ଯାଜପୁର,୧୨ା୧(ହର୍ଷବର୍ଦ୍ଧନ ବେହେରା): ଯାଜପୁର ରୋଡ ବନାଞ୍ଚଳ ଅଧୀନରେ ବେଆଇନ ଭାବେ ଗଛ କଟା ଏବଂ ଚୋରା ଚାଲାଣ ବଢିବାରେ ଲାଗିଛି। ବିଭାଗୀୟ ଅଧିକାରୀ ଏବଂ ମିଲ୍ ମାଲିକଙ୍କ ମଧ୍ୟରେ ଭିତିରି ବୁଝାମଣା ରହିଥିବା ନେଇ ପ୍ରମାଣ ଖୋଲିବାରେ ଲାଗିଛି । ଏପରିକି ମିଲ ମାଲିକମାନଙ୍କ ସମସ୍ତ ବେଆଇନ କାର୍ଯ୍ୟରେ ବନାଞ୍ଚଳ ଅଧିକାରୀ ଓ କର୍ମଚାରୀମାନେ ନୈତିକ ସମର୍ଥନ ଦେଉଥିବା ଅଭିଯୋଗ ହେଉଛି।
ସୂଚନା ମୁତାବକ ଇଡ୍କୋ ପ୍ଲଟ ବଣ୍ଟନ ପରେ ଛୋଟରାୟପୁର ଶିଳ୍ପାଞ୍ଚଳରେ ବର୍ତ୍ତମାନ ସୁଦ୍ଧା ୧୦ କରତକଳ ଗଢି ଉଠିଛି। ତେବେ ଏହି କରତ କଳଗୁଡିକୁ ବିଭିନ୍ନ ସ୍ଥାନରୁ ଚୋରା କାଠ ଆସୁଥିବା ଅଭିଯୋଗ ପରେ ମଧ୍ୟ ଯାଜପୁର ରୋଡ ବନ ବିଭାଗୀୟ ଅଧିକାରୀମାନେ ନୀରବ ରହିଛନ୍ତି। କରତକଳଗୁଡିକରେ କାଠର ରେଟ୍ ଚାର୍ଟ ମରାଯାଇ ନ ଥିବାବେଳେ ମନଇଛା ସାଧାରଣ ଲୋକଙ୍କୁ ଠକି ଚାଲିଛନ୍ତି । ମିଲ ମାଲିକମାନେ ସରକାରୀ ନିୟମାନୁସାରେ କରତକଳଗୁଡ଼ିକରେ ବିକ୍ରି ହେଉଥିବା ସମସ୍ତ କାଠର ସାଇଜ ଅନୁଯାୟୀ ଦର ସାରଣୀ ଲାଗଯିବା ବିଧେୟ। କିନ୍ତୁ ଏଠାରେ ଭିନ୍ନ ନିୟମ ଦେଖିବାକୁ ମିଳିଛି। ସାଧାରଣତଃ ଗ୍ରାମାଞ୍ଚଳର ଲୋକେ କାଠର ମାପ ବିଷୟରେ ଅଜ୍ଞ ରହିଥିବାରୁ ସେମାନଙ୍କୁ ସିଫ୍ଟରେ ଠକି ଏଠାକାର କରତକଳ ମାଲିକମାନେ ଭଲ ରୋଜଗାର କରୁଛନ୍ତି। ଏପରିକି ଏହି କରତକଳରୁ କାଠ କ୍ରୟ ପରେ ଦ୍ରବ୍ୟ ଏବଂ ସେବା କର ରସିଦ ମାଗିଲେ ଅଧିକ ଟଙ୍କା ଦେବାକୁ ପଡିବ ବୋଲି ରୋକଠୋକ୍ ଶୁଣାଇ ଦେଉଛନ୍ତି । ଅନେକ ସମୟରେ ଦ୍ରବ୍ୟ କ୍ରୟ ରସିଦ ଦେବାକୁ ମଧ୍ୟ ଗ୍ରାହକଙ୍କୁ ମନା କରିଦେଉଥିବା ଅଭିଯୋଗ ହୋଇଛି । କାଠର ରେଟ ଚାଟ ସାରଣୀ ଏବଂ ବିଲ ସଂକ୍ରାନ୍ତରେ ଛୋଟରାୟପୁର ଇଡକୋ ପ୍ଲଟ ନଂ. ୬ରେ ଜନତା କରତ କଲ କର୍ମଚାରୀଙ୍କୁ ପଚାରିଲେ ଏଠାରେ କେହି ବିଲ ଦେଉନାହାଁନ୍ତି କି ରେଟ ସାରଣୀ ଲଗାଇନାହାଁନ୍ତି, ତେଣୁ ଆମେ ଲଗାଇନୁ ବୋଲି କହିଥିଲେ । ତେବେ ଏହି ସରକାରୀ ନିୟମ ଉଲ୍ଲଂଘନକାରୀ କରତକଳଗୁଡିକର ଏପରି କାର୍ଯ୍ୟ ସମ୍ପର୍କରେ ସ୍ଥାନୀୟ ବନାଞ୍ଚଳ ଅଧିକାରୀ କିପରି ଜାଣିପାରୁନାହାନ୍ତି ତାହା ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି । ତେବେ ଏନେଇ ଯାଜପୁର ରୋଡ ବନାଞ୍ଚଳ ଅଧିକାରୀ ଜ୍ୟୋତିରଞ୍ଜନ ମହାପାତ୍ରଙ୍କୁ ପଚାରିବାରୁ କାହିଁକି ଦର ସାରଣୀ ଲଗାଯାଇନାହିଁ ସେ ନେଇ ତଦନ୍ତ କରି ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି ।
