ଲକ୍ଷ୍ନୌ,୨୫ ।୮: ଯମୁନା ଏକ୍ସପ୍ରେସୱେରେ ଯାତ୍ରା କରୁଥିବା ଲୋକେ ଗୁରୁବାରଠାରୁ ଅଧିକ ଟୋଲ ଟ୍ୟାକ୍ସ ଦେବେ । ଯମୁନା ବିକାଶ ପ୍ରାଧିକରଣ ପକ୍ଷରୁ ଏକ୍ସପ୍ରେସୱେରେ ଟୋଲ ଟ୍ୟାକ୍ସ ଦାମ ବୃଦ୍ଧି କରିଛନ୍ତି । ଏ ସମ୍ପର୍କରେ ପ୍ରାଧିକରଣର ମୁଖ୍ୟ କାର୍ଯ୍ୟପାଳକ ଅଧିକାରୀ ଡା. ଅରୁଣ ବୀର ସିଂହ ସୂଚନା ଦେଇଛନ୍ତି । ବୁଧବାର ପ୍ରାଧିକରଣର ୭୪ ତମ ବୋର୍ଡ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ପ୍ରାଧିକରଣର ବୁଧବାର ହୋଇଥିବା ବୈଠକରେ ଯମୁନା ଏକ୍ସପ୍ରେସୱେ ଟୋଲ ଟ୍ୟାକ୍ସକୁ ନେଇ ନିଷ୍ପତ୍ତି ନିଆଯାଇଛି । ବୈଠକ ପରେ ମୁଖ୍ୟ କାର୍ଯ୍ୟପାଳକ ଅଧିକାରୀ ଡା. ଅରୁଣ ବୀର ସିଂହ କହିଛନ୍ତି, ଗ୍ରେଟର ନଏଡାରୁ ଆଗ୍ରା ପର୍ଯ୍ୟନ୍ତ ୧୬୫ କିଲୋମିଟର ପର୍ଯ୍ୟନ୍ତ ଏକ୍ସପ୍ରେସୱେର ଟୋଲ ଦାମ ବୃଦ୍ଧି କରାଯାଇଛି । ଅଧିକାରୀ କହିଛନ୍ତି ଏହା ପୂର୍ବରୁ ୨୦୧୮ରେ ଟୋଲ ଟ୍ୟାକ୍ସ ଦାମରେ ବୃଦ୍ଧି ହୋଇଥିଲା । ଏହାପରେ ଟ୍ୟାକ୍ସ ଦରରେ କୌଣସି ବୃଦ୍ଧି କରାଯାଇ ନ ଥିଲା ।
ବର୍ଦ୍ଧିତ ଦାମ ପରେ କାର, ଜିପ, ଭ୍ୟାନ ଓ ହାଲୁକା ଯାନର କିଲୋମିଟର ପ୍ରତି ଦାମ ୨ଟଙ୍କା ୫୦ ପଇସାରୁ ବୃଦ୍ଧି ହୋଇ ୨ଟଙ୍କା ୬୦ ପଇସା କରାଯିବ । ସେହିପରି ହାଲୁକା କମର୍ସିଆଲ ଯାନ ୩ଟଙ୍କା ୯୦ ପଇସାରୁ ବୃଦ୍ଧି ହୋଇ ୪ଟଙ୍କା ୧୫ ପଇସା କରାଯିବ ।
ବର୍ଦ୍ଧିତ ଟ୍ୟାକ୍ସ ପରେ ବସ ଓ ଟ୍ରକ ୭ଟଙ୍କା ୯୦ ପଇସା ସ୍ଥାନରେ ୮ଟଙ୍କା ୪୫ ପଇସା ଦେବେ । ସେହିପରି ୩ରୁ ଅଧିକ ଚକ ବିଶିଷ୍ଟ ଯାନ ୧୨ଟଙ୍କା ୦୫ ପଇସା ବଦଳରେ ୧୨ ଟଙ୍କା ୯୦ ପଇସା ଦେବେ । ୧୨ ଚକିଆରୁ ଅଧିକ ଚକ ବିଶିଷ୍ଟ ଯାନ ୧୫ ଟଙ୍କା ୫୫ ପଇସା ପରିବର୍ତ୍ତେ ୧୬ଟଙ୍କା ୬୦ ପଇସା ଦେବେ ।
