କିଭ୍,୨୫।୨: ରୁଷିଆ-ୟୁକ୍ରେନ୍ ଯୁଦ୍ଧକୁ ସୋମବାର ୩ ବର୍ଷ ପୂରିଛି। ୨୦୨୨ ଫେବୃଆରୀ ୨୪ରେ ରୁଷିଆ ସେନା ୟୁକ୍ରେନ୍ ଉପରେ ଆକ୍ରମଣ ଆରମ୍ଭ କରିଥିଲା। ଏହି ଯୁଦ୍ଧରେ ଉଭୟ ଦେଶ ବ୍ୟାପକ କ୍ଷତି ସହିଲେଣି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଦେଶର ବିଦେଶ ନୀତିରେ ପରିବର୍ତ୍ତନ ଆଣି ୟୁକ୍ରେନ୍କୁ ସହାୟତା ବନ୍ଦ କରିବା ସହ ରୁଷିଆ ପକ୍ଷ ନେବା ପରେ ଯୁଦ୍ଧ ବନ୍ଦ ପାଇଁ ଉଦ୍ୟମ ଆରମ୍ଭ ହୋଇଛି। ଏହି ଉଦ୍ୟମ କ୍ରମେ ମସ୍କୋ ଏବଂ କିଭ୍ ମଧ୍ୟରେ ସମସ୍ତ ଯୁଦ୍ଧବନ୍ଦୀମାନଙ୍କୁ ବିନିମୟ କରିବା ପାଇଁ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର୍ ଜେଲେନ୍ସ୍କି ସୋମବାର ପ୍ରସ୍ତାବ ଦେଇଛନ୍ତି। ରୁଷିଆ ୟୁକ୍ରେନୀୟମାନଙ୍କୁ ମୁକ୍ତ କରିବା ଜରୁରୀ। ଏହା ବଦଳରେ ୟୁକ୍ରେନ୍ ସମସ୍ତ ରୁଷୀୟ ବନ୍ଦୀଙ୍କୁ ମୁକ୍ତ କରିବାକୁ ପ୍ରସ୍ତୁତ ବୋଲି ଜେଲେନ୍ସ୍କି ଯୁଦ୍ଧର ୩ ବର୍ଷ ପୂର୍ତ୍ତି ଅବସରରେ କିଭ୍ରେ ଏକ ସମିଟ୍କୁ ଉଦ୍ବୋଧନ ଦେଇ କହିଛନ୍ତି। ଗତବର୍ଷ ଅକ୍ଟୋବରରେ ୟୁଏଇ ମଧ୍ୟସ୍ଥତାରେ ୯୫ ଜଣ ବନ୍ଦୀ ବିନିମୟ ହୋଇଥିଲେ। ଏହା ପୂର୍ବରୁ ସେପ୍ଟେମ୍ବରରେ ୧୦୩ ଜଣ ବନ୍ଦୀଙ୍କୁ ଅଦଳବଦଳ କରାଯାଇଥିଲା। ୩ ବର୍ଷ ଧରି ୟୁକ୍ରେନ୍ର ପ୍ରତିରୋଧ ଏବଂ ସାହସକୁ ଜେଲେନ୍ସ୍କି ପ୍ରଶଂସା କରିଛନ୍ତି। ସୂଚନାଯୋଗ୍ୟ, ୟୁକ୍ରେନ୍କୁ ନାଟୋ ସଦସ୍ୟତା ମିଳିଲେ ଜେଲେନ୍ସ୍କି ରାଷ୍ଟ୍ରପତି ପଦ ଛାଡ଼ିବାକୁ ପ୍ରସ୍ତୁତ ବୋଲି ଦିନକ ପୂର୍ବରୁ କହିଥିଲେ।
Russia-Ukraine war: ଗତ ମଙ୍ଗଳବାର ରିୟାଧରେ ଆମେରିକା ଏବଂ ରୁଷିଆ ପ୍ରତିନିଧିଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା। ୟୁକ୍ରେନ୍ ଯୁଦ୍ଧ ବନ୍ଦ ପାଇଁ ଏକାଠି କାର୍ଯ୍ୟ କରିବାକୁ ଉଭୟ ଦେଶ ରାଜି ହେବା ସହ କୂଟନୈତିକ ଏବଂ ଅର୍ଥନୈତିକ ସମ୍ପର୍କ ବଢ଼ାଇବାକୁ ସହମତ ହୋଇଥିଲେ। ବୈଠକରେ ଆମେରିକା ପରରାଷ୍ଟ୍ର ସଚିବ ମାର୍କୋ ରୁବିଓ ଏବଂ ତାଙ୍କ ରୁଷିଆ ପ୍ରତିପକ୍ଷ ସର୍ଗେଇ ଲାଭରୋଭଙ୍କ ସମେତ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
