ଜେରୁଜେଲମ୍,୩୧ା୧୦: ଇସ୍ରାଏଲର ୧୨୦ ଆସନ ବିଶିଷ୍ଟ ସଂସଦ ‘କ୍ନେସେଟ’ ନିର୍ବାଚନରେ କୌଣସି ଦଳକୁ ସ୍ପଷ୍ଟ ସଂଖ୍ୟା ଗରିଷ୍ଠତା ମିଳିନାହିଁ। ସରକାର ଗଠନ ପାଇଁ ୬୧ଟି ଆସନ ଆବଶ୍ୟକ ଥିବାବେଳେ, ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ନେତୃତ୍ୱାଧୀନ ଦକ୍ଷିଣପନ୍ଥୀ ମେଣ୍ଟ ୫୩ଟି ଆସନ ପାଇ ସବୁଠାରୁ ବଡ଼ ଦଳ ହୋଇଛି। ଅପରପକ୍ଷରେ, ପୂର୍ବତନ ସେନା ମୁଖ୍ୟ ଗାଡି ଆଇଜେନକୋଟ୍ଙ୍କ ବିରୋଧୀ ମେଣ୍ଟ ୪୮ଟି ଏବଂ ଆରବ ଦଳଗୁଡ଼ିକ ୧୯ଟି ଆସନ ହାସଲ କରିଛନ୍ତି।
ସରକାର ଗଠନ ପାଇଁ ଆରବ ଦଳଗୁଡ଼ିକ ‘କିଙ୍ଗମେକର’ ସାଜିଛନ୍ତି। ନିୟମାନୁସାରେ, ରାଷ୍ଟ୍ରପତି ଇସାକ ହର୍ଜୋଗ ପ୍ରଥମେ ନେତାନ୍ୟାହୁଙ୍କୁ ୪୨ ଦିନ ମଧ୍ୟରେ ସରକାର ଗଠନ କରିବାକୁ ସୁଯୋଗ ଦେବେ। ଏଥିରେ ବିଫଳ ହେଲେ ଦ୍ୱିତୀୟ ବୃହତ୍ତମ ଦଳକୁ ୨୮ ଦିନ ଏବଂ ତା’ପରେ ତୃତୀୟ ପ୍ରାର୍ଥୀଙ୍କୁ ୧୪ ଦିନ ସମୟ ମିଳିବ।
ଆଇଜେନକୋଟ ଓ ଆରବ ଦଳ ମେଣ୍ଟ:
ଏହି ମେଣ୍ଟ ହେଲେ ସଂଖ୍ୟା ୬୭ ହେବ, କିନ୍ତୁ ଗାଜା ଯୁଦ୍ଧ, ହମାସ ଏବଂ ପାଲେଷ୍ଟାଇନ ପ୍ରସଙ୍ଗରେ ଉଭୟଙ୍କ ଆଭିମୁଖ୍ୟ ଭିନ୍ନ ଥିବାରୁ ଏହାର ସମ୍ଭାବନା କମ୍।
ନେତାନ୍ୟାହୁ-ଆଇଜେନକୋଟ ମେଣ୍ଟ:
ଏଥିପାଇଁ ନେତାନ୍ୟାହୁଙ୍କୁ କିଛି କଟ୍ଟରପନ୍ଥୀ ସହଯୋଗୀଙ୍କୁ ଛାଡ଼ିବାକୁ ପଡ଼ିପାରେ। ତେବେ ସୁରକ୍ଷା ବିଫଳତା ପାଇଁ ନେତାନ୍ୟାହୁଙ୍କୁ ଦାୟୀ କରୁଥିବା ଆଇଜେନକୋଟ୍ ଏଥିରେ ରାଜି ହେବା ନେଇ ସନ୍ଦେହ ରହିଛି।
ଦଳ ବଦଳ:
ନେତାନ୍ୟାହୁ ନାଫତାଲି ବେନେଟ କିମ୍ବା ଆଭିଗଡୋର ଲିବରମ୍ୟାନ୍ଙ୍କ ଭଳି ପୁରୁଣା ସହଯୋଗୀଙ୍କୁ ନିଜ ଆଡ଼କୁ ଆଣିବାକୁ ଚେଷ୍ଟା କରିପାରନ୍ତି।
ପୁନଃ ନିର୍ବାଚନ:
କୌଣସି ସମାଧାନ ନ ବାହାରିଲେ ପୁନର୍ବାର ନିର୍ବାଚନ ହେବ। ଏହି ସମୟ ମଧ୍ୟରେ ନେତାନ୍ୟାହୁ ‘କାର୍ଯ୍ୟର୍ନିବାହୀ ପ୍ରଧାନମନ୍ତ୍ରୀ’ ଭାବେ ଦାୟିତ୍ୱ ତୁଲାଇବେ।
