ବେଜିଂ,୧।୧: କରୋନା ଭୂତାଣୁ ଯୋଗୁ ଅନେକ ଦେଶର ଲୋକେ ନୂତନ ବର୍ଷର ଉତ୍ସବରେ ଯୋଗ ଦେଇ ପାରି ନ ଥିଲେ। ତେବେ ଚାଇନାର ଉହାନ ସହର ଯେଉଁଠି କି ପ୍ରଥମେ ଏହି ଭୂତାଣୁ ଚିହ୍ନଟ ହୋଇଥିଲା। ସେହି ସହରରେ ଗତ କିଛି ମାସ ହେବ କରୋନାର କୌଣସି ମାମଲା ଦେଖିବାକୁ ମିଳିନାହିଁ। ତେଣୁ ଉହାନବାସୀ ବେଶ୍ ଧୂମ୍ଧାମରେ ନୂଆବର୍ଷକୁ ସ୍ବାଗତ କରିଛନ୍ତି।
ନଭେମ୍ବର-ଡିସେମ୍ବର ୨୦୧୯ରେ ଚାଇନାର ଉହାନ ସହରରୁ କରୋନା ଭୂତାଣୁ ସର୍ବପ୍ରଥମେ ସଂକ୍ରମିତ ହୋଇଥିଲା। ଏହି ଭୂତାଣୁର ଭୟାଭୟତାକୁ ଦୃଷ୍ଟିରେ ରଖି ୨୩ ଜାନୁୟାରୀରେ ଉହାନ ସହରରେ ଲକ୍ଡାଉନ୍ ଜାରି କରାଯାଇଥିଲା। ପରେ ଗ୍ରାଉଣ୍ଡ ପ୍ଲେନ, ବସ୍ ଏବଂ ଟ୍ରେନ ସହରକୁ ପ୍ରବେଶ ଉପରେ କଟକଣା ଲଗା ଯାଇଥିଲା।
ନୂଆବର୍ଷ ଅବସରରେ ଅନେକ ଲୋକ ରାସ୍ତାକୁ ବାହାରି ଏହି ଉତ୍ସବ ପାଳନ କରିଥିବା ଦେଖିବାକୁ ମିଳିଛି। ସିଟିହଲ୍ ସମ୍ମୁଖରେ ଲୋକମାନେ ଏକାଠି ହୋଇଥିଲେ। ସେମାନଙ୍କ ମଧ୍ୟରୁ କେତେକଙ୍କ ହାତରେ ବେଲୁନ ଥିବା ବେଳେ ଆଉ କେତେକ ମାସ୍କ ପିନ୍ଧିଥିଲେ। ଏହା ବ୍ୟତୀତ ଅଧିକାଂଶ ଯୁବକ ନୂତନ ବର୍ଷ ଅବସରରେ ନାଇଟ କ୍ଲବ, ପବ-ରେଷ୍ଟୁରାଣ୍ଟ ମୁହାଁ ହୋଇଥିଲେ।
ଉହାନ ପ୍ରଶାସନର ନିରନ୍ତର ପରିଶ୍ରମ ଯୋଗୁ ମେ’ ୨୦୨୦ ପରଠାରୁ ଏହି ସହରରେ ଗୋଟିଏ ବି କରୋନା ମାମଲା ସାମ୍ନାକୁ ଆସିନାହିଁ। ସେବେଠାରୁ ପ୍ରଶାସନ ସତର୍କତା ଅବଲମ୍ବନ କରି ଧୀରେ ଧୀରେ ବଜାର, ବାର୍ ଏବଂ ରେଷ୍ଟୁରାଣ୍ଟ ପରି ସ୍ଥାନ ଖୋଲିବା ଆରମ୍ଭ କରିଛନ୍ତି। ସେପ୍ଟେମ୍ବରରୁ ରାତ୍ରି ଜୀବନ ମଧ୍ୟ ସ୍ବାଭାବିକ ହୋଇଥିଲା।
ଏକ ସାକ୍ଷାତକାରରେ ଉହାନର ଜଣେ ବ୍ୟକ୍ତି କହିଛନ୍ତି, ଆଗାମୀ ଦିନରେ ଲୋକଙ୍କ ହୃଦୟରେ ଏପରି ବିପଦ କେବେ ନ ଆସୁ। ସମଗ୍ର ବିଶ୍ୱ ଏପରି ଏକ ବିପଦର ସାମ୍ନା କରିଛି। ମାତ୍ର ଆମେ ଭାଗ୍ୟବାନ ଯେ, ଏଠାରେ ସବୁ ଜିନିଷ ଧୀରେ ଧୀରେ ସ୍ବାଭାବିକ ହୋଇଛି। ତଥାପି ଆମେ ପୂର୍ଣ୍ଣମାତ୍ରାରେ ସତର୍କତା ଅବଲମ୍ବନ କରିଆସୁଛୁ।
