ମହାକାଳପଡ଼ା,୧ା୫(ଡି.ଏନ୍.ଏ.): ମେ’ ୧ ତାରିଖକୁ ଶ୍ରମ ଦିବସ ଭାବେ ପାଳନ କରାଯାଉଛି। ଏହା ୧୮୮୬ ମସିହାରୁ ବିଶ୍ୱର ୮୦ଟି ଦେଶରେ ପାଳନ ହୋଇଆସୁଛି। ଏହି ଶ୍ରମ ଦିବସ ପାଳନ କରିବାର ମୁଖ୍ୟ ତାତ୍ପର୍ଯ୍ୟ ହେଲା ଶ୍ରମିକମାନଙ୍କର ହକ୍ ଅଧିକାର, ଅଂଶଗ୍ରହଣ ଓ ଭୂମିକାକୁ ଗୁରୁତ୍ୱ ଦିଆଯାଏ। ବିଶ୍ୱର ଅର୍ଥନୈତିକ କ୍ଷେତ୍ରରେ ଶ୍ରମିକମାନଙ୍କର ମୁଖ୍ୟ ଭୂମିକା ନିର୍ବାହ କରିଥାଏ ବୋଲି କୁହାଯାଏ। ସେହିପରି ଏହି ଦିବସରେ ଶ୍ରମିକମାନେ ସେମାନଙ୍କର ନ୍ୟାଯ୍ୟ ଦାବି ପାଇବା ପାଇଁ ସରକାରଙ୍କ ପକ୍ଷରୁ କିଛି ଘୋଷଣା କରାଯାଏ। ସାମ୍ପ୍ରତିକ ସମାଜରେ ପୁରୁଷ ଶ୍ରମିକଙ୍କୁ ଉପଯୁକ୍ତ ପ୍ରାପ୍ୟ ବା ମଜୁରି ମିଳୁଥିବାବେଳେ ସେହି ତୁଳନାରେ ମହିଳା ଶ୍ରମିକଙ୍କ କ୍ଷେତ୍ରରେ ଅସମାନତା ଦେଖାଯାଏ।
ଅପରପକ୍ଷରେ ବିଶେଷକରି ମହିଳା ଓ ପୁରୁଷ ଶ୍ରମିକମାନେ ଗଁାଗୁଡ଼ିକରେ କାମ ଧନ୍ଦା ନ ପାଇ ବାହାର ରାଜ୍ୟକୁ ଯାଉଛନ୍ତି। ସେଠାରେ ଦଲାଲମାନଙ୍କ ଦ୍ୱାରା ବହୁ ସମୟରେ ଶୋଷଣ ହେଉଥିବା ନଜିର ରହିଛି। କେତେବେଳେ ବକେୟା ପାଉଣା ପାଇଁ ଶାରୀରିକ ଓ ମାନସିକ ନିର୍ଯାତନାର ଶିକାର ହୋଇଥା’ନ୍ତି। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ବସବାସ କରୁଥିବା ଅନୁସୂଚିତ ଜନଜାତି ଅଧ୍ୟୁଷିତ ସ୍ଥାନରେ ଶ୍ରମିକମାନେ ନିରକ୍ଷର ହୋଇଥିବାରୁ ବହୁ ସମୟରେ ଶୋଷଣର ଶିକାର ହୋଇଥା’ନ୍ତି। ଦଲାଲମାନେ ଠିକାଦାରମାନଙ୍କଠାରୁ ଉଚିତ ମୂଲ୍ୟ ଆଣି ସେମାନଙ୍କୁ ସ୍ବଳ୍ପ ମଜୁରି ଦେଇଥା’ନ୍ତି। ଏହି ଅଞ୍ଚଳରେ ବହୁସଂଖାରେ କୁଶଳୀ, ଅଣକୁଶଳୀ, ଅର୍ଦ୍ଧକୁଶଳୀ ଶ୍ରମିକ ରହିଥିବା ବେଳେ ସଚେତନତା ଅଭାବରୁ ଜିଲା ଶ୍ରମ କାର୍ଯ୍ୟାଳୟରେ ନାମ ପଞ୍ଜୀକୃତ କରିବାରେ ବହୁ ବାଦ୍ ପଡ଼ୁଛନ୍ତି। ସେମାନଙ୍କୁ ପ୍ରଲୋଭନ ଦେଖାଇ ଗ୍ରାମାଞ୍ଚଳରେ ବିଭିନ୍ନ ସଙ୍ଗଠନ କର୍ମକର୍ତ୍ତା ଶ୍ରମ ଜବ୍କାର୍ଡ କରେଇ ଦେବାକୁ କହି ଶତାଧିକ ଟଙ୍କା ଲୁଟୁଥିବା ନେଇ ବିଗତ ଦିନରେ ନଜିର ରହିଛି। ସ୍ଥାନୀୟ ପ୍ରଶାସନ ପକ୍ଷରୁ ଶ୍ରମିକମାନଙ୍କୁ ସଚେତନ କରାଇବାକୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ ବୋଲି ପୂର୍ବତନ ସରପଞ୍ଚ ନାଥ କୁମାର ଭୋଳ କହିଛନ୍ତି। ବ୍ଲକର ଅନେକ ଶ୍ରମିକ ଦେଶ ବିଦେଶର ବିଭିନ୍ନ ଶିଳ୍ପ କାରଖାନାରେ କାର୍ଯ୍ୟ କରୁଛନ୍ତି। ବହୁ ସମୟରେ ଶ୍ରମିକଙ୍କ ଜୀବନ ଚାଲି ଯାଉଥିଲେ ମଧ୍ୟ ସେମାନଙ୍କ ମୃତଦେହ ଭିଟାମାଟିରେ ପହଞ୍ଚତ୍ବା ସମ୍ଭବ ହୋଇ ନ ଥାଏ। ଫଳରେ ଶ୍ରମିକମାନଙ୍କ ପରିବାର ଦୁଃଖରେ ଭାଙ୍ଗି ପଡ଼ିବା ସହ ନ୍ୟାୟ ପାଇବାରୁ ବଞ୍ଚତ୍ତ ହୋଇଥା’ନ୍ତି ବୋଲି ଅଭିଯୋଗ ହେଉଛି। ସେହିପରି ଗ୍ରାମାଞ୍ଚଳରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍)ରେ କାମ ଧନ୍ଦା ଅଭାବରୁ ବାଧ୍ୟ ହୋଇ ଶ୍ରମିକମାନେ ଦେଶ ବିଦେଶ ଯାଉଥିବା ଅଭିଯୋଗ ହେଉଛି। ଏଠି ଶ୍ରମିକମାନଙ୍କ କାମ ମେଶିନ ମୁଣ୍ଡାଉଛି ବୋଲି ବୁଦ୍ଧିଜୀବୀ ସୁବାସ ସ୍ବାଇଁ କହିଛନ୍ତି।
