ଭବାନୀପାଟଣା,୧।୬(ଉତ୍ତମ କୁମାର ଦାଶ): ଚିକିତ୍ସା ଅବହେଳାରୁ ମହିଳା ରୋଗୀଙ୍କ ମୃତ୍ୟୁ ହୋଇଛି। ଏଭଳି ଅଭିଯୋଗ କଳାହାଣ୍ଡି ଜିଲା ମୁଖ୍ୟ ମେଡିକାଲରୁ ଆସିଛି। ଶନିବାର ଜିଲାର ନର୍ଲା ଥାନା ଅନ୍ତର୍ଗତ ସରିଆ ଗାଁର ୫୫ ବର୍ଷୀୟ ସ୍ନେହଲତା ବାହିନୀପତିଙ୍କ ଚିକିତ୍ସା ଅବହେଳାରୁ ମୃତ୍ୟୁ ହୋଇଥିବା ନେଇ ତାଙ୍କ ପୁଅ ଆଶୁତୋଷ ବାହିନୀପତି ଅଭିଯୋଗ ଆଣିଛନ୍ତି। ମୃତ ସ୍ନେହଲତାଙ୍କୁ ଗତ ମେ’ ୨୬ରେ ଭବାନୀପାଟଣା ଠାରେ ଥିବା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ମେ’ ୨୮ରେ ଡିସଚାର୍ଜ କରାଯାଇଥିଲା। ପରିବାରର ଅଭିଯୋଗ ଅନୁଯାୟୀ, ଡିସ୍ଚାର୍ଜ ସମୟରେ ବ୍ଲଡ ରିପୋର୍ଟ ଅସ୍ବାଭାବିକ ଥିଲା, କିନ୍ତୁ ଡାକ୍ତର ସ୍ବାସ୍ଥ୍ୟାବସ୍ଥା ସମ୍ବନ୍ଧୀୟ ରିପୋର୍ଟ ସ୍ବଭାବିକ ଥିବା କହି ଡିସଚାର୍ଜ କରିଦେଇଥିଲେ। କିନ୍ତୁ ଘରକୁ ଆଣିବା ପରେ ମେ ୨୯ରେ ତାଙ୍କର ମୃତ୍ୟୁ ହୋଇଥିଲା। ଡାକ୍ତର ଅବହେଳା କାରଣରୁ ତାଙ୍କର ମୃତ୍ୟୁ ହୋଇଥିବା ପରିବାର ଲୋକେ କହିଛନ୍ତି। ଏନେଇ ଆଶୁତୋଷ ଜିଲାପାଳ, ସ୍ବାସ୍ଥ୍ୟମନ୍ତ୍ରୀ ଏବଂ ଜାତୀୟ ମାନବାଧିକାର କମିଶନ (ଏନ୍ଏଚ୍ଆର୍ସି)ଙ୍କ ନିକଟରେ ଲିଖିତ ଅଭିଯୋଗ କରି ଘଟଣାର ତଦନ୍ତ ସହ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି। ମୃତ ମହିଳାଙ୍କ ପୁଅ ଆଶୁତୋଷ ବାହିନୀପତି କହିଛନ୍ତି, ‘ଗରମରେ ଅଚେତ ହୋଇପଡିବାରୁ ଗତ ୨୬ ତାରିଖ ରାତିରେ ମା’ଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ନେଇକି ଆସିଥିଲୁ । ସାଧାରଣ ଭାବରେ ଚିକିତ୍ସା କରିବା ସହ ମେଡିସିନ ବିଭାଗରେ ଆଡମିଟ କଲେ। ସକାଳେ ଡାକ୍ତର ଆସିଲେ ଓ କିଛି ପରୀକ୍ଷା କରିବା ପାଇଁ କହିବାରୁ ମେଡ଼ିକାଲରେ ହିଁ ପରୀକ୍ଷା କରାଯାଇଥିଲା। ରିପୋର୍ଟ ଆସିବା ପରେ ସାରେ ଡାକ୍ତର ୱାର୍ଡ ରାଉଣ୍ଡରେ ଆସିବା ସମୟରେ ଆମେ ରିପୋର୍ଟ ଦେଖେଇଥିଲୁ। ସବୁ ଠିକ ଅଛି କହି ୨୮ରେ ଡିସଚାର୍ଜ କରିଥିଲେ। ପୁଣି ଥରେ ଦେହ ଖରାପ ହେବାରୁ ହସ୍ପିଟାଲ ଆଣିଥିଲୁ ହେଲେ ଡାକ୍ତର ମା’କୁ ମୃତ ଘୋଷଣା କରିଥିଲେ। ଡାକ୍ତରଙ୍କ ଅବହେଳାରୁ ତାଙ୍କ ମା’ଙ୍କ ମୃତ୍ୟ ହୋଇଛି କହି ନ୍ୟାୟ ମିଳୁ ବୋଲି କହିଛନ୍ତି। ସେପଟେ ଏନେଇ କଳାହାଣ୍ଡି ଜିଲା ଚିକିତ୍ସା ଅଧିକାରୀ ବାଣୀଶ୍ରୀ ପାଢ଼ୀ କହିଛନ୍ତି, ‘ତଦନ୍ତ କଲା ପରେ ପଦକ୍ଷେପ ଗ୍ରହଣ କରିହେବ। ରୋଗୀକୁ ଷ୍ଟେବଲ ଦେଖିକି ହିଁ ସେ ଡିସଚାର୍ଜ କରିଛନ୍ତି। ଚିକିତ୍ସା କରିଥିବା ଡାକ୍ତରଙ୍କ ସହ ଆଲୋଚନା କଲା ପରେ ପଦକ୍ଷେପ ଗ୍ରହଣ କରିବି ବୋଲି କହିଥିଲେ।
