ଜୟପୁର,୨୮ା୪: ଓପନର ଯଶସ୍ବୀ ଜୟସ୍ବାଲଙ୍କ ଅର୍ଦ୍ଧଶତକ ବଳରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷ ମ୍ୟାଚରେ ନିର୍ଦ୍ଧାରିତ ଓଭରରେ ୫ ଉଇକେଟ ହରାଇ ୨୦୨ ରନ୍ ସଂଗ୍ରହ କରିଛି ରାଜସ୍ଥାନ ରୟାଲ୍ସ। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ପକ୍ଷରୁ ଜୟସ୍ବାଲ ଦ୍ରୁତ ୭୭ କରିଥିବା ବେଳେ ଶେଷ ଆଡକୁ ଧ୍ରୁବ ଜୁରେଲ ୩୪ ଓ ଦେବଦତ୍ତ ପଡିକଲ ୨୪* ଦ୍ରୁତ ବ୍ୟାଟିଂ କରିବା ଫଳରେ ରାଜସ୍ଥାନ ୨୦୦ ରନ୍ ପାର କରିଥିଲା।
ରାଜସ୍ଥାନର ସଓ୍ବାଇ ମାନସିଂହ ଷ୍ଟାଡିୟମରେ ଖେଳା ଯାଇଥିବା ମ୍ୟାଚରେ ଦୁଇ ଓପନର ଯଶସ୍ବୀ ଜୟସ୍ବାଲ ଓ ଜୋସ ବଟଲର ପ୍ରଥମ ଉଇକେଟରେ ୮୬ ରନ୍ ଯୋଡିଥିଲେ। ୨୧ ବଲ ଖେଳି ୨୭ ରନ୍ କରିଥିବା ବଟଲରଙ୍କୁ ଆଉଟ କରି ରବୀନ୍ଦ୍ର ଜାଡେଜା ଚେନ୍ନାଇକୁ ପ୍ରଥମ ସଫଳତା ପ୍ରଦାନ କରିଥିଲେ। ପରେ ଜୟସ୍ବାଲଙ୍କ ସହିତ କ୍ରିଜ୍ରେ ଯୋଗ ଦେଇଥିଲେ ସାମସନ୍। ବଲ୍ ପିଛା ରନ୍ କରିଥିବା ସାମସନ୍ ମ୍ୟାଚ୍ର ୧୩ ତମ ଓଭରରେ ଆଉଟ ହୋଇଥିଲେ। ସମାନ ଓଭରରେ ତୁଷାର ଦେଶପାଣ୍ଡେ ଟପ୍ ସ୍କୋରର ଜୟସ୍ବାଲଙ୍କୁ ଆଉଟ କରିବାରୁ ରାଜସ୍ଥାନର ରନ୍ ହାର ଧୀମେଇ ଯାଇଥିଲା। ଜୟସ୍ବାଲ ୪୩ ବଲ୍ ଖେଳି ୮ ଚୌକା ଓ ୪ ଛକା ମାରିଥିଲେ। ଜୟସ୍ବାଲ ଏହା ସହିତ ଚଳିତ ସଂସ୍କରଣରେ ନିଜର ୩୦୦ ରନ୍ ପୂରଣ କରିଛନ୍ତି। ଜୟସ୍ବାଲ ଆଉଟ ହେବା ପରେ ନିର୍ଭରଯୋଗ୍ୟ ସିମରନ୍ ହେଟମେୟର (୮) ରନ୍ କରି ଆଉଟ ହେବାରୁ ରାଜସ୍ଥାନ ସଙ୍କଟରେ ପଡିଥିଲା। ତେବେ ଧ୍ରୁବ୍ ଜୁରେଲ୍ ୧୫ ବଲ୍ରୁ ୩୪ ଓ ଦେବଦତ୍ତ ପଡିକଲ୍ ୧୩ ବଲ୍ରୁ ଅପରାଜିତ ୨୭ ରନ୍ କରିଥିଲେ। ଜୁରେଲଙ୍କ ଇନିଂସରେ ୩ ଚୌକା ଓ ୨ ଛକା ସାମିଲ ଥିବା ବେଳେ ପଡିକଲ୍ ୪ ଚୌକା ମାରି ଦଳୀୟ ସ୍କୋର ୨୦୦ ପାର କରିଥିଲେ। ଚେନ୍ନାଇ ପକ୍ଷରୁ ତୁଷାର ଦେଶପାଣ୍ଡେ ୨ ଉଇକେଟ ନେଇଥିବା ବେଳେ ମହୀଷ ଥିକ୍ସାନା ଓ ରବୀନ୍ଦ୍ର ଜାଡେଜା ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ରାଜସ୍ଥାନ ରୟାଲ୍ସ ୨୦ ଓଭରରେ ୨୦୨/୫(ଯଶସ୍ବୀ ଜୟସ୍ବାଲ-୭୭, ଧ୍ରୁବ୍ ଜୁରେଲ-୩୪, ଦେବଦତ୍ତ ପଡିକଲ୍-୨୭*, ତୁଷାର ଦେଶପାଣ୍ଡେ-୨/୪୨, ମହୀଷ ଥିକ୍ସାନା-୧/୨୪, ରବୀନ୍ଦ୍ର ଜାଡେଜା-୧/୩୨)।
