ନୂଆଦିଲ୍ଲୀ,୧୦।୧:ଶେଖ ହାସିନାଙ୍କୁ ନେଇ ଭାରତ ସରକାର ନିଷ୍ପତ୍ତି ନେବା ପରେ ଆଖି ଦେଖାଇଛନ୍ତି ୟୁନୁସ ସରକାର। ବାଂଲାଦେଶର ମହମ୍ମଦ ୟୁନୁସଙ୍କ ମଧ୍ୟବର୍ତ୍ତୀକାଳୀନ ସରକାର ଶେଖ ହାସିନାଙ୍କ ଭାରତୀୟ ଭିସା ପ୍ରସଙ୍ଗରେ ସ୍ପଷ୍ଟୀକରଣ ଦେଇଛନ୍ତି। ସରକାର ସ୍ପଷ୍ଟ କରିଛନ୍ତି ଯେ ଭିସା ଅବଧି ବୃଦ୍ଧି ତାଙ୍କ ପ୍ରତ୍ୟର୍ପଣ ଅନୁରୋଧ ସହିତ କୌଣସି ସମ୍ପର୍କ ନାହିଁ। ଏହି ବିବୃତ୍ତି ପରେ ଭାରତରେ ହାସିନାଙ୍କ ସ୍ଥିତିକୁ ନେଇ ବିବାଦକୁ ଏକ ନଆ ମୋଡ଼ ଦେଇଛି।
ବାଂଲାଦେଶରେ ଛାତ୍ରମାନଙ୍କ ଦ୍ୱାରା ହୋଇଥିବା ବିଶାଳ ପ୍ରତିବାଦ ପରେ ହାସିନା ଗତ ବର୍ଷ ଅଗଷ୍ଟ ମାସରୁ ଭାରତରେ ଅଛନ୍ତି। ବାଂଲାଦେଶ ସରକାର ତାଙ୍କୁ ଫେରାଇ ଆଣିବା ପାଇଁ ଭାରତକୁ ଅନୁରୋଧ କରିଛନ୍ତି କିନ୍ତୁ ତାଙ୍କ ଭିସାର ଅବଧି ବୃଦ୍ଧି ପ୍ରସଙ୍ଗକୁ ଆହୁରି ଜଟିଳ କରିଦେଇଛି। ବାଂଲାଦେଶ ହାସିନାଙ୍କ ପାସପୋର୍ଟ ବାତିଲ କରି କହିଛି ଯେ ଏହା ତାଙ୍କ ସ୍ବଦେଶ ପ୍ରତ୍ୟାବର୍ତ୍ତନ ପ୍ରକ୍ରିୟାର ଏକ ଅଂଶ।
ବାଂଲାଦେଶ ବୈଦେଶିକ କାର୍ଯ୍ୟାଳୟର ମୁଖପାତ୍ର ରଫିକୁଲ ଆଲାମ ଗଣମାଧ୍ୟମକୁ କହିଛନ୍ତି ଯେ ଭିସା ଅବଧି ବୃଦ୍ଧିର ତାଙ୍କ ପ୍ରତ୍ୟର୍ପଣ ଅନୁରୋଧ ସହିତ କୌଣସି ସମ୍ପର୍କ ନାହିଁ। ଆଲାମ କହିଛନ୍ତି ଯେ ଯେତେବେଳେ ଜଣେ ବାଂଲାଦେଶୀ ନାଗରିକଙ୍କ ପାସପୋର୍ଟ ବାତିଲ କରାଯାଏ, ସେତେବେଳେ ବାଂଲାଦେଶୀ ମିଶନ ମାଧ୍ୟମରେ ସମ୍ପୃକ୍ତ ଦେଶକୁ ସୂଚିତ କରାଯାଏ ଏବଂ ଏପରି କ୍ଷେତ୍ରରେ ଭିସା ଆଉ ଆବଶ୍ୟକ ହୁଏ ନାହିଁ।
ବାଂଲାଦେଶ ସରକାରଙ୍କ ଅନୁସାରେ, ହାସିନାଙ୍କ ପ୍ରତ୍ୟର୍ପଣ ସମ୍ପର୍କରେ ସେମାନଙ୍କ ପାଖରେ ଅଧିକ ସୂଚନା ନାହିଁ ଏବଂ ଏହା ଉପରେ ଅନୁମାନ କରାଯିବ ନାହିଁ। ମୁଖପାତ୍ର ଆହୁରି ମଧ୍ୟ କହିଛନ୍ତି ଯେ ହାସିନା ଏବଂ ଅନ୍ୟମାନଙ୍କ ବିରୋଧରେ ଅଭିଯୋଗ ଗମ୍ଭୀର, ଯେଉଁଥିରେ ବଳପୂର୍ବକ ନିଖୋଜ ଏବଂ ହତ୍ୟାରେ ସମ୍ପୃକ୍ତି ରହିଛି। ଆପଣଙ୍କୁ କହିରଖୁଛୁ ଯେ, ହାସିନାଙ୍କ ଭାରତୀୟ ଭିସା ସ୍ଥିତି ଏବଂ ବାଂଲାଦେଶ ସରକାରଙ୍କ ପ୍ରତ୍ୟର୍ପଣ ଅନୁରୋଧ ଆଞ୍ଚଳିକ ରାଜନୀତିରେ ନୂଆ ପ୍ରଶ୍ନ ଉଠାଇଛି। ଏହି ମାମଲା ଦୁଇ ଦେଶ ମଧ୍ୟରେ କୂଟନୈତିକ ଆଲୋଚନାକୁ ପ୍ରଭାବିତ କରିପାରେ, ଏବଂ ଏହାର ଫଳାଫଳ ଆଗାମୀ ସମୟରେ ସ୍ପଷ୍ଟ ହୋଇପାରେ।
