାଖର ଲୋକମାନେ ତାଙ୍କୁ ସାକ୍ଷାତ କରିବାକୁ ଆସୁଛନ୍ତି।
