ଶାହାଜାହାନପୁର,୫ା୧୦: ଉତ୍ତରପ୍ରଦେଶର ଶାହାଜାହାନପୁରରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ରାସ୍ତାକାମ ଠିକା ନେଇଥିବା କମ୍ପାନୀ କମିଶନ ନେ ଦେବାରୁ ସ୍ଥାନୀୟ ଭାଜପା ବିଧାୟକଙ୍କ ପ୍ରତିନିଧି ବୁଲ୍ଡୋଜର ଲଗାଇ ନିର୍ମାଣାଧୀନ ରାସ୍ତାର ଅଧା କିଲୋମିଟର ଖୋଳିଦେଇଛନ୍ତି। ଅନ୍ୟପକ୍ଷେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାସ୍ତା ଖୋଳିଥିବା ଲୋକଙ୍କଠାରୁ କ୍ଷତିପୂରଣ ଆଦାୟ କରିବାକୁ ନିର୍ଦ୍ଦେଶ ଦେଇଥିବା ଜଣେ ଅଧିକାରୀ ପ୍ରକାଶ କରିଛନ୍ତି।
ପୂର୍ତ୍ତ ବିଭାଗ ଅଧୀନରେ ଶାହାଜାହାପୁରରୁ ବୁଦାଉନ୍କୁ ରାସ୍ତା ନିର୍ମାଣ ହୋଇଥିଲା। ଠିକା କମ୍ପାନୀର ମ୍ୟାନେଜର ରମେଶ ସିଂଙ୍କ ଅଭିଯୋଗ କ୍ରମେ ୧୫-୨୦ ଜଣଙ୍କ ନାମରେ ଏତଲା ଦାଏର ହୋଇଛି। ଅଭିଯୁକ୍ତଙ୍କ ମଧ୍ୟରେ କଟ୍ରା ଭାଜପା ବିଧାୟକ ବୀରବିକ୍ରମ ସିଂଙ୍କ ପ୍ରତିନିଧି ଜଗବୀର ସିଂ ନାଁ ମଧ୍ୟ ରହିଛି। ରାସ୍ତା ନିର୍ମାଣ ପାଇଁ ଜଗବୀର ସମ୍ପୃକ୍ତ ଠିକା କମ୍ପାନୀଠାରୁ ୫ ପ୍ରତିଶତ କମିଶନ ଦାବି କରିଥିଲେ। କମିଶନ ନ ମିଳିବାରୁ ଜଗବୀର ଗତ ୨ ତାରିଖରେ ବୁଲ୍ଡୋଜର ଲଗାଇ ରାସ୍ତା ଖୋଳି ଦେଇଥିଲେ। ଏହି ଘଟଣା ଏବେ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
