ଏବେ କରୋନାର ଦ୍ୱିତୀୟ ଲହର ଯୋଗୁ ଦେଶରେ ଭିନ୍ନ ପରିସ୍ଥିତି ସୃଷ୍ଟି ହୋଇଛି। ତେବେ ନୀରବ ଘାତକ ଭାବେ ଆଖ୍ୟାୟିତ ଉଚ୍ଚ ରକ୍ତଚାପ ବି କରୋନା ସଂକ୍ରମଣ ଆଶଙ୍କାକୁ ବଢାଉଛି। ଡାଇବେଟିସ୍, ହୃଦ୍ରୋଗ, କିଡ୍ନୀ, ମେଦବହୁଳ, ଦୀର୍ଘକାଳିକ ଶ୍ୱାସରୋଗ, ଉଚ୍ଚ ରକ୍ତଚାପ ଥିବା ବ୍ୟକ୍ତିଙ୍କୁ କରୋନା ସଂକ୍ରମଣ ଅଧିକ ହେଉଥିବା ଅନୁଧ୍ୟାନରୁ ଜଣାଯାଇଛି। ଏବେ ମଧ୍ୟ କୋଭିଡ-୧୯ ସଂକ୍ରମିତଙ୍କଠାରେ ଉଚ୍ଚ ରକ୍ତଚାପ ଅଧିକ ପରିଲକ୍ଷିତ ହେଉଛି।
ଜଣେ ବ୍ୟକ୍ତିର ସାଧାରଣ ରକ୍ତ ଚାପ ହେଉଛି ୧୨୦/୮୦ ଏମଏମ ଏଚଜି। ଯଦି ଏହି ରକ୍ତଚାପ ୧୨୦ରୁ୧୨୯/୮୦ ଏମଏମ ଏଚଜି ହେଲା ତାହାକୁ ଉଚ୍ଚ ରକ୍ତଚାପ, ୧୩୦ରୁ୧୩୯/୮୦ରୁ ୯୦କୁ ଅତ୍ୟଧିକ ଉଚ୍ଚ ରକ୍ତଚାପ (ଲେବୁଲ-୧), ୧୪୦/୯୦ରୁ ଅଧିକ ହେଲେ ଅତ୍ୟଧିକ ଉଚ୍ଚ ରକ୍ତଚାପ (ଲେବୁଲ-୨) ଏବଂ ୧୮୦/୧୨୦ରୁ ଅଧିକକୁ ଉଦ୍ବେଗଜନକ ଉଚ୍ଚ ରକ୍ତଚାପ ବୋଲି କୁହାଯାଏ। କିଡ୍ନୀ,ଡାଇବେଟିସ, ଥାଇରଏଡ୍, ହୃଦରୋଗ ଆଦିରେ ସାଧାରଣ ରକ୍ତଚାପ ଭାବେ ୧୧୦/୭୦ ଏମଏମ ଏଚଜିକୁ ନିଆଯାଇଛି।
ରକ୍ତଚାପ ଥରେ ଅଧିକ ବୋଲି ଜଣାପଡ଼ିଲେ ଔଷଧ ବ୍ୟବହାର ସହିତ କେତେକ କଥା ମାନି ଚଳିବାକୁ ପଡ଼ିଥାଏ। ପ୍ରଥମତଃ ଲୁଣ କମ୍ ଖାଇବେ। ଡାଇବେଟିସକୁ ନିୟନ୍ତ୍ରଣରେ ରଖିବେ। ଚର୍ବିଜାତୀୟ ଖାଦ୍ୟ ଖାଇବେ ନାହିଁ। ନିୟମିତ ବ୍ୟାୟାମ, ଯୋଗ ଏବଂ ପ୍ରାଣାୟାମ କରିବେ। ଶବାସନ ମଧ୍ୟ ରକ୍ତଚାପ ହ୍ରାସ କରିଥାଏ। ଜୀବନଶୈଳୀରେ ପରିିବର୍ତ୍ତନ ଆଣନ୍ତୁ। ନିଶାଦ୍ରବ୍ୟ ସେବନ ଅଭ୍ୟାସ ଥିଲେ ତାହାକୁ ତୁରନ୍ତ ବର୍ଜନ କରନ୍ତୁ। ପ୍ରତି ଘଣ୍ଟାରେ ବସି ନ ରହି ଟିକେ ଚଲାବୁଲା କରନ୍ତୁ। ପ୍ରତିଦିନ ଅତିକମରେ ୪୦ ମିନିଟ୍ ବ୍ୟାୟାମ କରନ୍ତୁ। ଅତିକମରେ ୬-୭ ଘଣ୍ଟା ଶୁଅନ୍ତୁ। ଲିଫ୍ଟ ବ୍ୟବହାର ନ କରି ଶିଡ଼ି ଓ ପାହାଚ ଚଢ଼ି ଯିବାଆସିବା କରନ୍ତୁ। ଏଥିସହ ସବୁଜ ପନିପରିବା, ତଟକା ଫଳମୂଳ, କୋଳି, କ୍ଷୀର, ଓଟ୍, ମିଲ୍, କଦଳୀ, ଚୂନା ମାଛ, ଶାଗ, ଭେଣ୍ଡି, କଲରା, ଜହ୍ନି, ମୁଗଡାଲି, କୋଳଥ ଡାଲି, ବାଜରା, ପୋହା, ପିଆଜ, ରସୁଣ, ଅମୃତଭଣ୍ଡା, ଅଁଳା, ଘୋଳ ଦହି, ସବୁଜ ଚଣା ହେଉଛି ଏହି ରୋଗୀଙ୍କ ପାଇଁ ଉପାଦେୟ ଖାଦ୍ୟ। ତେଣୁ ଯଦି ଆପଣ ଉଚ୍ଚ ରକ୍ତଚାପରେ ପୀଡ଼ିତ ତେବେ ନିୟମିତ ସମୟ ଅନ୍ତରାଳରେ ରକ୍ତଚାପ କେତେ ରହୁଛି ତାହା ଚେକ୍ କରିନିଅନ୍ତୁ ଏବଂ ଔଷଧ ଖାଇବା ସହିତ ଡାକ୍ତରଙ୍କ ସହ ପରାମର୍ଶ କରିବାକୁ ଭୁଲନ୍ତୁ ନାହିଁ।
-ଡା. ରାମଚନ୍ଦ୍ର ରାଉତ
ମୋ : ୯୪୩୭୭୪୨୪୯୯
