ନୂଆଦିଲ୍ଲୀ,୨୩।୯: ଦିଲ୍ଲୀର ହରି ନଗର ଅଞ୍ଚଳରେ ରବିବାର ଜଣେ ବ୍ୟକ୍ତି ୧୦ମହଲା କୋଠାର ଛାତ ଉପରେ ଠିଆ ହେବା ସହ ଆତ୍ମହତ୍ୟା ଧମକ ଦେଉଥିବା ଦେଖିବାକୁ ମିଳିଛି। ହେଲେ ସୋମବାର ଏହି ଡ୍ରମାର ଅନ୍ତ ହୋଇଛି। ଆଉ ଆତ୍ମହତ୍ୟାର ଏକ ଭିଡିଓ କରି ବ୍ୟକ୍ତିଜଣକ ଟିକ୍ଟକ୍ରେ ଶେୟାର କରିଥିଲେ। ତାଙ୍କର ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ରବିବାର ଦ୍ୱିପହରେ ସନ୍ଦୀପ ଓରଫ ଅରମାନ ମଲ୍ଲିକ ନାମକ ଜଣେ ବ୍ୟକ୍ତି ୧୦ମହଲା ବିଶିଷ୍ଟ ଏକ ହୋଟେଲର ଛାତ ଉପରେ ଠିଆ ହୋଇ ଆତ୍ମହତ୍ୟାର ଧମକ ଦେଇଥିଲେ। ଆତ୍ମହତ୍ୟା ଉଦ୍ୟମର ୩ଟି ଭିଡିଓ କରିବା ସହ ଏକ ସୁଇସାଇଡାଲ ନୋଟ ମଧ୍ୟ ଅରମାନ ଟିକ୍ଟକ୍ରେ ଶେୟାର କରିଥିଲେ। ଏହି ଭିଡିଓରେ ଉକ୍ତ ଘଟଣା ପାଇଁ ସେ ନିଜ ସ୍ତ୍ରୀ ପାୟଲଙ୍କୁ ଦାୟୀ କରିବା ସହ ତାଙ୍କୁ ଏକ ବଳାତ୍କାର ମାମଲାରେ ଫଶାଇଦିଆଯାଇଛି ବୋଲି ଅରମାନ କହିଥିଲେ। ତେବେ ଲୋକମାନେ ବହୁ ବୁଝାସୁଝା କରିବା ପରେ ମଧ୍ୟ ଅରମାନ ତଳକୁ ଓହ୍ଲାଇ ନ ଥିଲୋ। ପରେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତାଙ୍କୁ ଓହ୍ଲାଇବାକୁ ଉଦ୍ୟମ କରିଥିବା ବେଳେ ସେ ମଧ୍ୟ ବିଫଳ ହୋଇଥିଲେ। ଏହାପରେ ସେ ପୋଲିସ ସମ୍ମୁଖରେ କିଛି ଦାବି ରଖିଥିଲେ। ତାଙ୍କ ବିରୋଧରେ ହୋଇଥିବା ସମସ୍ତ ମାମଲାକୁ ରଫାଦଫା କରିବାକୁ ଅରମାନ ପୋଲିସ ନିକଟରେ ଦାବି ରଖିଥିଲେ। ତେବେ ଦୀର୍ଘ ୧୮ଘଣ୍ଟାର ଉଦ୍ୟମ ପରେ ସୋମବାର ସକାଳେ ତାଙ୍କୁ ଛାତ ଉପରୁ ପୋଲିସ ତଳକୁ ଓହ୍ଲାଇଛି। ଏହି ଭିଡିଓ ଭାଇରାଲ ହେବା ପରେ ଏବେ ଟିକ୍ଟକ୍ରେ ଅରମାନଙ୍କ ୫୦ହଜାରରୁ ଉର୍ଦ୍ଧ୍ୱ ଫଲୋର୍ସ ଥିବା ଜଣାପଡ଼ିଛି।