ଭାରତ ଉପରେ ପଡ଼ିବ କି ପ୍ରଭାବ:
ଇସ୍ରାଏଲ୍ର ସମ୍ପ୍ରତି ୨୦୨୬ ସାଧାରଣ ନିର୍ବାଚନରେ କୌଣସି ଗୋଟିଏ ବିଶେଷ ମେଣ୍ଟକୁ ସ୍ପଷ୍ଟ ବହୁମତ (୬୧ଟି ଆସନ) ମିଳିନାହିଁ— ବେଞ୍ଜାମିନ୍ ନେତାନ୍ୟାହୁଙ୍କ ମେଣ୍ଟ ୫୩ଟି ଆସନ ହାସଲ କରିଥିବା ବେଳେ ବିରୋଧୀ ମେଣ୍ଟ ୪୮ଟି ଆସନ ପାଇଛି। ଫଳରେ ସରକାର ଗଠନକୁ ନେଇ ଅନିଶ୍ଚିତତା ଦେଖାଦେଇଛି।
ଭାରତ ଓ ଇସ୍ରାଏଲ୍ର ସମ୍ପର୍କ କେବଳ ଦୁଇ ନେତାଙ୍କ ବ୍ୟକ୍ତିଗତ ବନ୍ଧୁତା ମଧ୍ୟରେ ସୀମିତ ନୁହେଁ। ପ୍ରତିରକ୍ଷା ଉପକରଣ, ଡ୍ରୋନ୍ , ଏୟାର ଡିଫେନ୍ସ ସିଷ୍ଟମ୍ ଏବଂ ମିସାଇଲ୍ ରପ୍ତାନି ଉଭୟ ଦେଶର ବାସ୍ତବିକ ଆବଶ୍ୟକତା ଉପରେ ଆଧାରିତ। ତେଣୁ ନେତା ବଦଳିଲେ ବି ଏହି ପ୍ରତିରକ୍ଷା ଭାଗୀଦାରୀ ଅବ୍ୟାହତ ରହିବ।
ଭାରତର ‘ମେକ୍ ଇନ୍ ଇଣ୍ଡିଆ’ ଯୋଜନା ଅଧୀନରେ ଇସ୍ରାଏଲୀ କମ୍ପାନୀଗୁଡ଼ିକ ଭାରତରେ ଅସ୍ତ୍ରଶସ୍ତ୍ର ଉତ୍ପାଦନ କରୁଛନ୍ତି। ଆଗାମୀ ଦିନରେ ନୂଆ ସରକାର ଆସିଲେ ମଧ୍ୟ ପ୍ରଯୁକ୍ତିବିଦ୍ୟା ଆଦାନପ୍ରଦାନ ଏବଂ କୃତ୍ରିମ ବୁଦ୍ଧିମତ୍ତା (AI), ସାଇବର ସୁରକ୍ଷା ଓ ସେମିକଣ୍ଡକ୍ଟର କ୍ଷେତ୍ରରେ ମିଳିତ ସହଯୋଗ ଆଗକୁ ବଢ଼ିବ।
ମଧ୍ୟ-ପ୍ରାଚ୍ୟରେ ଭାରତର ଆଞ୍ଚଳିକ ସ୍ୱାର୍ଥ, I2U2 ଗୋଷ୍ଠୀ (ଭାରତ, ଇସ୍ରାଏଲ୍, ଆମେରିକା, UAE) ଏବଂ IMEC (ଭାରତ-ମଧ୍ୟ ପ୍ରାଚ୍ୟ-ୟୁରୋପ ଅର୍ଥନୈତିକ କରିଡୋର୍) ଭଳି ବଡ଼ ପ୍ରକଳ୍ପଗୁଡ଼ିକ ଦୁଇ ଦେଶ ପାଇଁ ଗୁରୁତ୍ୱପୂର୍ଣ୍ଣ। ଏହି ରଣନୀତିକ ପ୍ରକଳ୍ପଗୁଡ଼ିକ ନିର୍ବାଚନ ଫଳାଫଳ ଦ୍ୱାରା ପ୍ରଭାବିତ ହେବାର ସମ୍ଭାବନା କମ୍।
ନେତାନ୍ୟାହୁ ଯଦି ସରକାର ଗଠନ କରିବାରେ ବିଫଳ ହୁଅନ୍ତି, ତେବେ ଶୀର୍ଷ ନେତୃତ୍ୱ ସ୍ତରରେ ନୂତନ ଆଲୋଚନା ଓ ସୌହାର୍ଦ୍ଦ୍ୟ ଗଢ଼ିବାକୁ କିଛି ସମୟ ଲାଗିପାରେ।
