ଅକଲାଣ୍ଡ,୧୬।୫(ପି.ଟି.): ଜୁନ୍ ୧୮ରୁ ୨୨ ତାରିଖ ମଧ୍ୟରେ ସାଉଥାମ୍ପଟନରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲ ଖେଳାଯିବ। ଏହି ହାଇପ୍ରୋଫାଇଲ ଟାଇଟଲ ମୁକାବିଲା ପାଇଁ ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନ ଡେଭନ କନ୍ଓ୍ବେ ସ୍ବତନ୍ତ୍ର ରଣନୀତି ପ୍ରସ୍ତୁତ କରିଛନ୍ତି। ଭାରତୀୟ ସ୍ପିନରଙ୍କୁ ମୁକାବିଲା କରିବା ପାଇଁ ସେ ନିଜକୁ ପ୍ରସ୍ତୁତ କରୁଛନ୍ତି। ଏଥିପାଇଁ ସେ ଉଇକେଟ ଉପରେ ଧୂଳି ତଥା ଅଳିଆ ପକାଇ ବ୍ୟାଟିଂ ଅଭ୍ୟାସ କରୁଛନ୍ତି। ଏହା ଫଳରେ ସେ ରବିଚନ୍ଦ୍ରନ ଅଶ୍ୱିନଙ୍କ ଭଳି ସ୍ପିନରଙ୍କ ସଫଳ ମୁକାବିଲା କରିବେ।
୨୯ ବର୍ଷୀୟ କନ୍ଓ୍ବେ ଜୁନ୍ ୨ ତାରିଖରୁ ଆରମ୍ଭ ହେବାକୁ ଯାଉଥିବା ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ପାଇଁ ଘୋଷିତ ୨୦ ଜଣିଆ ଦଳରେ ସ୍ଥାନ ପାଇଛନ୍ତି। ଡବ୍ଲ୍ୟୁଟିସି ଫାଇନାଲ ବେଳକୁ ଏହି ଦଳ ୧୫ଜଣରେ ସୀମିତ ରହିବ। ବୋଲରଙ୍କ ପାଦ ଚିହ୍ନରେ ପିଚ୍ ଧୂଳିଆ ତଥା ଅସମାନ ହେବ। ତେଣୁ ପିଚ୍ରେ ଧୂଳି ଓ ଅଳିଆ ପକାଇ ଅଭ୍ୟାସ କରୁଛି ବୋଲି ସେ କହିଛନ୍ତି। ଏହା ଦ୍ୱାରା ଭାରତୀୟ ସ୍ପିନରଙ୍କୁ ମୁକାବିଲା କରିବାରେ ସଫଳ ହେବି ବୋଲି ସେ କହିଛନ୍ତି। କନ୍ଓ୍ବେ ନ୍ୟୁଜିଲାଣ୍ଡ ପାଇଁ ଏ ପର୍ଯ୍ୟନ୍ତ ୩ଟି ଦିନିକିଆ ଓ ୧୪ଟି ଟି୨୦ ମ୍ୟାଚ୍ ଖେଳିଛନ୍ତି। ଧୂଳିଆ ଉଇକେଟରେ ବ୍ୟାଟିଂ କରିବା କଷ୍ଟକର ହୋଇଥାଏ। ଏଥିରେ ବଲ ବହୁତ ଟର୍ନ କରିଥାଏ। ସ୍ପିନରଙ୍କ ବିପକ୍ଷରେ କେବଳ ରକ୍ଷଣାତ୍ମକ ଖେଳିବାକୁ ଚାହୁଁନି। ଏହା ହେଲେ କେତୋଟି ବଲ୍ ପରେ ବିଟ୍ ହେବା ଓ ଆଉଟ ହେବାର ସମ୍ଭାବନା ରହିଛି। ଡବ୍ଲ୍ୟୁଟିସି ଫାଇନାଲ ବେଶ୍ ସଂଘର୍ଷପୂର୍ଣ୍ଣ ଓ ରୋମାଞ୍ଚକ ହେବ ବୋଲି ଆଶା କରାଯାଉଛି।
ଅନ୍ୟପଟେ ଏହି ଫାଇନାଲ ମ୍ୟାଚ୍ରେ ଭାରତ ଅପେକ୍ଷା ନ୍ୟୁଜିଲାଣ୍ଡ ସାମାନ୍ୟ ସୁବିଧାଜନକ ସ୍ଥିତିରେ ରହିଛି ବୋଲି ପୂର୍ବତନ ବ୍ୟାଟ୍ସମ୍ୟାନ ସଞ୍ଜୟ ମଞ୍ଜରେକର କହିଛନ୍ତି। ସାଉଥାମ୍ପଟନରେ ନ୍ୟୁଜିଲାଣ୍ଡ ଘରୋଇ ପରିବେଶରେ ସୁବିଧା ହାସଲ କରିବ। ଅର୍ଥାତ୍ ସାଉଥାମ୍ପଟନ ଓ ନ୍ୟୁଜିଲାଣ୍ଡର ପରିବେଶ ପାଖାପାଖି ସମାନ ଥିବାରୁ ନ୍ୟୁଜିଲାଣ୍ଡ ଫାଇଦାରେ ରହିବ। ଫଳରେ ଭାରତ ପାଇଁ ସାମାନ୍ୟ ଚ୍ୟାଲେଞ୍ଜ ସୃଷ୍ଟି ହେବ। ଓପନର ଭାବେ ରୋହିତ ଶର୍ମା ପ୍ରକୃତ ପରୀକ୍ଷାର ସମ୍ମୁଖୀନ ହେବେ ବୋଲି ମଞ୍ଜରେକର କହିଛନ୍ତି।
