ଲକ୍ଷ୍ନୌ,୨୮।୩: ଉତ୍ତରପ୍ରଦେଶ କୁଶୀନଗରରେ ଭାଜପାର ବିଜୟ ଉତ୍ସବ ପାଳନ ସମୟରେ ଜଣେ ମୁସଲମାନ ଯୁବକ ବାବରଙ୍କ ମୃତ୍ୟୁ ଘଟଣାରେ ତାଙ୍କ ପରିବାରବର୍ଗଙ୍କୁ ଯୋଗୀ ସରକାର କ୍ଷତିପୂରଣ ରାଶି ଘୋଷଣା କରିଛନ୍ତି। ମୃତକଙ୍କ ପରିବାର ଲୋକଙ୍କୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସୋମବାର ୨ଲକ୍ଷ ଟଙ୍କା ସହାୟତା ରାଶି ଦେବାକୁ ଘୋଷଣା କରିଛନ୍ତି। ସୂଚନାଯୋଗ୍ୟ, କୁଶୀନଗରର ରାମକୋଲା ଥାନା ଅଞ୍ଚଳର କଠଘରହି ଗାଁରେ ୨୬ ବର୍ଷୀୟ ବାବର ଅଲି ବିଧାନସଭା ନିର୍ବାଚନରେ ଭାଜପାର ବିଜୟ ସହ ସରକାର ଗଠନ ଉତ୍ସବ ପାଳନ କରୁଥିଲେ। ଭାଜପାର ବିଜୟରେ ଉତ୍ସାହିତ ହୋଇ ବାବର ଅଲି ଲୋକଙ୍କ ମଧ୍ୟରେ ମିଠା ବାଣ୍ଟିଥିଲେ, ଯାହା ତାଙ୍କ ପଡ଼ୋଶୀର କିଛି ଲୋକଙ୍କୁ ପସନ୍ଦ ଆସି ନ ଥିଲା। ଏହାପରେ ତାଙ୍କ ଘର ପାଖରେ ରହୁଥିବା କିଛି ଲୋକ ବାବରଙ୍କୁ ମାଡ଼ ମାରିଥିଲେ। ଆହତ ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ଯୁବକଙ୍କୁ ପ୍ରଥମେ ଜିଲା ଡାକ୍ତରଖାନା ଓ ପରେ ଲକ୍ଷ୍ନୌକୁ ସ୍ଥାନାନ୍ତରିତ କରାଯାଇଥିଲା। କିନ୍ତୁ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ଅନ୍ୟପଟେ ତାଙ୍କ ମୃତ୍ୟୁକୁ ନେଇ ଗାଁର ଲୋକମାନେ ଉତ୍ତ୍ୟକ୍ତ ହୋଇପଡ଼ିଥିଲେ। ରବିବାର ତାଙ୍କ ମୃତଦେହ ଗାଁରେ ପହଞ୍ଚିବା ପରେ କ୍ରୋଧିତ ଲୋକେ ତାଙ୍କୁ କବର ଦେବା ପାଇଁ ମନା କରିଦେଇଥିଲେ। କିନ୍ତୁ ନେତା ଓ ପ୍ରଶାସନ ସେମାନଙ୍କୁ ବୁଝାସୁଝା କରିବା ପରେ ବାବରଙ୍କୁ ଶେଷ ବିଦାୟ ଦିଆଯାଇଥିଲା।
