କୋକସରା,୨୯ା୭(ଦୁଷ୍ମନ୍ତ କୁମାର ପାଟ୍ଟଯୋଶୀ): କଳାହାଣ୍ଡି ଜିଲା କୋକସରା ଥାନା ଅନ୍ତର୍ଗତ ମାଝୀଗୁଡ଼ା ଗ୍ରାମରେ ଗତ ରବିବାର ଜୟନ୍ତ ନାଗଙ୍କ ସ୍ତ୍ରୀ ଉର୍ମିଳାଙ୍କୁ ସ୍ବାମୀ ଜୟନ୍ତ, ଶାଶୁ ଓ ବଡ଼ ଯା’ ମିଶି ପେଟ୍ରୋଲ ଢାଳି ପୋଡ଼ି ମାରିବା ଘଟଣାରେ ମୃତ ଉର୍ମିଳାଙ୍କ ସ୍ବାମୀଙ୍କୁ କୋକସରା ପୋଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ଘଟଣାରେ ନ୍ୟାୟିକ ତଦନ୍ତ ଓ ଅନ୍ୟ ଅଭିଯୁକ୍ତଙ୍କୁ ଘଣ୍ଟ ଘୋଡ଼ାଉଥିବା ଅଭିଯୋଗ କରି ଶନିବାର କଳାହାଣ୍ଡି ଅଲ୍ ଓଡିଶା ସିଡ୍ୟୁଲ କାଷ୍ଟ ଫେଡେରେଶନର ଜିଲା ଉପଖଣ୍ଡ ଓ ବ୍ଲକ କର୍ମକର୍ତ୍ତାମାନେ କୋକସରା ଥାନାରେ ପହଞ୍ଚି ପୋଲିସ ଲଗାଇଥିବା ଦଫାକୁ ୩୦୬ ପରିବର୍ତ୍ତେ ୩୦୨ କରିବା ଓ ଏହି ଘଟଣାରେ ସମ୍ପୃକ୍ତ ରହିଥିବା ଅନ୍ୟମାନଙ୍କୁ ଗିରଫ କରିବା ପାଇଁ ଲିଖିତ ଦାବି କରିଛନ୍ତି। ଶନିବାର ଧର୍ମଗଡ଼ ଉପଖଣ୍ଡ ସିଡ୍ୟୁଲ କାଷ୍ଟ ଫେଡେରେଶନ ସଭାପତି ବିରଞ୍ଚି ନାରାୟଣ ଜାଲଙ୍କ ନେତୃତ୍ୱରେ ଏକ ଟିମ୍ କୋକସରା ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ନିରପେକ୍ଷ ଭାବେ ଏହାର ତଦନ୍ତ କରି ଘଟଣାରେ ସମ୍ପୃକ୍ତ ବ୍ୟକ୍ତି ଓ ମୁଖ୍ୟ ଅଭିଯୁକ୍ତଙ୍କୁ ହତ୍ୟା ମାମଲାରେ ଦଫା ରୁଜୁ କରା ନ ଗଲେ ଆଗାମୀ ଦିନରେ ଥାନା ଘେରାଉ କରିବାକୁ ଜିଲା କାର୍ଯ୍ୟକାରୀ ସଭାପତି ରିଷୀ ସୁଦାନ ଛତ୍ରପାଳ, ଆଶିଷ ରଞ୍ଜନ ନାଏକ, କୋଷାଧ୍ୟକ୍ଷ ଦେବେନ୍ଦ୍ର ନାଏକ, ଧର୍ମଗଡ଼ ଉପଖଣ୍ଡ ଯୁବ ସଭାପତି ଢଗ ନାଏକ, ଉପଦେଷ୍ଟା ଦିଗାମ୍ବର ଦୁରିଆ, ଭବାନୀପାଟଣା ଟାଉନ ସଭାପତି ସଞ୍ଜୟ ସୁନାନୀ, କୋକସରା ବ୍ଲକ ସଭାପତି କିଶୋର ଚନ୍ଦ୍ର ନାଏକ, ହେରମ୍ବ ସେନାପତି, ଦଣ୍ଡପାଟ ଡମ୍ବ ସମାଜ ସଭାପତି ବିରଞ୍ଚି ଖମାରୀ, ସମ୍ପାଦକ ଯଶୋବନ୍ତ ପାଣିଗ୍ରାହୀ, ଉପସଭାପତି ପଙ୍କଜ ଠାକୁର, ସୁନୀଲ ଦୁରିଆ, କୋକସରା ବ୍ଲକ ସମ୍ପାଦକ ପ୍ରବୀଣ ପାଣିଗ୍ରାହୀ, ପ୍ରଧାନୀ ବାଗ, ଦିଶାନ୍ତ ବେଶ୍ରା, ଘନଶ୍ୟାମ ଛତ୍ରିଆ, ଗୁପ୍ତେଶର, ଏ. ସରିତା ରାଓ, ଲକ୍ଷ୍ମୀପ୍ରିୟା କର ପ୍ରମୁଖ ଚେତାବନୀ ଦେଇଛନ୍ତି।
