ଅନୁଗୋଳ ଅଫିସ, ୨୬।୮: ଅନୁଗୋଳରେ ନିର୍ମାଣାଧୀନ ଅତ୍ୟାଧୁନିକ ସରକାରୀ ବସ୍ଷ୍ଟାଣ୍ଡ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଆଉ ଅଳ୍ପ କିଛି କାର୍ଯ୍ୟ ଶେଷ ହେଲେ ତାହାକୁ ଉଦ୍ଘାଟନ କରାଯିବ। ଗତ ୧୫ ତାରିଖରେ ଏହାର ଉଦ୍ଘାଟନ ପାଇଁ ପୂର୍ବରୁ ଲକ୍ଷ୍ୟଧାର୍ଯ୍ୟ ହୋଇଥିଲେ ମଧ୍ୟ ତାହା ସମ୍ଭବ ହୋଇପାରି ନାହିଁ। ନିକଟରେ ୩ଟି ଦୋକାନ ଜବରଦଖଲରେ ରହିଥିବାରୁ ଏହି କାର୍ଯ୍ୟ ବିଳମ୍ବ ହେଉଥିବା ଓଏସ୍ଆରଟିସିର ୟୁନିଟ୍ ଇନ୍ଚାର୍ଜ ମାଗୁଣି ମହାନ୍ତି କହିଛନ୍ତି। ୧ ଏକର ୧୪ ଡିସିମିଲ ଜାଗାରେ ନିର୍ମାଣ ହେଉଥିବା ଏହି ଅତ୍ୟାଧୁନିକ ବସ୍ଷ୍ଟାଣ୍ଡ ପାଇଁ ରାଜ୍ୟ ସରକାର ପ୍ରାୟ ୫ କୋଟି ଟଙ୍କା ଖର୍ଚ୍ଚ କରିଛନ୍ତି। ଏଠାରେ ଗୋଟିଏ ଛାତ ତଳେ ଟିକେଟ ଘର ସହ ଓଏସ୍ଆର୍ଟିସି କାର୍ଯ୍ୟାଳୟ, ଚାଳକ/ହେଲପରଙ୍କ ବିଶ୍ରାମାଗାର, କ୍ୟାଣ୍ଟିନ, ଯାତ୍ରୀ ବିଶ୍ରାମାଗାର ରହିବ। ସେହିପରି ବସ୍ଷ୍ଟାଣ୍ଡ ପରିସରରେ ୧୭ କୋଠରି ବିଶିଷ୍ଟ ମାର୍କେଟ କମ୍ପ୍ଲେକ୍ସ, ୬ଟି ବସ୍ ଟର୍ମିନାଲ ଓ ଗୋଟିଏ ଗ୍ୟାରେଜ ରହିବ। ଯାତ୍ରୀଙ୍କୁ ୨୪ ଘଣ୍ଟିଆ ୱାଇଫାଇ ସେବା ମଧ୍ୟ ମିଳିବ। କିନ୍ତୁ ଲକ୍ଷ୍ୟଧାର୍ଯ୍ୟ ସମୟ ଗଡ଼ି ଯାଇଥିଲେ ବି କାର୍ଯ୍ୟ ଶେଷ ହୋଇପାରୁ ନାହିଁ କି ପ୍ରଶାସନ ଜବରଦଖଲ ସମ୍ପୂର୍ଣ୍ଣ ଉଚ୍ଛେଦ ମଧ୍ୟ କରିପାରୁ ନାହିଁ। ଏହାକୁ ନେଇ ଅସନ୍ତୋଷ ସୃଷ୍ଟି ହୋଇଛି। ଇତିମଧ୍ୟରେ ୩୦ ବର୍ଷ ଧରି ଜବରଦଖଲରେ ଥିବା କେତେକ ଦୋକାନୀଙ୍କୁ ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି। ଏଥିପାଇଁ ୧୮ଟି ଦୋକାନୀଙ୍କୁ ନୋଟିସ୍ ଦିଆଯାଇଥିଲା। ସେଥିମଧ୍ୟରୁ ୧୫ଟି ଦୋକାନ ଉଚ୍ଛେଦ ହୋଇଥିବା ବେଳେ ବାକି ୩ଟିକୁ ପ୍ରଶାସନ ହାତ ମାରିପାରି ନାହିଁ। ପ୍ରଶାସନ କାହିଁକି ଉକ୍ତ ଦୋକାନକୁ ଉଚ୍ଛେଦ କରିନାହିଁ ତାହାକୁ ନେଇ ଏବେ ଅନ୍ୟ ବ୍ୟବସାୟୀମାନେ ପ୍ରଶ୍ନ କରିଛନ୍ତି।
