ପର୍ଲା, ୨୦।୨ (ଡି.ଏନ୍.ଏ.)- କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲ ଅଧୀନ ଜୟନ୍ତପୁର ପଁଚେତ୍ ବାରିକପଡ଼ା ଗାଁର ସ୍ବର୍ଗତ ମା’ବାପ୍ ଦିଆଲୁ ଦୁର୍ଗା ଆର କେନ୍ଦୁବୁଢ଼ୀକଁର ୪ ପୁଓ ଗୌରୀଆ(୭୮), ରାମଦାସ(୭୫), ଦମ (୭୧), ରାମଜିଲା(୬୨)। ପୁଓମାନେ ଯୁଆନ ବେଲେ ପରହର କାମ୍ବୁତା କରି ଦୁଇପଏସା ରୁଜ୍ଗାର କରୁଥିଲେ। ପରିବାରଟା ହଁସ୍ଖୁସିରେ ଚଲିଯାଉଥିଲା। ହେଲେ କେହେନ୍ସି ଅଜନା ରୋଗ୍ରେ ପଡ଼ି ୩ ପୁଓ ନିଜର ଦୃଷ୍ଟିଶକ୍ତି ହରାଲେ। ଆଏଜ୍ ବି ୩ ଭାଇ ଚିକିଛା ଅଭାବୁ ଅଁଧ୍ ଜୀବନ୍ ବିତଉଛନ୍।
ସୂଚନା ଅନ୍ସାରେ ବାରିକପଡ଼ାର ସ୍ବର୍ଗତ ଦିଆଲୁ ଦୁର୍ଗା ଆର କେନ୍ଦୁବୁଢ଼ୀକଁର ଦୁଇ ନମ୍ବର ପୁଓ ରାମଦାସକୁଁ ୨୫ ବଛର ହେଲାବେଲେ ସେ ଜରେ ପଡ଼ଲେ। ସଖାଲ ପାଏଲା ବେଲେ ଆର ତାକର ଆଏଁଖ୍ ନାଇଁ ଦିଶ୍ଲା। ସେନ୍ତା ଦମକୁଁ ୨୧ ବଛର ହେଲା ବେଲେ କେହେନ୍ସି କାରନ୍ରୁ ତାକର ଆଏଁଖ୍ରେ ସଂକରମନ୍ ହେଲା। ଦୁଇଦିନ୍ ଉତାରୁ ତାକର ବି ଆଏଁଖ୍ ନାଇଁ ଦିଶ୍ଲା। ରାମଜିଲାକୁଁ ୨୩ ବଛର ହେଲାବେଲେ ସେ ଜରେ ପଡ଼ଲେ। ଜର ପରଭାବରେ ତାକର ବି ଆଏଁଖ୍ ନାଇଁ ଦିଶ୍ଲା। ଏନ୍ଥେଇ ଭିନେ ଭିନେ ସମିଆରେ ୩ ଭାଇ କେହେନ୍ସି ଅଜନା ରୋଗ୍ ପରଭାରୁ ଅଁଧ୍ ପାଲଟିଗଲେ। ୪୦ରୁ ୪୫ ବଛର ତଲେ କଳାହାଣ୍ଡି ଜିଲାରେ ଆଏଜ୍କାଲି ଲେଖେଁ ଚିକିଛା ସୁବିଧା ନାଇଁଥାଇ। ଗରିବ୍ ମା’ବାପ୍ ସେ ସମିଆରେ ଫୁକାଝରା, ଚେରମୂଲି ଉଷୋକଷା କରିଥିଲେ। ହେଲେ କିଛି ଲାଭ୍ ନାଇଁହେଲା। ଏହେଦେ ମା’ବାପ୍ ଆରପାରେ, ତିନି ଭାଇ ବୁଢ଼ା ହେଲେନ। ହେଲେ ସେ ପୂରବର କଥାକେ ଆଏଜ୍ ବି ହେଜି ଆଏଁଖରୁ ଲହ ଗଡ଼ଉଛନ୍। ଚିକିଛା ଅଭାବୁ ସତେ ଯେନ୍ତା ସେମାନକର ଜୀବନ୍ ଅଭିଶାପ ପାଲଟିଯାଇଛେ। ରାମଦାସ ଆଏଁଖ୍ ଭଲ ଥିଲାବେଲେ ବିହା ହେଇଥିଲେ। ତାକର ମାଏକିନା, ଦୁଇ ପୁଓ ଆର ଗୁଟେ ଝି’ ରହିଛନ୍। ହେଲେ ଦମ ଆର ରାମଜିଲା ଦୁଇ ଭାଇକର ଘର ସଁସାର ବଲି କିଛି ନାଇଁ। ଦୁଇ ଭାଇ ବଡ଼ ଭାଇ ଘରେ ଆଶ୍ରେ ନେଇଛନ୍। ଇଆଡ଼େ ସରକାରୀ ସାହାଯ୍ କହେଲେ ରାଶନକାର୍ଡରେ ମାସିକ ୫ କେ.ଜି. ଚାଉଲ ଆର ୫ଶହ ଟଁକା ଭତା ମିଲୁଛେ। ହେଲେ ଅଭାବ ଅନାଟନ ଲାଗି ଦମ ଆର ରାମଜିଲା ବାଟ ଅଁଡ଼ାଲି ଅଁଡ଼ାଲି ଆସର ପାସର ଗଁାମାନକେ ଭିଖ୍ ମାଗୁଛନ୍। ସେନ୍ତା ରାମଦାସ ବି ମାଏକିନାର ସାହାରା ନେଇ ଭିଖ୍ ମାଗି କୁଟୁମ ପୁଷୁଛନ୍। ପରଶାସନ ଇମାନକୁ ଭିନ୍ନକ୍ଷମ ପରମାନପତର, ଭତା, ଚାଉଲ ଦେଉଛେ ସତ୍। ହେଲେ କେଭେ ଚିକିଛା ସାହାଯ୍ ନାଇଁ ଦେଇ ବଲି ତିନି ଭାଇ ମନ୍ଦୁଖ କରି କହିଛନ୍। ହୁଏତ ଆଏଜ୍ ବି ଚିକିଛା କଲେ ତିନିଭାଇ ଦୁରୁଷ୍ଟି ଶକ୍ତି ଫିରିପାଏତେ, ଆଘର ଲେଖେଁ ଦୁନିଅଁାର ରଂଗ ଦେଖିପାରତେ। ଇ ତିନି ଭାଇକର ଉପରେ ଜିଲା ପରଶାସନ ଆର ସ୍ବାସ୍ଥ୍ୟ ବିଭାଗ ଦୁରୁଷ୍ଟି ଦେଇ ଚିକିଛା ସାହାଯ୍, ମାସିକ ୩୫ କେ.ଜି. ଲେଖେଁ ଚାଉଲ ଜୁଗେଇ ଦେବାକେ ଗାଁବାସୀ ଦାବି କରିଛନ୍। ଇ ବାବ୍ଦେ ଜିଲା ମୁଖିଆ ଚିକିଛା ଅଧ୍କାରୀ ଜଗୁଲାଲ ଅଗ୍ରଓ୍ବାଲକୁଁ ପଚ୍ରାଲାରୁ ଆମେ ଖାଲି ଭିନ୍ନକ୍ଷମ ପରମାନପତର ଦେଇ ପାରମୁ, ଇଥ୍ରେ ସେମାନେ ଭତା ପାଇପାରବେ। ବାକି କିଛି ସୁବିଧା ଯୁଗେଇ ଦେବାର ସମ୍ଭବ ନୁହେ ବଲି ସେ କହିଥିଲେ।
