ମାଲକାନଗିରି, ୨୭ା୧(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ଓ ଦୌରା ଜଜ୍ ଡାକ୍ତର ପ୍ରସନ୍ନ କୁମାର ପଣ୍ଡା ସୋମବାର ଏକ ହତ୍ୟା ମାମଲାର ଶୁଣାଣି କରି ସ୍ତ୍ରୀ ହତ୍ୟାକରୀଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଅଭିଯୁକ୍ତ ଜଣକ ହେଲେ ମାଲକାନଗିରି ଥାନା ପାଣ୍ଡ୍ରିପାଣି ପଞ୍ଚାୟତ ସିନ୍ଧିଭଟା ଗ୍ରାମର ରତନ ନାୟକ । ୧୭ଜଣ ସାକ୍ଷୀଙ୍କ ବୟାନ ରେକର୍ଡ ପରେ ବିଚାରପତି ଏହି ଦଣ୍ଡାଦେଶ ଶୁଣାଇଛନ୍ତି ।
ପ୍ରକାଶ ଯେ, ୨୦୧୯ ନଭେମ୍ବର ୯ ତାରିଖରେ ସ୍ତ୍ରୀ ଗାଙ୍ଗାୟୀ ନାୟକଙ୍କ ସହ ମିଶି ପାଣ୍ଡ୍ରିପାଣି କଳାହାଣ୍ଡି ସାହିସ୍ଥିତ ଶ୍ୱଶୁରଙ୍କ ଘରକୁ ରତନ ବୁଲିବାକୁ ଯାଇଥିଲେ। ରାତି ୯ ଟାରେ ନିଶାସକ୍ତ ଅବସ୍ଥାରେ ରତନ ତାଙ୍କ ବନ୍ଧୁଙ୍କ ଘର ଅଗଣାରେ ଶୋଇ ପଡିଥିଲେ। ତେବେ ପରେ କୌଣସି କାରଣରୁ ଗଙ୍ଗାୟୀ ଓ ରତନଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା।
ଏଥିରେ ଉତ୍ତ୍ୟକ୍ତ ହୋଇ ରତନ ନିକଟରେ ଥିବା ଏକ ଟାଙ୍ଗିଆରେ ସ୍ତ୍ରୀ ଗଙ୍ଗାୟୀଙ୍କୁ ଆକ୍ରମଣ କରିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ଏ ସମ୍ପର୍କରେ ଶ୍ୱଶୁର ରତନଙ୍କ ପୁଅକୁ ଫୋନ୍ ଯୋଗେ ଜଣାଇବା ପରେ ରାତି ପ୍ରାୟ ୧୨ଟାରେ ପୁଅ ଘେନୁ ଘଟଣାସ୍ଥଳରେ ପହଞ୍ଚି ମାଙ୍କ ମୃତଦେହ ପଡିଥିବା ଦେଖି ପୋଲିସରେ ଅଭିଯୋଗ କରିଥିଲେ।
ମାଲକାନଗିରି ପୋଲିସ ରତନଙ୍କୁ ଗିରଫ କରିବା ସହ ନଂ. ୨୯୭/୧୯ ରେ ମାମଲା ରୁଜୁକରି କୋର୍ଟ ଚାଲାଣ କରିଥିଲେ। ଏହି ମାମଲାର ସୋମବାର ଶୁଣାଣି କରି ବିଚାରପତି ଅଭିଯୁକ୍ତ ରତନଙ୍କୁ ଆଜୀବନ କାରାଦଣ୍ଡ ସହ ୧୦ ହଜାର ଟଙ୍କା ଜରିମାନା ଧାର୍ଯ୍ୟ କରିଛନ୍ତି। ଜରିମାନା ଅନାଦାୟ ୧ ବର୍ଷ କାରାଦଣ୍ଡ ଭୋଗିବାକୁ ରାୟ ଶୁଣାଇଛନ୍ତି। ଏହି ମାମଲାକୁ ସରକାରୀ ଓକିଲ ମହେନ୍ଦ୍ର କୁମାର ନାଗ ପରିଚାଳନା କରିଥିଲେ।
