ନ୍ୟୁୟର୍କ: ୧୯୯୦ ଅପେକ୍ଷା ବର୍ତ୍ତମାନର ମଧ୍ୟ ବୟସ୍କମାନେ ଅଧିକ ଚାପରେ ରହୁଥିବା ଏକ ଅଧ୍ୟୟନରୁ ଜଣାପଡ଼ିଛି। ଏପରିକି କୋଭିଡ୍-୧୯ ଆରମ୍ଭ ହେବା ପୂର୍ବରୁ ଏଭଳି ସ୍ଥିତି ଦେଖାଦେଇଆସିଛି। ପେନ୍ ଷ୍ଟେଟ୍ ୟୁନିଭର୍ସିଟି ପକ୍ଷରୁ କରାଯାଇଥିବା ଅଧ୍ୟୟନ ବେଳେ ସବୁ ବର୍ଗକୁ ବିଚାରକୁ ନିଆଯାଇଥିଲା। ଏଥିରୁ ଜଣାପଡ଼ିଥିଲା ଯେ, ୧୯୯୦ ତୁଳନାରେ ୨୦୧୦ରେ ଲୋକଙ୍କ ଉପରେ ସାମାନ୍ୟ ଚାପ ବୃଦ୍ଧି ପାଇଛି। କିନ୍ତୁ ଗବେଷକମାନେ ଯେତେବେଳେ ବୟସକୁ ୪୫ରୁ ୬୪ ମଧ୍ୟରେ ସୀମିତ ରଖିଦେଲେ, ସେତେବେଳେ ସେମାନଙ୍କ ଚାପର ସ୍ତର ବହୁଗୁଣିତ ହୋଇଯାଇଥିଲା। ଗବେଷକ ଡାଭିଡ୍ ଏମ୍. ଆଲ୍ମୈଡା ଜାଣିବାକୁ ପାଇଥିଲେ ଯେ, ୧୯୯୦ ଅପେକ୍ଷା ୨୦୧୦ରେ ଲୋକେ ୧୯ ପ୍ରତିଶତ ଅଧିକ ଅବସାଦରେ ରହୁଛନ୍ତି। ଅର୍ଥାତ୍ ବର୍ଷକୁ ଏମାନେ ୬୪ରୁ ଊର୍ଦ୍ଧ୍ୱ ଦିନ ଅଧିକ ଚାପରେ ରହିଥାଆନ୍ତି।
‘ଆମେରିକାନ୍ ସାଇକୋଲୋଜିଷ୍ଟ’ରେ ଏ ସଂକ୍ରାନ୍ତ ଲେଖା ପ୍ରକାଶ ପାଇଛି। ଏଥିରେ ଦର୍ଶାଯାଇଛି ଯେ, ରିସର୍ଚ୍ଚ ଟିମ୍ ୧୯୯୫ରେ ୧,୪୯୯ ବୟସ୍କ ଓ ୨୦୧୨ରେ ୭୮୨ ଜଣ ବିଭିନ୍ନ ବୟସ୍କଙ୍କୁ ନେଇ ଅଧ୍ୟୟନ କରିଥିଲେ। ଏ ସମସ୍ତଙ୍କର ଦୈନିକ ୮ ଦିନ ଯାଏ ସାକ୍ଷାତ୍କାର ନିଆଯାଇଥିଲା। ଏଥିରେ ପ୍ରତ୍ୟେକ ଅଂଶଗ୍ରହଣକାରୀଙ୍କୁ ବିଗତ ୨୪ ଘଣ୍ଟାର ଚାପଗ୍ରସ୍ତ ଅଭିଜ୍ଞତା ବଖାଣିବାକୁ କୁହାଯାଉଥିଲା। ପରିବାର କିମ୍ବା ସାଙ୍ଗସାଥୀଙ୍କ ମଧ୍ୟରେ ଉଚ୍ଚବାଚ କିମ୍ବା ଘରେ ବା କାର୍ଯ୍ୟସ୍ଥଳୀରେ ସମ୍ମୁଖୀନ ହେଉଥିବା ସମସ୍ୟାକୁ ଏଥିରେ ଗୁରୁତ୍ୱ ଦିଆଯାଇଥିଲା । ସେଥିରୁ ଲୋକଙ୍କ ଚାପଗ୍ରସ୍ତ ଜୀବନକୁ ବୁଝିବା ସମ୍ଭବ ହୋଇଥିଲା ବୋଲି ଆଲମୈଡା କହିଛନ୍ତି। ତଥ୍ୟଗୁଡ଼ିକୁ ବିଶ୍ଳେଷଣ କରିବା ପରେ ଗବେଷକମାନେ ଜାଣିପାରିଥିଲେ ଯେ, ୧୯୯୦ ଅପେକ୍ଷା ୨୦୧୦ରେ ସେମାନଙ୍କ ଚାପ ବହୁମାତ୍ରରେ ବଢ଼ିଚାଲିଥିଲା। ତେବେ କେତେକ ଅଂଶଗ୍ରହଣକାରୀଙ୍କ ମଧ୍ୟରୁ ୨୭ ପ୍ରତିଶତ ଆର୍ଥିକ ଅବସ୍ଥା ଖରାପ ଥିବା ନେଇ ଚିନ୍ତିତ ହୋଇପଡ଼ୁଥିବା କହିଥିବା ବେଳେ ୧୭ ପ୍ରତିଶତ ସେମାନଙ୍କ ଭବିଷ୍ୟତ ଯୋଜନାକୁ ଚାପ ଘୋର ପ୍ରଭାବିତ କରିବ ବୋଲି ଆଶଙ୍କା ବ୍ୟକ୍ତ କରିଥିଲେ।
ଆଲମୈଡା ଆଶ୍ଚର୍ଯ୍ୟ ପ୍ରକଟ କରିଥିଲେ, ଗତ ୯୦ ଦଶକ ଅପେକ୍ଷା ବର୍ତ୍ତମାନ ଲୋକଙ୍କ ଚାପ ପରିମାଣ ବୃଦ୍ଧି ପାଇଥିଲେ ହେଁ ବିଶେଷକରି ବିଭିନ୍ନ ବର୍ଗଙ୍କ ବୟସ ମୁଖ୍ୟତଃ ପ୍ରଭାବିତ କରିଥିଲା। ଆମେ ଭାବୁଥିଲୁ ଯେ, ଯୁବବର୍ଗଙ୍କ ପାଇଁ ଅର୍ଥନୈତିକ ଅସ୍ଥିରତା ଯୋଗୁ ଜୀବନ ଅଧିକ ଚାପଗ୍ରସ୍ତ ହେଉଛି। କିନ୍ତୁ ତାହା ଭାବିବା ଠିକ୍ ନ ଥିଲା ବୋଲି ସେ କହିଥିଲେ। କିନ୍ତୁ ମଧ୍ୟବୟସ୍କମାନେ ସବୁଠାରୁ ଅଧିକ ଚାପଗ୍ରସ୍ତ ଅଛନ୍ତି। କାରଣ ସେମାନଙ୍କ ପିଲାମାନେ ଅସ୍ଥିର ନିଯୁକ୍ତି ବଜାରରେ ଘଣ୍ଟି ହେଉଥିବା ବେଳେ ନିଜ ମାତାପିତାଙ୍କ ଦାୟିତ୍ୱ ନେଇ ଚିନ୍ତିତ ଥାଆନ୍ତି। ଏହି ବୟସର ବ୍ୟକ୍ତି ଏଭଳି ପିଢ଼ିଗତ ସମସ୍ୟା ବୁଝିବାକୁ ଯାଇ ଚାପରେ ଚିପୁଡ଼ି ହୋଇଯାଇଥାଆନ୍ତି ବୋଲି ଆଲମୈଡା କହିଛନ୍ତି।
