ଲୋଇସିଂହା,୧୩ା୩(ଡି.ଏନ୍.ଏ.): ବଲାଙ୍ଗୀର ଜିଲା ଲୋଇସିଂହା ପଞ୍ଚାୟତ ସମିତି ଅଧ୍ୟକ୍ଷ ପଦବୀକୁ ଲାଗି ରହିଥିବା ଦ୍ୱନ୍ଦ୍ୱ ଓ କଳ୍ପନାଜଳ୍ପନା ଶନିବାର ଅନ୍ତ ଘଟିଛି। ଏମ୍ପି କଳିକେଶ ନାରାୟଣ ସିଂଦେଓଙ୍କ ସମର୍ଥିତ ପ୍ରାର୍ଥୀ ଝିଲି ସାହୁଙ୍କୁ ୪ ଖଣ୍ଡ ଭୋଟ୍ରେ ହରାଇ ଯତୀନ୍ଦ୍ର ପଟେଲ ଅଧ୍ୟକ୍ଷ ନିର୍ବାଚିତ ହୋଇଛନ୍ତି। ବିଗତ ୫ ବର୍ଷର ବିକାଶକୁ ନେଇ ଲୋକେ ସମର୍ଥନ ଜଣାଇଛନ୍ତି। ଏଥିପାଇଁ ଜନସାଧାରଣଙ୍କୁ କୃତଜ୍ଞତା ଜଣାଉଛି। ଏହି ବିକାଶ ଧାରା ଆଗାମୀ ୫ ବର୍ଷ ଧରି ଜାରି ରହିବ। ଅଧ୍ୟକ୍ଷ ବିଜୟୀକୁ ନେଇ ମନ୍ତ୍ରୀ ସୁଶାନ୍ତ ସିଂଙ୍କୁ ଶ୍ରେୟ ଦେଇଛନ୍ତି। ବିଜେଡି ସମର୍ଥିତ ଓ ନେତା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୋଲି ତାଙ୍କ ପ୍ରତିକ୍ରିୟାରେ କହିଛନ୍ତି ଯତୀନ୍ଦ୍ର।
ସୂଚନାଯୋଗ୍ୟ, ଗତ ଫେବୃୟାରୀ ୧୮ରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଅନୁଷ୍ଠିତ ହୋଇଥିଲା। ବ୍ଲକର ୩୩ ଓ ୩୪ ନଂ ଜୋନ୍ରୁ ବିଜେଡି ଜିଲା ପରିଷଦ ପ୍ରାର୍ଥୀ ବିଜୟୀ ହୋଇଥିଲେ। ଅଧ୍ୟକ୍ଷ ପଦବୀ ଅଣସଂରକ୍ଷିତ ରହିଥିବାରୁ ବ୍ଲକ ହୀରାପୁର ପଞ୍ଚାୟତରୁ ବିଜେଡି ଜିଲା ଯୁବ ଉପସଭାପତି ନୀତେଶ କୁମାର ଅଗ୍ରୱାଲ ଓ ବ୍ଲକ ଉପାଧ୍ୟକ୍ଷ ଯତୀନ୍ଦ୍ରଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ଲାଗି ରହିଥିଲା। ଯତୀନ୍ଦ୍ରଙ୍କ ବିରୋଧରେ ପୂର୍ବତନ ଏମ୍ପି କଳିକେଶ ନାରାୟଣ ସିଂଦେଓ ପ୍ରଚାର କରିଥିଲେ ବି କୌଣସି ପ୍ରଭାବ ପଡ଼ି ନ ଥିଲା। ନୀତେଶ କୁମାର ଅଗ୍ରଓ୍ବାଲଙ୍କ ଠାରୁ ଅଧିକ ୪୫ ଖଣ୍ଡ ଭୋଟ ପାଇ ଯତୀନ୍ଦ୍ର ବିଜୟୀ ହୋଇଥିଲେ। ପରାଜୟ ସତ୍ତ୍ୱେ ନୀତେଶ ଗୋଷ୍ଠୀ ଜଣେ ସମର୍ଥିତ ପ୍ରାର୍ଥୀଙ୍କୁ ଅଧ୍ୟକ୍ଷ ପଦବୀରେ ବସାଇବାକୁ କଷରତ ଆରମ୍ଭ କରିଥିଲେ। ନୀତେଶ ଓ ଯତୀନ୍ଦ୍ରଙ୍କ ଗୋଷ୍ଠୀରେ ୧୦ ଜଣ ଲେଖାଏ ସମିତିସଭ୍ୟ ଥିଲେ। ତେବେ ଶନିବାର ବ୍ଲକ ଅଧ୍ୟକ୍ଷ ପଦବୀ ଚୟନ ନିମନ୍ତେ ବ୍ଲକ ସଭା ଗୃହରେ ନିର୍ବାଚନ ଅନୁଷ୍ଠିତ ହୋଇଥିଲା। ଏଠାରେ ଲୋଇସିଂହା ତହସିଲଦାର ସଂଘମିତ୍ରା କାଲୋ ମାଜଷ୍ଟ୍ରେଟ ଦାୟିତ୍ୱରେ ଥିଲେ। ନିର୍ବାଚନ ଅଧିକାରୀ ଭାବେ ଆଗଲପୁର ବିଡିଓ ଶଙ୍କର କେରକେଟାଥିଲେ। ୨୦ ଜଣ ନିର୍ବାଚିତ ସମିତିସଭ୍ୟଙ୍କ ଉପସ୍ଥିତିରେ ବିଜେଡିର ଦୁଇ ଗୋଷ୍ଠୀ ଉପରବାହଲ ପଞ୍ଚାୟତରୁ ବିଜୟୀ ହୋଇଥିବା ସମିତି ଝିଲି ସାହୁ ଓ ହୀରାପୁର ସମିତସଭ୍ୟ ଯତୀନ୍ଦ୍ର ନିର୍ଦ୍ଧାରିତ ସମୟରେ ନାମାଙ୍କନ ଦାଖଲ କରିଥିଲେ। ଝିଲି ସାହୁ ୮ ଖଣ୍ଡ ଭୋଟ ପାଇଥିବାବେଳେ ଯତନ୍ଦ୍ର ୧୨ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ। ତେବେ ଦୁଇ ଗୋଷ୍ଠୀ ସପକ୍ଷରେ ୧୦ ଜଣ ଲେଖାଏ ସମିତିସଭ୍ୟ ଥିବା ସତ୍ତ୍ୱେ ୨ ଖଣ୍ଡ ଭୋଟ ଗଣତି ବେଳେ ଯତୀନ୍ଦ୍ରଙ୍କ ସପକ୍ଷରେ ୧୨ଖଣ୍ଡ ଭୋଟ ଯାଇଥିବାରୁ ନୀତେଶ ସମର୍ଥିତ ଗୋଷ୍ଠୀଙ୍କ ଦୁଇ ପ୍ରାର୍ଥୀ କ୍ରସିଂଭୋଟିଂ କରିଥିବା ନେଇ ସାଧାରଣରେ ଚର୍ଚ୍ଚାର ବିଷୟ ହୋଇଛି।
