ମେଲବୋର୍ନ, ୮।୩(ପି.ଟି.)- ଆୟୋଜକ ଅଷ୍ଟ୍ରେଲିଆ ରେକର୍ଡ ପଞ୍ଚମଥର ପାଇଁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଟି୨୦ ମହିଳା ବିଶ୍ୱକପ୍ ଟାଇଟଲ ହାସଲ କରିଛି। ରବିବାର ଅନୁଷ୍ଠିତ ଫାଇନାଲ ମ୍ୟାଚ୍ରେ ଅଷ୍ଟ୍ରେଲିଆ ବୃହତ୍ ୮୫ ରନରେ ଭାରତକୁ ହରାଇ ଚାମ୍ପିୟନ ହୋଇଛି। ଉଦ୍ଘାଟନୀ ମ୍ୟାଚ୍ରେ ଭାରତ ଗତଥରର ଚାମ୍ପିୟନ ଅଷ୍ଟ୍ରେଲିଆକୁ ହରାଇ ବିଜୟ ଅଭିଯାନ ଆରମ୍ଭ କରିଥିଲା। ତେବେ ଫାଇନାଲ ମ୍ୟାଚ୍ରେ ଏହି ପ୍ରଦର୍ଶନକୁ ଦୋହରାଇବାରେ ଭାରତ ବିଫଳ ହୋଇ ଏକ ପ୍ରକାର ଆତ୍ମ ସମର୍ପଣ କରିଛି। ପ୍ରଥମେ ଦମ୍ଦାର ବ୍ୟାଟିଂ ଓ ପରେ ଉଚ୍ଚକୋଟୀର ବୋଲିଂ ସହାୟତାରେ ଅଷ୍ଟ୍ରେଲିଆ ଶେଷରେ ବାଜି ମାରିଛି।
ଐତିହାସିକ ମେଲବୋର୍ନ କ୍ରିକେଟ ଗ୍ରାଉଣ୍ଡ (ଏମ୍ସିଜି)ରେ ଟସ୍ ଜିତି ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ଦୁଇ ଓପନର ଏଲିସା ହିଲି ଓ ବେଥ ମୁନୀଙ୍କ ଧୂଆଁଧାର ବ୍ୟାଟିଂ ବଳରେ ନିର୍ଦ୍ଧାରିତ ୨୦ ଓଭରରେ ୪ ଉଇକେଟ ହରାଇ ୧୮୪ ରନ ସଂଗ୍ରହ କରିଥିଲା। ଜାବରେ ଭାରତ ୧୯.୧ ଓଭରରେ ୯୯ ରନ କରି ପରାସ୍ତ ହେଇଛି।
୧୮୫ ରନ କଷ୍ଟସାଧ୍ୟ ବିଜୟ ଲକ୍ଷ୍ୟର ପିଛା କରି ଭାରତ ୧୮ ରନରେ ୩ ଉଇକେଟ ହରାଇ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଟୁର୍ନାମେଣ୍ଟରେ ଏପର୍ଯ୍ୟନ୍ତ ଉଚ୍ଚକୋଟୀର ପ୍ରଦର୍ଶନ କରିଥିବା ୧୬ ବର୍ଷୀୟ ଓପନର ଶେଫାଳୀ ବର୍ମା ମାତ୍ର ୨ ରନ କରି ମେଗାନ ସ୍କଟଙ୍କ ବଲ୍ରେ ଉଇକେଟକିପର ହିଲିଙ୍କୁ କ୍ୟାଚ୍ ଦେଇ ପ୍ରଥମେ ଆଉଟ ହୋଇଥିଲେ। ଏହାପରେ ଭାରତୀୟ ଇନିଂସ ତାସ ଘରପରି ଭୁସୁଡି ପଡିଥିଲା। ବେକରେ ବଲ୍ ବାଜିବା କାରଣରୁ ଉଇକେଟକିପର ବ୍ୟାଟ୍ସଓମ୍ୟାନ ତାନିୟା ଭାଟିଆଙ୍କ ରିଟାୟାର୍ଡ ହର୍ଟ ହୋଇ ପ୍ୟାଭିଲିୟନ ଫେରିଥିଲେ। ଜେମିମା ରୋଡ୍ରିଗୁଏଜ ଖାତା ଖେଲିବା ପୂର୍ବରୁ ପ୍ୟାଭିଲିୟନ ଫେରିଥିଲେ। ଫର୍ମରେ ନ ଥିବା ଅଭିଜ୍ଞ ଓପନର ସ୍ମୃତି ମାନ୍ଧନା ୧୧ ରନ କରିଥିବା ବେଳେ ସୋଫି ମୋଲିନିକ୍ସଙ୍କ ବଲ୍ରେ ମିଡ୍ ଅଫ୍ରେ ନିକୋଲା କାରେଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏହାପରେ ପାଳି ପଡିଥିଲା ଅଧିନାୟିକା ହରମନପ୍ରୀତ କୌରଙ୍କର। ହରମନପ୍ରୀତ ମାତ୍ର ୪ ରନ କରି ପ୍ୟାଭିଲିୟନ ଫେରିଥିଲେ। ଏହାପରେ ବେଦା କ୍ରିଷ୍ଣମୂର୍ତ୍ତୀ ୧୯, ଦୀପ୍ତି ଶର୍ମା ସର୍ବାଧିକ ୩୩, ଶିଖା ପାଣ୍ଡେ ୨, ରିଚା ଘୋଷ ୧୮, ରାଧା ଯାଦବ ୧ ଓ ପୁନମ ଯାଦବ ୧ ରନ କରି ଆଉଟ ହୋଇଥିଲେ। ରାଜେଶ୍ୱରୀ ଗାଏକ୍ୱାଡ ୧ ରନକରି ଅପରାଜିତ ରହିଥିଲେ। ବୋଲିଂରେ ଅଷ୍ଟ୍ରେଲିଆ ତରଫରୁ ମେଗାନ ସ୍କଟ ସର୍ବାଧିକ ୪, ଜେସ୍ ଜୋନାସିନ ୩, ମୋଲିନିକ୍ସ, ଡେଲିସା କିମିନ୍ସ ଓ ନିକୋଲା କେରୀ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ମୁନୀ- ହିଲିଙ୍କ ଧୂଆଁଧାର ବ୍ୟାଟିଂ
ପୂର୍ବରୁ ଟସ୍ ଜିତି ବ୍ୟାଟିଂ କରିବା ନିଷ୍ପତ୍ତି ଅଷ୍ଟ୍ରେଲିଆ ପାଇଁ ବେଶ୍ ଲାଭଦାୟକ ସାବ୍ୟସ୍ତ ହୋଇଥିଲା। ଦୁଇ ଓପନର ଏଲିସା ହିଲି ଓ ବେଥ ମୁନୀ ଭାରତୀୟ ବୋଲରଙ୍କୁ ନିର୍ମମ ପ୍ରହାର କରିବା ସହ ପଡିଆର ଚତୁର୍ଦିଗକୁ ଶଟ୍ମାନ ଖେଳିଥିଲେ। ଭାରତୀୟ ଦୁର୍ବଳ ଫିଲ୍ଡିଂର ଫାଇଦା ଉଠାଇ ଏହି ଦୁଇ ଖେଳାଳି ପ୍ରଥମ ଉଇକେଟରେ ୭୧ ବଲର ୧୧୫ ରନ ସଂଗ୍ରହ କରିଥିଲେ। ଟୁର୍ନାମେଣ୍ଟରେ ଏପର୍ଯ୍ୟନ୍ତ ଉଚ୍ଚକୋଟୀର ପ୍ରଦର୍ଶନ କରି ଆସିଥିବା ଭାରତୀୟ ବୋଲର ଫାଇନାଲ ମ୍ୟାଚ୍ରେ ନିହାତି ମାମୁଲି ସାବ୍ୟସ୍ତ ହୋଇଥିଲେ। ଇନିଂସର ପଞ୍ଚମ ବଲ୍ରେ ହିଲି ଜୀବନଦାନ ପାଇଥିଲେ। ଦ୍ରୁତ ବୋଲର ଦୀପ୍ତି ଶର୍ମାଙ୍କ ବଲ୍ରେ ସେ ଶେଫାଳୀ ବର୍ମାଙ୍କୁ କ୍ୟାଚ୍ ଦେଇଥିଲେ। ତେବେ ଶେଫାଳୀ ଏହି କ୍ୟାଚ୍ ହାତଛଡ଼ା କରିଥିଲେ। ଏହାର ଭରପୂର ଫାଇଦା ଉଠାଇ ଥିଲେ ଉଇକେଟକିପର ବ୍ୟାଟ୍ସଓମ୍ୟାନ ହିଲି। ସେ ମାତ୍ର ୩୯ଟି ବଲ୍ର ସମ୍ମୁଖୀନ ହୋଇ ୭ ଚୌକା ଓ ୫ ଛକା ସହ ୭୫ ରନର ଅର୍ଦ୍ଧଶତକୀୟ ପାଳି ଖେଳି ଶତକ ଆଡକୁ ଅଗ୍ରସର ହେଉଥିବା ବେଳେ ରାଧା ଯାଦବଙ୍କ ବଲ୍ରେ ଲଙ୍ଗ୍ ଅନ୍ରେ ବେଦା କ୍ରିଷ୍ଣମୂର୍ତ୍ତୀଙ୍କୁ କ୍ୟାଚ୍ ଦେଇ ପ୍ୟାଭିଲିୟନ ଫେରିଥିଲେ। ଏହାପରେ ଅଧିନାୟିକା ମେଗ୍ ଲାନିଂ ଦ୍ରୁତ ଗତିରେ ରନ୍ ସଂଗ୍ରହ କରିବାକୁ ଯାଇ ୧୫ ବଲରେ ୨ ଚୌକା ସହ ୧୬ ରନ ସଂଗ୍ରହ କରି ଦୀପ୍ତି ଶର୍ମାଙ୍କ ବଲ୍ରେ ସ୍କୋୟାର ଲେଗ୍ରେ ଶିଖା ପାଣ୍ଡେଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଆଶଲେ ଗାର୍ଡନର ୨ ରନ କରିଥିବା ବେଳେ ଉଇକେଟକିପର ତାନିୟା ଭାଟିଆଙ୍କ ଦ୍ୱାରା ଷ୍ଟମ୍ପ ଆଉଟ ହୋଇ ଦୀପ୍ତିଙ୍କ ଦ୍ୱିତୀୟ ଶିକାର ହୋଇଥିଲେ। ଶେଷରେ ରାଚେଲ ହେନ୍ସ ୪ ରନ କରି ଲାଇନ୍ ମିସ୍ କରିବା ସହ ସ୍ପିନର ପୁନମ ଯାଦବଙ୍କ ଦ୍ୱାରା କ୍ଲିନ୍ ବୋଲ୍ଡ ହୋଇଥିଲେ। ଓପନର ମୁନୀ ୫୪ଟି ବଲର ସମ୍ମୁଖୀନ ହୋଇ ୧୦ ଚୌକା ସହ ୭୮ ରନ କରି ଶେଷ ପର୍ଯ୍ୟନ୍ତ ଅପରାଜିତ ରହିବା ସହ ଦଳକୁ ବୃହତ୍ ସ୍କୋର ପ୍ରଦାନ କରିଥିଲେ। ନିକୋଲା କ୍ୟାରୀ ୫ ରନ କରି ଅପରାଜିତ ରହିଥିଲେ। ବୋଲିଂରେ ଭାରତ ତରଫରୁ ଦୀପ୍ତି ୨, ପୁନମ ଓ ରାଧା ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଅଷ୍ଟ୍ରେଲିଆ ୨୦ ଓଭରରେ ୧୮୪/୪
(ମୁନୀ- ୭୮*, ହିଲି- ୭୫, ଲାନିଂ- ୧୬, ଦୀପ୍ତି- ୨/ ୩୮, ପୁନମ- ୧/୩୦, ରାଧା-୧/ ୩୪)।
ଭାରତ ୧୯.୧ ଓଭରରେ ୯୯ରେ ଅଲ୍ଆଉଟ
(ଦୀପ୍ତି- ୩୩, କ୍ରିଷ୍ଣମୂର୍ତ୍ତୀ- ୧୯, ଘୋଷ- ୧୮, ସ୍କଟ- ୪/୧୮, ଜୋନାସିନ- ୩/୨୦)।
