ଆସାମର ଗୋଟିଏ ଗଁାରେ ମୁସଲମାନ ସମ୍ପ୍ରଦାୟର ଲୋକେ ଜଣେ ହିନ୍ଦୁ ବ୍ୟକ୍ତିଙ୍କ ଅନ୍ତିମ ସଂସ୍କାର କରି ଉଦାହରଣ ସୃଷ୍ଟି କରିଛନ୍ତି। ଏହି ରାଜ୍ୟର କାମରୂପ ଜିଲାର ମୁସଲମାନ ଅଧ୍ୟୁଷିତ ଖାନ୍ଦିକର ଗଁାରେ ୬୫ବର୍ଷ ବୟସ୍କ ରାଜକୁମାର ଗୌର ୨୫ ବର୍ଷରୁ ଊର୍ଦ୍ଧ୍ୱ କାଳ ହେଲା ରହିଆସୁଥିଲେ। ସଦ୍ଦାମ ହୁସେନ ନାମକ ଜଣେ ବ୍ୟକ୍ତି ନିଜ ବାଡ଼ିରେ ରାଜକୁମାରଙ୍କ ପାଇଁ ଘର ତୋଳାଇ ଦେଇଥିଲେ। ଶନିବାର ରାଜକୁମାର ମୃତ୍ୟୁବରଣ କରିବା ପରେ ହୁସେନ ଓ ତାଙ୍କ ସାଙ୍ଗସାଥୀ ଟଙ୍କା ଚାନ୍ଦା କରିବା ସହିତ ହିନ୍ଦୁ ରୀତିନୀତି ଅନୁଯାୟୀ ତାଙ୍କର ସଂସ୍କାର କରିବାକୁ ଆବଶ୍ୟକ ସାମଗ୍ରୀ କିଣିଥିଲେ ଏବଂ ପୁରୋହିତଙ୍କୁ ଡାକିଥିଲେ। ମୁସଲମାନ ଭାଇମାନେ ରାଜକୁମାରଙ୍କ ମୃତଦେହକୁ ସଂସ୍କାରସ୍ଥଳକୁ ନେଇଥିଲେ। ପୁରୋହିତଙ୍କ ବୈଦିକ ମନ୍ତ୍ରୋଚ୍ଚାରଣ ସହିତ ରାଜକୁମାରଙ୍କ ଶବାଧାରରେ ଅଗ୍ନି ସଂଯୋଗ କରାଯାଇ ଅନ୍ତ୍ୟେଷ୍ଟିକ୍ରିୟା ସମ୍ପନ୍ନ କରାଯାଇଥିଲା। ହୁସେନଙ୍କ କହିବା ଅନୁଯାୟୀ, ଉତ୍ତରପ୍ରଦେଶର ବାସିନ୍ଦା ତଥା ରାଜକୁମାରଙ୍କ ପିତା ଆସାମରେ ରେଲଓ୍ବେ ବିଭାଗରେ ଚାକିରି କରୁଥିଲେ। ପିତାଙ୍କ ମୃତ୍ୟୁ ପରେ ରାଜକୁମାରଙ୍କୁ ରେଲଓ୍ବେ କ୍ୱାର୍ଟର ଛାଡ଼ିବାକୁ ପଡିଥିଲା। ସେ ବାସହୀନ ହୋଇପଡ଼ିବାରୁ ତାଙ୍କ ପାଇଁ ନିଜ ବାଡିରେ ସେ ବାସଘର ଖଣ୍ଡିଏ ତୋଳାଇ ଦେଇଥିଲେ। ସେହିଦିନଠାରୁ ସେ ପରିବାର ସହ ସେଠାରେ ରହିଆସୁଛନ୍ତି। ରାଜକୁମାର ହିନ୍ଦୁ ହୋଇଥିଲେ ହେଁ ମୁସଲମାନଙ୍କ ଧର୍ମୀୟ ଓ ସାମାଜିକ ଉତ୍ସବରେ ଅଂଶଗ୍ରହଣ ନିୟମିତ କରୁଥିଲେ। ରାଜକୁମାରଙ୍କ ଭଳି ଜଣେ ବେସାହାରା ହିନ୍ଦୁ ବ୍ୟକ୍ତିଙ୍କ ଅନ୍ତିମ ସଂସ୍କାର କରି ମୁସଲମାନ ଭାଇମାନେ ଯେଉଁ ନିଆରା ଭାଇଚାରାର ଉଦାହରଣ ସୃଷ୍ଟି କରିଛନ୍ତି ତାହା ସମାଜରେ କେତେକ ବିରଳ ଘଟଣା ମଧ୍ୟରୁ ଅନ୍ୟତମ।
