ବ୍ରହ୍ମପୁର ଅଫିସ,୮ା୬ : ସହରରେ ପୁଣି ଥରେ ଲୁଟେରାଦଳ ସକ୍ରିୟ ହୋଇ ଉଠିଛନ୍ତି। ଶୁକ୍ରବାର ରାତିରେ ବୈଦ୍ୟନାଥପୁର ଥାନା ଅନ୍ତର୍ଗତ ଖୋଡାସିଂ ରାମକୃଷ୍ଣ ନଗର ୪ର୍ଥ ଲେନ୍ରେ ରହୁଥିବା ଆଇନଜୀବୀ କେଶବ ଚନ୍ଦ୍ର ମହାନ୍ତିଙ୍କ ଘର ତାଲା ଭାଙ୍ଗି ଦୁର୍ବୃତ୍ତମାନେ ସୁନା ଗହଣା ସହ ନଗଦ ଟଙ୍କା ଲୁଟି ନେଇଛନ୍ତି। ପ୍ରକାଶ ଯେ, ଶୁକ୍ରବାର ରାତିରେ ଆଇନଜୀବୀଙ୍କ ସ୍ତ୍ରୀ ନିଜ ପୁଅକୁ ଟିଉସନରୁ ଆଣିବା ପାଇଁ ଘରେ ତାଲା ପକାଇ ବାହାରକୁ ଯାଇଥିଲେ । ରାତି ପ୍ରାୟ ୯ଟା ବେଳେ ଘରକୁ ଫେରି ତାଲା ଭଙ୍ଗା ଯାଇଥିବା ଦେଖିବାକୁ ପାଇଥିଲେ। ଘର ଭିତରକୁ ଯାଇ ଆଲମିରା ଭଙ୍ଗାଯାଇଥିବା ଦେଖିଥିବା ବେଳେ ସେଥିରେ ଥିବା ୮ ଭରି ଗହଣା ଓ ନଗଦ ୫୦ ହଜାର ଟଙ୍କା ଗାଏବ ହୋଇଥିବା ଜାଣିବାକୁ ପାଇଥିଲେ। କୌଣସି କାମରେ କେଶବ ଜାମସେଦପୁର ଯାଇଥିଲେ। ଶନିବାର ସକାଳେ ଆଇନଜୀବୀ ମହାନ୍ତି ଘରେ ପହଞ୍ଚି ଚୋରି ସମ୍ପର୍କରେ ବୈଦ୍ୟନାଥପୁର ଥାନାରେ ଅଭିଯୋଗ କରିଥିଲେ। ୧୧୩/୧୯ରେ ପୋଲିସ ଏକ ମାମଲା ରୁଜୁ କରି ଘଟଣାର ଅନୁସନ୍ଧାନ ଚଳାଇଛି। ଅଞ୍ଚଳରେ ଖଞ୍ଜାଯାଇଥିବା ସିସି ଟିଭି ଫୁଟେଜ୍ ସଂଗ୍ରହ କରି ଚୋରଙ୍କୁ ଧରିବା ପାଇଁ ପ୍ରୟାସ ଜାରି ରଖିଥିବା ପୋଲିସ କହିଛି।
