ବରଗଡ଼, ୧୮/୩ (ପ୍ରେମାନନ୍ଦ ଖମାରୀ): ବରଗଡ଼ ସହରର ଅଧିଷ୍ଠାତ୍ରୀ ଦେବୀ ମା’ ସମଲେଶ୍ୱରୀଙ୍କ ପୀଠରେ ପବିତ୍ର ଚୈତ୍ର ନବରାତ୍ର ବା ବାସନ୍ତୀକ ନବରାତ୍ର ପୂଜା ପାଇଁ ଶୁଭାରମ୍ଭ ହୋଇଛି। ଗୁରୁବାର ଅତି ନିଷ୍ଠା ଓ ପାରମ୍ପରିକ ରୀତିନୀତି ଅନୁଯାୟୀ ମା’ଙ୍କ ପୀଠରେ ‘ଖଣ୍ଡାଧୁଆ’ ଏବଂ ‘କଳସ ଆବାହନ’ କାର୍ଯ୍ୟକ୍ରମ ସଫଳତାର ସହ ସମ୍ପନ୍ନ ହୋଇଯାଇଛି।
ନବରାତ୍ରର ଆଦ୍ୟ ପର୍ବ ଭାବେ ମନ୍ଦିରର ପୂଜକ ଓ ସେବାୟତମାନେ ଶୁଦ୍ଧପୂତ ଭାବେ ମା’ଙ୍କ ପାରମ୍ପରିକ ଅସ୍ତ୍ର ‘ଖଣ୍ଡା’କୁ ଧରି ଏକ ବର୍ଣ୍ଣାଢ଼୍ୟ ଶୋଭାଯାତ୍ରାରେ ବାହାରିଥିଲେ। ଶୋଭାଯାତ୍ରାଟି ଜୀରା ନଦୀ ଅଭିମୁଖେ ଯାଇଥିଲା, ଯେଉଁଠାରେ ନଦୀର ପବିତ୍ର ଜଳରେ ମା’ଙ୍କ ଖଣ୍ଡାକୁ ସ୍ନାନ କରାଯାଇ ସ୍ୱତନ୍ତ୍ର ପୂଜାର୍ଚ୍ଚନା କରାଯାଇଥିଲା।ନଦୀରୁ ଜଳ ନେଇ ଫେରିବା ପରେ ମନ୍ଦିର ପ୍ରାଙ୍ଗଣରେ ମନ୍ତ୍ରୋଚାରଣ ପୂର୍ବକ ଘଟ ସ୍ଥାପନ ଓ କଳସ ଆବାହନ କରାଯାଇଥିଲା। ଏହାସହ ଆଗାମୀ ନଅ ଦିନିଆ ନବରାତ୍ର ପୂଜା ପାଇଁ ବିଧିବଦ୍ଧ ଭାବେ ସଂକଳ୍ପ କରାଯାଇଛି।
ମା’ଙ୍କର ଏହି ଦୁର୍ଲଭ ‘ଖଣ୍ଡାଧୁଆ’ ନୀତି ଓ କଳସ ଶୋଭାଯାତ୍ରା ଦର୍ଶନ ପାଇଁ ରାଜରାସ୍ତାରେ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଜମିଥିଲା। ‘ଜୟ ମା’ ସମଲେଶ୍ୱରୀ’ ଧ୍ୱନିରେ ସହରର ପରିବେଶ ଆଧ୍ୟାତ୍ମିକମୟ ହୋଇଉଠିଛି। ମନ୍ଦିର ପ୍ରାଙ୍ଗଣରେ ମଧ୍ୟ ଭକ୍ତମାନେ ମା’ଙ୍କ ଦର୍ଶନ କରି ଆଶିଷ ଭିକ୍ଷା କରିଛନ୍ତି।
ଆଗାମୀ ନଅ ଦିନ ପର୍ଯ୍ୟନ୍ତ ମା’ଙ୍କ ପୀଠରେ ସ୍ୱତନ୍ତ୍ର ପୂଜାପାଠ, ଚଣ୍ଡୀପାଠ ଓ ବିଭିନ୍ନ ବେଶ ଅନୁଷ୍ଠିତ ହେବ। ବାସନ୍ତୀକ ନବରାତ୍ର ଅବସରରେ ମା’ଙ୍କୁ ଦର୍ଶନ କଲେ ପୁଣ୍ୟ ପ୍ରାପ୍ତି ହୁଏ ବୋଲି ସାଧାରଣରେ ବିଶ୍ୱାସ ରହିଛି।