Russia-Ukraine war:ଯୁଦ୍ଧ ବନ୍ଦ ପାଇଁ ବିଭିନ୍ନ ଦେଶ ଏକାଠି କାର୍ଯ୍ୟ କରିବାକୁ ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ ସୋମବାର ଆହ୍ବାନ ଦେଇଛନ୍ତି। ୟୁକ୍ରେନ୍ ଯୁଦ୍ଧର ୩ ବର୍ଷ ପୂର୍ତ୍ତିରେ ଏକ ସ୍ଥାୟୀ ଶାନ୍ତି ପାଇଁ ଉଦ୍ୟମ ହେବା ଆବଶ୍ୟକ ବୋଲି ସେ ମତ ଦେଇଛନ୍ତି। ଯୁଦ୍ଧ ବନ୍ଦ ଦିଗରେ କୌଣସି ଉଦ୍ୟମ ହାତଛଡ଼ା କରାଯିବ ନାହିଁ ବୋଲି ଗୁଟେରେସ୍ ଗେନେଭାସ୍ଥିତ ଜାତିସଂଘ ମାନବାଧିକାର ପରିଷଦର ଏକ ଉଚ୍ଚସ୍ତରୀୟ ବୈଠକରେ କହିଛନ୍ତି। ୨୦୨୨ ଫେବୃଆରୀରେ ରୁଷିଆର କାର୍ଯ୍ୟ ଜାତିସଂଘ ଚାର୍ଟରର ଉଲ୍ଲଂଘନ ବୋଲି ମାନବାଧିକାର ପରିଷଦ କହିଛି।
Russia-Ukraine war:ଯୁଦ୍ଧର ୩ ବର୍ଷ ପୂର୍ତ୍ତି ଅବସରରେ ସୋମବାର ୟୁରୋପ ଏବଂ କାନାଡାର ବହୁ ନେତା ୟୁକ୍ରେନ୍ ରାଜଧାନୀ କିଭ୍ରେ ପହଞ୍ଚତ୍ଛନ୍ତି। ସେମାନେ ୟୁକ୍ରେନ୍କୁ ସମର୍ଥନ ଜଣାଇଛନ୍ତି। ୟୁରୋପୀୟ କମିଶନ୍ର ଅଧ୍ୟକ୍ଷ ଉର୍ସୁଲା ଭନ୍ ଡେର୍ ଲେୟେନ ଏବଂ କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ କିଭ୍ରେ ପହଞ୍ଚତ୍ଥିବାବେଳେ ସେମାନଙ୍କୁ ୟୁକ୍ରେନ୍ ବହିର୍ବ୍ୟାପାର ମନ୍ତ୍ରୀ ରେଳଷ୍ଟେଶନରେ ସ୍ବାଗତ କରିଥିଲେ। ୟୁକ୍ରେନ୍ ୟୁରୋପରେ ହୋଇଥିବାରୁ ସମଗ୍ର ୟୁରୋପ ଏହି ଦେଶ ସହ ରହିଛି ବୋଲି ଲେୟେନ ସୋସିଆଲ ମିଡିଆରେ ଲେଖିଛନ୍ତି। ଅନ୍ୟମାନଙ୍କ ମଧ୍ୟରେ ୟୁରୋପିଆନ୍ କାଉନ୍ସିଲ ଅଧ୍ୟକ୍ଷ ଆଣ୍ଟୋନିଓ କୋଷ୍ଟା ଉତ୍ତର ୟୁରୋପୀୟ ଦେଶ ଏବଂ ସ୍ପେନ୍ ପ୍ରଧାନମନ୍ତ୍ରୀ କିଭ୍ରେ ଯୁଦ୍ଧର ତୃତୀୟ ବର୍ଷ ପୂର୍ତ୍ତିରେ ଯୋଗଦେବାକୁ ଯାଇଛନ୍ତି। ଡୋନାଲ୍ଡ ଟ୍ରମ୍ପ୍ କ୍ଷମତାକୁ ଆସିବା ପରେ ଆମେରିକା ନୀତିରେ ପରିବର୍ତ୍ତନ ହୋଇଥିବାରୁ ଏନେଇ ୟୁରୋପୀୟ ନେତାମାନେ ଜେଲେନ୍ସ୍କିଙ୍କ ସହ ଆଲୋଚନା କରିବେ। ଟ୍ରମ୍ପ୍ଙ୍କ କାର୍ଯ୍ୟାନୁଷ୍ଠାନର ମୁକାବିଲା ପାଇଁ ୟୁରୋପ ଏହାର ରଣନୀତି ଆରମ୍ଭ କରିଛି। ମାର୍ଚ୍ଚ ୬ରେ ୨୭ ଜଣ ୟୁରୋପୀୟ ୟୁନିୟନ ନେତାଙ୍କୁ ନେଇ ଜରୁରୀ ବୈଠକ ବସିବାକୁ ଯାଉଥିଲାବେଳେ ସେଥିରେ ୟୁକ୍ରେନ୍ ମୁଖ୍ୟ ପ୍ରସଙ୍ଗ ରହିଛି।
