ନୟାଗଡ଼ ଅଫିସ,୧୩।୯ : ନୟାଗଡ଼ ଜିଲା ରଣପୁର ବ୍ଲକ ସୁଆଁସିଆସାହି ଅଙ୍ଗନୱାଡ଼ି କେନ୍ଦ୍ରରେ ୨୦୧୨ ମସିହା ଜୁଲାଇ ୯ରେ କାନ୍ଥ ଭୁଶୁଡ଼ି ୭ ଜଣ କୋମଳମତି ଶିଶୁଙ୍କ ଜୀବନ ଚାଲିଯାଇଥିଲା। ଏହା ପରେ ପ୍ରଶାସନ ପକ୍ଷରୁ ଅଙ୍ଗନଓ୍ବାଡି କେନ୍ଦ୍ର ଓ ସ୍କୁଲ ଗୃହଗୁଡିକ ତଦାରଖ ପାଇଁ କିଛି ଦିନ ଧରି ତତ୍ପରତା ପ୍ରକାଶ ପାଇଥିଲା। କିନ୍ତୁ ତା’ ପରେ ଯଥା ପୂର୍ବଂ ତଥା ପରଂ ଅବସ୍ଥା। ଏ ଦିଗରେ ପ୍ରଶାସନ ସେଭଳି ତପତ୍ରତା ଦେଖାଉ ନାହିଁ। ଜିଲାର ଅନେକ ବିଦ୍ୟାଳୟର ଶ୍ରେଣୀଗୃହରେ ବିପଦସଙ୍କୁଳ ଅବସ୍ଥାରେ ଛାତ୍ରୀଛାତ୍ର ପାଠ ପଢ଼ୁଥିବାର ଦେଖିବାକୁ ମିଳୁଛି।
ଓଡ଼ଗାଁ ବ୍ଲକ ଅଧୀନରେ ଥିବା ଗୋଲଗାଁ ଅପଗ୍ରେଡ଼ ଏମ୍ଇ ସ୍କୁଲକୁ ଉଦାହହରଣ ଭାବେ ନିଆଯାଇପାରେ। ଉକ୍ତ ବିଦ୍ୟାଳୟର ୭ଟି ଶ୍ରେଣୀଗୃହ ବିପଦସଙ୍କୁଳ ଅବସ୍ଥାରେ ଥିବାବେଳେ ଏହାର ମରାମତି କରାଯାଉନାହିଁ। ବିଦ୍ୟାଳୟ ପରିଚାଳନା କମିଟି ଓ ପ୍ରଧାନ ଶିକ୍ଷକ ଏ ନେଇ ବିଡିଓ, ବିଇଓ, ଡିପିସି, ଡିଇଓ ଓ ଜିଲାପାଳଙ୍କଠାରେ ଅନେକ ସମୟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ। ଫଳରେ ବାଧ୍ୟ ହୋଇ ବିପଦସଙ୍କୁଳ ଗୃହରେ ଛାତ୍ରୀଛାତ୍ରମାନେ ପାଠ ପଢ଼ୁଥିବା ଦେଖିବାକୁ ମିଳୁଛି। ଯଦି କୌଣସି ଅଘଟଣ ଘଟିବ ତାହା ହେଲେ ଏଥିପାଇଁ କିଏ ଦାୟୀ ରହିବ ବୋଲି ଅଭିଭାବକମାନେ ପ୍ରଶ୍ନ କରିଛନ୍ତି।
ଯେ, ଗୋଲଗାଁ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୩୯ ଜଣ ଛାତ୍ରୀଛାତ୍ର ପାଠ ପଢ଼ୁଛନ୍ତି। ବିଦ୍ୟାଳୟରେ ଗୋଟିଏ କାର୍ଯ୍ୟାଳୟ ଓ ୯ଟି ଶ୍ରେଣୀଗୃହ ରହିଛି। ୯ ଶ୍ରେଣୀଗୃହରୁ ୪ଟିର ଛାତରୁ ପ୍ଲାଷ୍ଟର ଖସି ରଡ ବାହାରି ଝୁଲି ରହିଛି। କେତେବେଳେ ଯେ ଛାତ ଗଳି ପଡ଼ିବା ଆଶଙ୍କା ରହିଛି। ସେହିଭଳି ୩ଟି ଶ୍ରେଣୀଗୃହର କାନ୍ଥ ଫାଟି ଆଁ କରିି ରହିଛି। ଅବଶିଷ୍ଟ ୨ଟି ଶ୍ରେଣୀଗୃହ ଠିକ୍ଠାକ୍ ରହିଛି। ୮ଟି ଶ୍ରେଣୀର ପିଲାମାନଙ୍କୁ ଦୁଇଟି ଭଲ ଥିବା ଶ୍ରେଣୀଗୃହରେ ପଢ଼ାଯାଇ ପାରୁନାହିଁ। ଫଳରେ ବାଧ୍ୟ ହୋଇ ବିଦ୍ୟାଳୟ କର୍ତ୍ତୃପକ୍ଷ କାନ୍ଥ ଫାଟିଥିବା ୩ଟି ଶ୍ରେଣୀଗୃହରେ ପିଲାମାନଙ୍କୁ ପାଠପଢ଼ାଉଛନ୍ତି। ୫ଟି ଶ୍ରେଣୀ ଗୃହରେ ୮ ଶ୍ରେଣୀର ଛାତ୍ରୀଛାତ୍ର ପାଠ ପଢ଼ୁଛନ୍ତି। ଗୋଟିଏ ଶ୍ରେଣୀଗୃହରେ ଦୁଇଟି ଶ୍ରେଣୀର ପିଲାମାନେ ପାଠ ପଢୁଥିବାରୁ ପ୍ରଥମ ଶ୍ରେଣୀ ପିଲା ଦ୍ୱିତୀୟ ଶ୍ରେଣୀ ପାଠ ଓ ଦ୍ୱିତୀୟ ଶ୍ରେଣୀ ପିଲା ପ୍ରଥମ ଶ୍ରେଣୀ ପାଠ ପଢ଼ୁଥିବାର ଦେଖିବାକୁ ମିଳୁଛି। ଏ ନେଇ ବିଦ୍ୟାଳୟର ପ୍ରଧାନ ଶିକ୍ଷକ ରାଜେନ୍ଦ୍ର ପ୍ରସାଦ ଖଟେଇଙ୍କୁ ପଚାରିବାରୁ ସେ କୁହନ୍ତି ବିଦ୍ୟାଳୟର ସମସ୍ୟା ନେଇ ବିଭିନ୍ନ ଆଡ଼େ ଅଭିଯୋଗ ହୋଇଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ। ବିଦ୍ୟାଳୟରେ ଭଲ ଶ୍ରେଣୀଗୃହ ନ ଥିବାରୁ ବାଧ୍ୟ ହୋଇ ବିପଦସଙ୍କୁଳ ଘରେ ପାଠପଢ଼ା ଯାଉଥିବା ସେ ପ୍ରକାଶ କରିଥିଲେ। ଏ ଦିଗରେ ଜିଲା ପ୍ରଶାସନ ଧ୍ୟାନ ଦେଇ ତୁରନ୍ତ ବିଦ୍ୟାଳୟ ମରାମତି କରିବା ପାଇଁ ଅଭିଭାବକ ମହଲରେ ଦାବି ହେଉଛି।
